Abraham nangelo sambaꞌa besi raporongo Ishak
24
Abraham natuꞌamo pade iꞌa mpuꞌu-mpuꞌu nigane i PUE riara mpengele-ngele. 2 Naria saeo Abraham nanguli ka batuana to neliu nggatuꞌa to nombaurusi kakalumanana, “Dikamo palemu ri olo ntimpuku eꞌi.a 3 Pojanjimo ante sanga i PUE, etumo Alatala to nombakuasai langi bo dunia, iko daꞌa mangelo besi raporongo Ishak nggari tatongo randoo ri Tana Kanaan eꞌi to nipetoꞌoku weꞌi-weꞌi. 4 Tapi iko kana manjili mpaka ri ngataku bo sampesuwuku mboto ala mangelo rongo ka anaku Ishak.”5 Nangepe etu nekutanamo batua etu ka Abraham, “Iwenumo ngina ane randoo etu daꞌa madota mompalasi sapona pade mantuki aku mpaka ri tana eꞌi? Paraluu aku manggeni ana komi etu manjili mpaka ri tana pesuwu komi etu?”
6 Nesonomo Abraham, “Neꞌe ntoto mukeni anaku mpaka guria! 7 PUE Alatala to nombakuasai langi nanggeni aku nggari sapo nu umaku pade nggari jaꞌi nu sampesuwuku. Pade Iꞌa nojanji ka aku tana eꞌi kana rawaina ka muliku. Iꞌa mboto kana mompakau malaekana mokolu ka iko sampe iko mamala mombarata sambaꞌa randoo raporongo anaku nggari setu. 8 Tapi ane rapana randoo etu daꞌa madota mantuki iko mpaka wemai, iko makabasaka nggari janjimu eꞌi. Tapi naupa iwenu, neꞌe mukeni anaku etu mpaka guria!” 9 Naopu etu batuana nombadika palena ri olo ntimpu Abraham, madikana etu, pade nojanji iꞌa kana mantuki nuapa to niperapi Abraham ka iꞌa etu.
10 Naopu etu batua etu nangala sampulu ongu unta ante mpengaya-ngaya mbara-mbara to nasuli olina nggari jaꞌi madikana, pade nalaumo iꞌa mpaka ri Bagia Aram-Mesopotamia ri ngata to nipetoꞌo i Nahor, tuaka Abraham. 11 Sangga narata ri setu nipopetaꞌanamo untana ala mangosaraka ri sinjori buwu ri sawaliku ngata etu. Tempo etu nangguwiamo, etumo tempo besi-besi malau ri buwu monombu. 12 Pade nosambayamo batua etu iweꞌi: “PUE, Alatala to nisomba madikaku Abraham, tulungimo aku ala patujuku marata ri seꞌi maria aselena eo eꞌi. Popokitamo towemu ri jaꞌi madikaku Abraham. 13 Kitamo, aku nekanggore namosu buwu eꞌi. Sampalaipa randoo-randoo nggariara ngata kana marata monombu. 14 Kuperapi ala mamala majadi ngina iweꞌi: Aku kana manguli ka sambaꞌa nggari randoo etu, ‘Tulungimo popanaꞌu ruru gumbamu pade wai ka aku ue kuinu.’ Pade ane iꞌa mesono, ‘Inumo, bo unta-unta uma woꞌu kana kupopainu,’ kana kunjani iꞌamo to nipelisi i PUE majadi rongo batuamu Ishak. Ane etu majadi kana kunjani PUE nompopokita towemu ri jaꞌi madikaku Abraham.”
15-16 Tempo iꞌa danosambaya, naratamo i Ribka, sambaꞌa randoo to nagaya mpuꞌu to daꞌa sanggani nosampaturu ante langgai. Iꞌa ngana besi i Betuel, ana langgai i Milka to niporongo i Nahor, tuaka Abraham. Naratamo i Ribka ri buwu nanjumbuaka gumba nu ue. Napolamo iꞌa ri buwu nantombu ue pade nanjili. 17 Jadi batua Abraham etu nangowa nompakamosu randoo etu pade niulina, “Tulungi ruru aku eꞌi, ngana, waimo ue nggari gumbamu etu kuinu.”
18 Nesonomo randoo etu, “Inumo, uma.” Pade nasalisa iꞌa nantaꞌuraka gumba ue etu nggari wingana, pade niwaina ue niinu nu batua etu. 19 Sangga naopupa batua etu nanginu, nangulimo randoo etu, “Aku mantombu ue ka unta-unta uma woꞌu sampe pura-pura binata etu woꞌu manginu sampe mabasa.” 20 Naopu etu ante nasalisa nitolina ue nggariara gumbana etu riara petoꞌo panginu nu unta, pade nangowamo iꞌa manjili mpaka ri buwu nantombu ue mpakadea-dea ala pura-pura binata etu mabasa manginu.
