Ishak netoꞌo ri ngata Gerar
26
Ri tana etu neumba woꞌumo kamateoro ewa to najadi nokolu tempo Abraham danatuwu. Jadi nalaumo Ishak nantingayo Magau Abimelekh, magau nto Filistin ri ngata Gerar, merapi ane iꞌa mamala metoꞌo ri bagia etu. 2 Nipowiana iwetu sabana i PUE nompopokita korona ka iꞌa pade nanguli, “Neꞌe malau mpaka ri Tana Masir. Petoꞌomo iko ri tana to kupakatantu ka iko. 3 Iko kana maroo ri tana eꞌi bara sakuya kasaena. Aku kana mosanggani-nggani ante iko bo mombagane iko. Njumaongu tana eꞌi kana kuwai ka iko bo mulimu. Aku kana mompakadupa pojanji to nipowiaku ante umamu Abraham. 4 Aku kana mompakadea mulimu sampe kadeana masimbayu ewa betuꞌe ri langi, pade njumaongu tana eꞌi kana kuwai ka ira. Pade nggari mulimu banepia pura-pura manusia ri dunia kana mombarata rasi nggari jaꞌiku. 5 Aku kana mowia iwetu sabana Abraham nantuki tesaku pade nompangala parentaku, tewaiku bo atura-aturaku.” 6 Jadi netoꞌomo Ishak ri ngata Gerar.7 Tempo tau-tau ri setu nekutana ewa i Ribka, nesonomo Ishak, “Iꞌa etu tuaꞌiku.” Niulina iwetu sabana naeka iꞌa manguli i Ribka etu rongona. Nipekirina, “Neꞌe-neꞌe tau ri seꞌi mompatesi aku ala mangala i Ribka, sabana iꞌa besi to nagaya mpuꞌu.”
8 Sangga Ishak netoꞌo ri setu bara sakuya kasaena, naria saeo Magau Abimelekh nantongoaka Ishak nggari tilalabana nosieki-eki ante i Ribka. 9 Pade nipokio Magau Abimelekh Ishak pade nipekutanana, “Besi etu rongomu! Nokuya komi nanguli iꞌa etu tuaꞌimu?”
Nesonomo Ishak, “Nipekiriku aku rapatesi komi ane kuuli iꞌa eꞌi rongoku.”
10 Pade nangulimo Abimelekh, “Nokuya bo nipowiamu iweꞌi ka kami? Rapana sambaꞌa langgai nggari todeaku mangala bo mosampaturu ante rongomu! Ane rapana etu najadi komi mompowia kami masilaka!” 11 Naopu etu Magau Abimelekh nomparenta njumaongu todeana iweꞌi: “Isema-sema mombabago tau eꞌi bara rongona, iꞌa kana rasuku mamate.”
12 Naliu etu Ishak notinalu ri tana etu. Pade riara mpae etu niratana asele ntinalu satu nggani kadeana nggari nuapa to nitujana sabana i PUE nombagane iꞌa. 13 Kakalumana Ishak tunggai nantambai sampe iꞌa najadi tau nakalumana mpuꞌu. 14 Nadea mpuꞌu bimbana, towauna, japina bo batua-batuana sampe nasiriatimo rara nto Filistin nanggita iꞌa. 15 Jadi ira nombaiwu buwu-buwu to nikae nu batua Abraham nokolu tempo iꞌa danatuwu.
16 Naopu etu nangulimo Magau Abimelekh ka Ishak, “Palaimo nggari ngata kami eꞌi. Komi nelabimo kakuasamu nggari kami.”
17 Jadi nalaimo Ishak notenda ri lemba Gerar. Ri setu iꞌa netoꞌo bara sakuya kasaena. 18 Nikaena mpanjili buwu-buwu to nikae tempona Abraham danatuwu to niiwu nto Filistin. Buwu-buwu etu nipoposanga nantuki sanga to nipake umana nokolu.
19 Batua-batua Ishak nanggae buwu nabou ri lemba Gerar pade nombarata mata ue to nadea uena. 20 Tapi topoewu nggari ngata Gerar nosinggarau ante topoewu Ishak ante nanguli, “Ue eꞌi ue kami!” Sabana etu Ishak nompoposanga buwu etu “Buwu Esek,”a sabana ira nosinggarau ri setu. 21 Jadi batua Ishak nolinja nanggae buwu ntanina woꞌu. Tapi najadi woꞌumo posinggarau nosinggawela ante buwu etu. Sabana etu buwu etu nipoposanga Ishak “Buwu Sitna.”b 22 Naliu etu nolinjamo iꞌa nggari setu pade nanggae buwu katoluonguna. Tapi mana ria posinggarau nosinggawela ante buwu etu. Sabana etu buwu etu nipoposanga Ishak “Buwu Rehobot.”c Niulina, “Weꞌi-weꞌi PUE nombawai loga ka kita pade kita mamala matuwu mabelo ri seꞌi.”
23 Naopu etu nalaumo Ishak mpaka ri ngata Bersyeba. 24 Pade ri wengi etu i PUE nompopokita korona ka iꞌa pade nanguli, “Akumo Alatala to nisomba umamu Abraham. Neꞌe maeka sabana Aku mosanggani-nggani ante iko. Aku kana mombagane iko pade mompakadea-dea mulimu sabana pojanjiku ka batuaku Abraham.”
25 Pade Ishak nompowia petoꞌo mpesomba ri setu pade nisombana i PUE ri petoꞌo etu. Notendamo iꞌa ri setu, pade batua-batuana nombakae buwu to rintanina.
Pojanji Ishak ante Abimelekh
26 Naria saeo naratamo Abimelekh nggari ngata Gerar nosanggani ante roana Ahuzat bo tadulako tantarana i Pikhol mosirata ante Ishak. 27 Nanggita ira nekutanamo Ishak ka ira, “Nokuya komi pura narata nomposintomu aku weꞌi-weꞌi? Komi nomporau rara aku bopia pade nompopalai kami nggari ngata komi!”
28 Nesonomo ira, “Weꞌi-weꞌi nanotomo ka kami i PUE nosanggani-nggani ante komi. Jadi nipekiri kami nabelopa kita mowia pojanji mpasanggani-nggani. Kamaimo kita mosijanji 29 ala komi daꞌa mowia jaꞌa ante kami nasimbayu ewa kami daꞌa nompakajaꞌa komi. Kami batena noinggu nabelo ri jaꞌimu pade nompalamba komi nalai ante nabelo. Pade weꞌi-weꞌi nanotomo ka kami, komimo to nigane i PUE.”
30 Naopu etu Ishak nowia posusa ka ira, pade ira nanggoni bo nanginu mpasanggani-nggani. 31 To naile mpadondona nojanjimo ira sambaꞌa bo sambaꞌa matuwu mosinggabelo. Naopu etu nangulimo Ishak ka ira, “Pakabelo-belo ri jala.” Pade nosipogaꞌamo ira ewa tau to nosinggabelomo.
32 Ri eo etu woꞌu naratamo batua-batua Ishak nompakilu ka iꞌa ewa buwu to nikae ira. Niuli ira, “Kami nombarata ue woꞌumo!” 33 Jadi Ishak nompoposanga buwu etu Syeba.d Pade etumo sabana ngata etu nipoposanga Bersyebae sampe weꞌi-weꞌi.
Rongo-rongo Esau nggari tau to Het