Pomparasaya Abraham niuji
22
Bara sakuya tempo kaliuna Alatala nombauji pomparasaya Abraham. Niulina, “Abraham!”Nesonomo Abraham, “Iyo, Pue!”
2 Nangulimo Alatala, “Kenimo Ishak, anamu sambaꞌa lau to nipotowemu, malau mpaka ri Tana Moria. Pade ri saongu bulu to kutujuraka ka iko ri setu, sambalemo pade palabumo iꞌa majadi pesomba ka Aku.”
3 To nailena dabobayana nembangumo Abraham pade nipatakana polampi keledaina pade nikenina rombaꞌa batua bo anana Ishak lau nekayu. Tempo naganamo kayu nibinggana rapompalabu pesomba, nanggaliwomo ira malau mpaka ri bulu to nipakatantu Alatala ka iꞌa etu. 4 Ri eo katolueona Abraham nantongoaka nikitana bulu etu nggawao. 5 Pade nangulimo iꞌa ka batuana rombaꞌa etu, “Maboli ri seꞌimo ruru komi ante keledai eꞌi. Aku bo anaku eꞌi malau ri saꞌa mombasomba i Pue, pade ngina kami manjili ri jaꞌimu ri seꞌi.” 6 Naopu etu nialana kayu rapompalabu pesomba nidikana ri winga Ishak. Pade iꞌa mboto nanggeni ladi bo ruti nu apu rapotunju kayu etu pade napolamo ira rombaꞌa. 7 Tempo ira nolumako mpasanggani-nggani etu, nangulimo Ishak, “Yuma!”
Nesonomo Abraham, “Nuapa, anaku?”
Nekutanamo Ishak, “Kita eꞌi nanggeni apu bo kayu. Tapi ri umbamo ana bimba to rasambale pade rapalabu majadi pesombata?”
8 Nesonomo Abraham, “Anaku, Alatala mboto ngina mompakasadia ana bimba etu.” Pade napolamo ira mpasanggani-nggani.
9 Naratamo ira ri bulu to nipakatantu Alatala ka Abraham. Ri setu Abraham nompowia saongu petoꞌo mpesomba, pade nipasiayuna kayu apu ri bungguna. Naopu etu nitipunggunamo anana pade nipopotumbolena ri bunggu kayu apu etu. 10 Naopu etu nialanamo ladina ala manjambale anana etu. 11 Tapi nongaremo malaeka i PUE nggari langi ka iꞌa, “Abraham! Abraham!”
Nesonomo iꞌa, “Iyo, Pue!”
12 Nangulimo malaeka etu, “Neꞌe mupatesi anamu etu, neꞌe mukuya-kuya iꞌa! Weꞌi-weꞌi ninjanikumo iko nekou ri jaꞌiku, sabana iko daꞌa nakaja raramu mombawai anamu sambaꞌa lau etu ka Aku.”
13 Nangepe etu Abraham neili pade nikitana ri talikuna saongu bimba pomawa tanduna natekaꞌi ri gumbu. Nalaumo iꞌa nangala bimba etu pade nisambalena nipalabuna najadi pesomba manjambei anana. 14 Naopu etu nipoposangana petoꞌo etu, “PUE mompakasadia.” Jadi sampe weꞌi-weꞌi tau nanguli, “Ri bunggu bulu i PUE, kana rapakasadia nuapa to niparaluuta.”
15 Pade nongare woꞌumo malaeka i PUE karongganina nggari langi ka Abraham, 16-17 “Iweꞌimo panguli i PUE: Iko nantuki parentaku bo daꞌa nakaja raramu mombawai anamu sambaꞌa lau ka Aku. Sabana etu Aku nojanji ante sangaku mboto, Aku kana mpuꞌu-mpuꞌu mombagane iko pade mompakadea mulimu nasimbayu ewa betuꞌe ri langi bo bone ri wiwi ntasi. Pade mulimu etu kana mombadagi pura-pura bali ira sampe metoꞌo ri ngata-ngata ira. 18 Pade nggari mulimu banepia pura-pura tau ri dunia kana mombarata rasi nggari jaꞌiku, sabana iko nantuki parentaku.”
19 Naopu etu nanjilimo Abraham ntaliana mpaka ri jaꞌi batuana rombaꞌa, pade nanjilimo ira mpasanggani-nggani mpaka ri Bersyeba. Pade naroomo iꞌa ri setu.
Muli Nahor
20 Naopu etu Abraham nangepe lele iweꞌi: “Milka rongo ntuakamu i Nahor woꞌu noanamo. Nipoanana ngana langgai, etumo 21 Us, to ulumbua, i Bus tuaꞌina, i Kemuel (to najadi uma Aram), 22 i Kesed, i Hazo, i Pildash, Yidlaf bo i Betuel.” 23 Kaopuna i Betuel najadi uma i Ribka. Walumbaꞌa ngana etu nipoanaka i Milka ka i Nahor, tuaka Abraham. 24 Naria woꞌu rongo piara i Nahor to nosanga ka i Reuma. Iꞌa woꞌu noana, etumo i Tebah, i Gaham, i Tahash bo i Maakha.