Muli Abraham nggari rongona karombaꞌana
1Taw. 1:32-33
25
Naopu kamate i Sara Abraham norongo woꞌumo ante sambaꞌa besi to nosanga ka i Ketura. 2 Rongona etu nangote anana to nosanga ka i Zimran, Yoksan, i Medan, i Midian, Isybak, bo i Suah. 3 Yoksan uma i Syeba bo i Dedan, bo muli i Dedan iramo to Asyur, to Letush, bo to Leum. 4 Ana-ana i Midian iramo: Efa, Efer, i Henokh, Abida, bo Eldaa. Ira pura-pura eꞌi muli i Ketura.5 Abraham nombawai ka anana Ishak pura-pura kakalumanana. 6 Tapi tempo Abraham danatuwu, iꞌa nombawai mamimo petulungi ka anana nggari rongona ntanina. Naopu etu nipakaunamo ana-anana etu nolinja mpaka ri bagia ri sabingga kamataeona nggari Tana Kanaan ala mosinggakawao ante anana Ishak.
Abraham namate pade nitana
7 Umuru Abraham nagana satu pitumpulu bo lima mpaemo 8 pade iꞌa namate. Tempo iꞌa namate natuꞌa mpuꞌumo iꞌa, nasaemo umuruna. 9 Pade iꞌa nitana anana Ishak bo Ismael ri bololia Makhpela ri sabingga kamataeona Mamre ri pampa Efron ana i Zohar to Het etu. 10 Etumo pampa to nioli Abraham nggari tau-tau to Het. Ri setumo Abraham nitana mpasanggani-nggani ante rongona i Sara.
11 Naopu kamate Abraham Alatala nombagane anana Ishak. Tempo etu Ishak netoꞌo namosu buwu to nosanga ka Buwu Lahai Roi.
Muli Ismael
1Taw. 1:28-31
12 Iweꞌimo tesa muli-muli Ismael ana Abraham to niote i Hagar, etumo besi to Masir to najadi batua i Sara.
13 Iweꞌimo sanga ana-ana Ismael to nitulisi ri seꞌi nantuki sunju mpesuwu ira: i Nebayot ana ulumbuana, i Kedar, Adbeel, i Mibsam, 14 i Misyma, i Duma, i Masa, 15 i Hadad, i Tema, Yetur, i Nafish bo i Kedma. Ismael noana ka sampulu rombaꞌa ngana langgai. 16 Ana-ana Ismael etu najadi totuꞌa sampulu rongu ngata. Ngata-ngata bo petoꞌo tenda ira nipoposanga nantuki sanga ira etu. 17 Umuru Ismael nagana satu tolumpulu bo pitumpaemo pade iꞌa namate. 18 Mulina netoꞌo ri bagia nggari ngata Hawila sampe ri ngata Syur ri sabingga kamataeona Tana Masir mantingayo ngata Asyur. Ira natuwu nosimpogaꞌa ante muli Abraham ntanina.
Tesa pesuwu Esau bo Yakub
19 Iweꞌimo tesa muli Ishak, ana Abraham. Abraham noana ka Ishak. 20 Pade tempo Ishak noumuru patampulu mpaemo iꞌa norongo ante i Ribka, ana i Betuel bo tuaꞌi i Laban, tau-tau to Aram nggari Bagia Aram-Mesopotamia. 21 Ribka nagampa, jadi Ishak nosambaya ka i PUE ala rongona moana. PUE nompoiyo pomperapi Ishak etu sampe natianamo i Ribka. 22 Ngana to nikatianana etu norapi. Daꞌapa ngana etu nesuwu ira rombaꞌa nosibaga riara ntaꞌina, sampe nangulimo i Ribka, “Nokuya sampe najadi ri koroku iweꞌi?” Jadi nosambayamo iꞌa nompekutana i PUE ewa ngana rombaꞌa etu.
23 Nangulimo i PUE ka iꞌa,
“Muli nu ngana to naria riara ntaꞌimu kana majadi rongu ngata bete.
Muli nu ngana to mupoana kana majadi rongu ngata to mosipobali banepia.
Muli nggari sambaꞌa kana melabi karosona nggari muli to santanina.
To ulumbua kana rapobatua nu tuaꞌina.”
24 Naratamo ntoana i Ribka moana, pade iꞌa nangote rombaꞌa ngana langgai norapi. 25 To ulumbua lenjena nambulei-lei, kulina ewa baju nowulu. Sabana etu iꞌa nipoposanga Esau.a 26 Tempo ngana karombaꞌana niote palena nanjoko padu ntuakana Esau. Etu sampe iꞌa nipoposanga Yakub.b Tempo i Ribka noana ka rombaꞌa ngana etu, Ishak noumuru onompulu mpaemo.
Esau nompobalu kuasa ulumbuana ka tuaꞌina
27 Ngana rombaꞌa etu nantambai eo nantambai nabete. Esau najadi topoasu to napande. Nipokonona metoꞌo ranggarawana. Yakub tau nanondo, pade nipokonona naroo ri tenda. 28 Ishak nelabi pompotowena ka Esau sabana nipokonona nanggoni bau niasu. Tapi i Ribka nelabipa pompotowena ka Yakub.
29 Naria saeo tempona Yakub noriapu uta bonci, naratamo Esau nggari poasuna. Naoro mpuꞌumo taꞌina. 30 Nangulimo iꞌa ka tuaꞌina, “Naoro mpuꞌumo taꞌiku. Wai ka aku sakedi bonci etu!” (Etumo sabana Esau niuli woꞌu Edom.)c
31 Nesonomo Yakub, “Pobalu ka aku ntani ruru kuasamu ewa ana ulumbua.”d
32 Nangulimo Esau, “Kita weꞌi! Sampalaipa aku eꞌi mamateoro! Nuapa gunana kuasa ewa ana ulumbua etu ka aku?”
33 Nesono woꞌumo Yakub, “Pojanji ka aku ntani ruru kuasamu etu majadi bagiaku!”
Jadi nojanjimo Esau iꞌa kana mombawai kuasana ewa ana ulumbua etu majadi bagia ntuaꞌina Yakub.
34 Naopu etu Yakub nombawai ka iꞌa roti bo sabagia nggari uta bonci etu. Nanggonimo Esau pade nanginumo iꞌa. Naopu etu nalaimo iꞌa. Iwetumo Esau daꞌa nombabila kuasana ewa ana ulumbua.