21 Tempo etu batua Abraham nompariara randoo etu nggalino. Iꞌa madota mangginjani ane i PUE mompowia polumakona moasele bara daꞌa. 22 Sangga naopu pura-pura untana nabasamo nanginu, batua Abraham nangala saongu jali onge nggari bulawa to nasuli mpuꞌu olina, katomona kira-kira lima gram santongo bo rontonga gala bulawa, katomona kira-kira satu sampulu gram, pade niwaina ka i Ribka. 23 Pade niulina ka iꞌa, “Iko ana isema? Tulungi ulimo ka aku, bara maria petoꞌo rapoturu ri sapo umamu ka aku bo roa-roaku eꞌi?”
24 Nesonomo randoo etu, “Aku eꞌi ana i Betuel, ana i Nahor bo i Milka. 25 Ri sapo kami naria petoꞌo rapoturu komi, pade nadea woꞌu kada mpae bo panggoni binata.”
26 Nangepe etu, nekadedemo batua etu nombasomba i PUE. 27 Niulina, “Kutoiyamo i PUE, Alatala nu madikaku Abraham to namala raparasaya mompopokita towena ka madikaku. Iꞌa nombanini aku riara mpolumakoku sampe ri sapo sampesuwu-sampesuwu nu madikaku eꞌi!”
28 Naopu etu nangowamo randoo etu mpaka ri sapo indona lau nantesa pura-pura kajadia etu ka ira saongu njapo. 29-30 Naria sambaꞌa tuaka i Ribka to nosanga ka i Laban. Iꞌa nanggita jali onge bo gala ri pale ntuaꞌina pade nangepe nuapa to nitesa batua etu ka iꞌa paneꞌa. Jadi nangowamo iꞌa nggariara njapona nantomunaka batua Abraham etu to danekanggore ante unta-untana namosu buwu etu. 31 Pade nangulimo i Laban ka iꞌa, “Kamaimo komi to nigane i PUE! Neꞌe metoꞌo ri sawalikuna ri seꞌi. Kamaimo mpaka ri sapo kami. Nipakasadia kamimo tombi ka komi bo petoꞌo ka unta-unta komi.”
32 Jadi nalaumo batua Abraham nesua rara njapo ira. Laban nantaꞌuraka pangulaya nggari unta pade niwaina kada mpae bo panggoni ka binata-binata etu. Naopu etu nikenina ue raporama kada nu batua Abraham bo roa-roana nantuki ada ira.
33 Tempo nasadiamo panggoni, nangulimo batua etu, “Aku daꞌapa manggoni ane daꞌapa kutesa ruru tewai madikaku to nikeniku eꞌi.”
Nangulimo i Laban, “Ulimo patujumu etu.”
34 Pade nangulimo batua Abraham, “Aku eꞌi batua Abraham. 35 PUE mpuꞌu-mpuꞌu nombagane madikaku etu sampe iꞌa najadi nakalumana mpuꞌu. PUE nombawai ka iꞌa nadea bimba, towau, japi, unta, keledai bo woꞌu salaka, bulawa bo batua langgai bo besi. 36 Tempo umuru i Sara, rongo nu madikaku etu, neliu ntotomo katuꞌana iꞌa nangote sambaꞌa ngana langgai. Pade madikaku nombawai kakalumana etu majadi bagia nu anana etu. 37 Iꞌa nompakau aku nojanji mantuki parentana iweꞌi: ‘Neꞌe iko mompelisi rongo ka anaku nggari tatongo nu randoo ri Tana Kanaan to nipetoꞌoku eꞌi. 38 Tapi kalaumo ri jaꞌi sampesuwu nu umaku mangelo sambaꞌa rongo ka anaku nggari setu.’
39 Pade nekutanamo aku ka iꞌa, ‘Iwenu ane randoo etu daꞌa madota manjili ante aku?’
40 Pade nisonona, ‘PUE to nitukiku riara nggatuwuku kana mompakau malaekana mantulungi iko ala polumakomu etu maria aselena sampe iko mamala mombarata rongo ka anaku nggari tatongo nu sampesuwuku mboto, etumo nggari ri mbira umaku. 41 Ane iko malau mpaka ri jaꞌi sampesuwuku pade ira daꞌa madota mombawai randoo etu mantuki iko, makabasakamo iko nggari janjimu.’
