Tesa kamate Sara
23
Sara natuwu sampe naganamo umuruna satu rompulu bo pitumpae kasaena. 2 Pade namatemo iꞌa ri ngata Kiryat-Arba, to nosanga woꞌu ngata Hebron, ri Tana Kanaan. Nabuku mpuꞌu rara Abraham nantangi rongona to namate etu.3 Naliu etu nipalasi Abrahammo watabaku rongona lau notesa ka tau to Het, pue ngata etu. Niulina ka ira, 4 “Aku eꞌi tau topesowo ri tana komi eꞌi. Waimo aku mangoli sabagia tana ri seꞌi rapodayo ala aku mamala mombatana rongoku.”
5 Nesonomo to Het ka Abraham, 6 “Tua, epemo tesa kami eꞌi. Komi sambaꞌa tadulako to naroso to nombasowo ri tana kami eꞌi. Jadi tanamo rongomu riara dayo kami to neliu nggabelona. Kami pura-pura nadamba mompakasadia dayo rapombatana rongomu to namate etu.”
7 Pade nekadedemo Abraham ri ngayo ira to Het. 8 Niulina ka ira, “Ane komi mompaloga aku mombatana rongoku ri seꞌi, tulungi perapi ka Efron, ana langgai i Zohar, 9 ala iꞌa mompobalu ka aku Bololia Makhpela to naria ri tampa nu pampana. Perapi ala bololia etu rapobaluna ka aku. Aku mombabayari oli to nagana ala tana etu majadi tanaku mboto rapodayo ri tatongo komi ri seꞌi.”
10 Tempo etu Efron mboto naria nekatoko ri tatongo to Het ri bobaa bete nu ngata etu. Jadi nesonomo iꞌa ka Abraham riara mpangepe nto Het to naria ri setu, 11 “Tua to nibila, neꞌe iwetu. Epemo tesaku eꞌi. Pampa bo bololia to naria ri setu kuwai ka komi ri ngayo ntodeaku eꞌi ala komi mamala mombatana rongomu.”
12 Nangepe etu, nekadede woꞌumo Abraham ri ngayo tau-tau to Het etu, 13 pade niulina ka Efron ri ngayo ira pura-pura, “Tulungi epemo tesaku. Aku madota mangoli njumaongu tana etu. Kuperapi tarimamo doina ala aku mamala mombatana rongoku ri setu.”
14 Nesonomo Efron, 15 “Tua to nibila, epemo tesaku eꞌi. Oli nu tana etu aga patakilo santongo salaka.a Tapi etu daꞌa paraluu rapekirita. Tanamo rongomu ri setu.”
16 Nangepe etu nasitujumo Abraham ante olina etu. Nibilana kadea doi salaka to niuli Efron ri ngayo tau-tau to Het ri setu, etumo patakilo santongo salaka nantuki potimba to nipake ntopodaga tempo etu. Pade niwaina doi etu ka Efron.
17 Jadi iwetu sampe pampa Efron to naria ri Makhpela ri sabingga kamataeona nggari Mamre najadi bagia Abraham, nabeloka pampa, nabeloka bololia to naria ri setu, nabeloka pura-pura kayu to natuwu ri tana etu. 18 Ri ngayo pura-pura to Het to nasiromu ri bobaa bete nu ngata etu, tana etu nipakatantu majadi tana Abraham. 19 Naopu etu Abraham nombatana watabaku rongona i Sara riara bololia ri pampa Makhpela to naria ri sabingga kamataeona nggari Mamre, etumo ri ngata Hebron ri Tana Kanaan. 20 Iwetu sampe pampa ante bololia to naria riarana nipobalu nto Het ka Abraham majadi tana rapodayo.