42 Jadi tempo aku narata ri buwu paneꞌa aku nosambaya riara ntaꞌiku iweꞌi: PUE, Alatala to nisomba madikaku Abraham, kuperapi ane PUE madota, tulungimo aku ala maria asele nggari polumakoku eꞌi. 43 Aku nekanggore namosu buwu eꞌi. Kuperapi ala mamala majadi iweꞌi: ane aku motesa ka sambaꞌa randoo to marata mantombu ue, ‘Tulungi wai ka aku sakedi ue nggari gumbamu kuinu,’ 44 pade iꞌa mesono, ‘Inumo, bo unta-unta uma woꞌu kana kupopainu,’ kana kunjani iꞌamo to nipelisi i PUE majadi rongo ana nu madikaku. 45 Daꞌapa naopu aku nosambaya riara ntaꞌiku iwetu, naratamo i Ribka nanjumbuaka gumba ue. Nalaumo iꞌa mpaka ri buwu nantombu ue. Naopu etu nangulimo aku ka iꞌa, ‘Tulungi waimo uemu etu kuinu.’ 46 Kaliu-liu nitaꞌurakana gumba ue nggari wingana pade niulina, ‘Inumo, uma, pade unta-unta uma woꞌu ngina kupopainu.’ Jadi nanginumo aku, pade naopu etu unta-untaku woꞌu nipopainuna. 47 Naopu etu nekutanamo aku, ‘Iko ana isema?’
Nesonomo iꞌa, ‘Aku ana i Betuel, ana i Nahor bo i Milka.’
Pade aku nombadika saongu jali bulawa ri ongena bo rontonga gala ri palena. 48 Pade nekadedemo aku nombasomba bo nantoiya i PUE, Alatala to nisomba madikaku Abraham. Iꞌa nombanini aku ri jala to nakonona sampe aku namala nombarata makumpu nu sampesuwu madikaku mboto ka anana. 49 Jadi weꞌi-weꞌi ane komi masadia mompowia to nabelo bo nakono ri jaꞌi madikaku, ulimo ka aku. Pade ane daꞌa madota, uli woꞌu ka aku ala kunjani nuapa kupowia ngina.”
50 Nesonomo i Laban bo i Betuel, “Nanotomo to najadi eꞌi nggari jaꞌi PUE. Daꞌa mamala kami manguli etu najaꞌa atau nakono. 51 Etumo i Ribka. Kenimo iꞌa pade panjilimo. Agina iꞌa mantuki komi pade majadi rongo ana nu madikamu ewa to niuli PUE mboto.”
52 Nangepe pesono ira etu, nekadedemo batua Abraham etu nombasomba i PUE. 53 Pade nisuwurakanamo pakea, ramba salaka bo bulawa niwaina pura ka i Ribka. Pade niwaina woꞌu ka tuakana bo indona hadia to nasuli mpuꞌu olina. 54 Naopu etu batua Abraham bo roa-roana nanggoni bo nanginu pade noturu sambengi ri setu.
Naeo mpadondona nembangumo ira, pade nangulimo batua etu, “Moparamisimo kami manjili mpaka ri jaꞌi madikaku.”
55 Tapi nangulimo tuaka bo indo i Ribka, “Palambamo iꞌa maroo ri seꞌi kamba sampulu mbengipa, pade naopu etu mamalamo iꞌa malau.”
56 Tapi nangulimo batua etu, “Neꞌe mutaꞌamaka aku. PUE nantulungi aku sampe nariamo asele nggari polumakoku eꞌi. Palogamo aku manjili mpaka ri jaꞌi madikaku.”
57 Nesonomo ira, “Kamaimo kita mompokio i Ribka pade mompekutana iꞌa.” 58 Jadi nipokio ira i Ribka, pade nipekutana ira, “Madota iko mantuki tau eꞌi?”
Nesonomo randoo etu, “Iyo, aku madota.”
59 Jadi ira nompaloga tuaꞌi ira i Ribka bo batuana malau mantuki batua Abraham bo roa-roana. 60 Ira nombagane i Ribka iweꞌi:
“Tuaꞌi kami, perapi iko majadi indo nu juta-juta tau.
Perapi mulimu mombadagi ngata-ngata nu bali ira.”
61 Naopu etu nompasiayumo i Ribka bo batua-batuana besi, pade nesawi untamo ira nalau mpasanggani-nggani ante batua Abraham etu.
62 Tempo ira dariara mpolumako ira, Ishak narata nggari karawa baina noliu namosu buwu to nosanga ka Buwu Lahai Roib sabana iꞌa netoꞌo ri bagia puluna Tana Kanaan. 63 Naria saeo iꞌa nesuwu nggari tendana nalau nenjayo-njayo ri pampa tempo ngguwiana. Ri setu nikitana naria unta-unta narata. 64 Tempo i Ribka nanggita Ishak, nanaꞌumo iꞌa nggari untana, 65 pade nipekutanana ka batua Abraham etu, “Isema langgai ri pampa etu nomai mantomunaka kita?”
Nesono batua etu, “Iꞌa etu madikaku.” Jadi i Ribka nangala ruyuna nombatutu lenjena.