Tesa pesuwu Ishak
21
PUE nombagane i Sara ewa niulina bopia, pade nipakadupanamo ka i Sara nuapa to nijanjina. 2 Natianamo i Sara pade niotena sambaꞌa ngana langgai ka Abraham tempo Abraham natuꞌamo, etumo ri tempo to nipakatantu Alatala ka iꞌa. 3 Ngana to niote i Sara etu nipoposanga Abraham Ishak.a 4 Tempona Ishak noumuru walu mbengi Abraham nombasuna iꞌa nantuki parenta Alatala ka iꞌa bopia.b 5 Umuru Abraham satu mpaemo tempo Ishak niote.6 Nangulimo i Sara, “Alatala nompowia aku nongiri ante nadamba rara. Pade pura-pura tau to mangepe kajadia eꞌi kana mongiri mpasanggani-nggani ante aku. 7 Bopia isema mamala manguli ka rongoku, ‘Sara kana mompatomi ngana?’ Tapi kitamo, aku nangote sambaꞌa ngana langgai ka Abraham tempo iꞌa natuꞌamo!”
Hagar bo Ismael nipopalai
8 Ishak nantambai eona nantambai nabete. Pade tempo iꞌa nombalewa susumo Abraham nompowia susa bete. 9 Tempo etu Ismael, ana to nipoanaka i Hagar to Masir ka Abraham, nompomore-more Ishak ana i Sara. 10 Nanggita etu nangulimo i Sara ka rongona Abraham, “Popalaimo besi etu mosanggani-nggani ante anana, sabana ana nu batuaku etu daꞌa ntoto mombarata bagia nggari kakalumanamu mpasanggani-nggani ante anaku Ishak!”
11 Tesa etu nompakasusa rara Abraham, sabana Ismael anana woꞌu. 12 Tapi nangulimo Alatala ka Abraham iweꞌi: “Neꞌe masusa raramu mompekiri anamu bo batuamu etu. Tukimo dota i Sara, sabana nggari Ishakmo iko mombarata muli to nijanjiku etu. 13 Tapi kana kuwai ka ana i Hagar etu madea mulina sampe ira woꞌu majadi ngata bete, sabana iꞌa woꞌu anamu.”
14 Naeo mpadondona, nembangumo Abraham pade nialana panggoni bo pomboli ue nipowia nggari kulimba niwaina ka i Hagar rapobakuna ri jala. Nitulungina i Hagar nanjumbuaka panggoni etu pade nipakauna i Hagar ntaliana malai. Pade nanggaliwomo i Hagar lau nenjayo-njayo ri karawa baina namosu Bersyeba. 15 Tempo naotimo ue to nipobaku ira etu i Hagar nombaboli anana ri wayo gumbu, 16 pade nalaimo iꞌa nekatoko nakawao sakedi, kira-kira satu metere kakawaona. Niulina riara ntaꞌina, “Daꞌa kupakule mantaꞌamaka raraku manggita anaku mamate.” Tempo iꞌa nekatoko ri setu nompamulamo iꞌa nageo.
17 Alatala nangepe tangi nu ngana etu nageo. Jadi notesamo sambaꞌa malaeka Alatala ka i Hagar nggari suruga, “Nokuya iko, Hagar? Neꞌe maeka, sabana niepe Alatalamo suara anamu nggari petoꞌona ria. 18 Pembangumo! Kau bangumo ngana etu pade tanaramo iꞌa. Sabana Aku kana mompajadi mulina pue ngata to nabetena banepia.”
19 Naopu etu Alatala nombabuka mata i Hagar sampe nanoto nikitana saongu buwu ri setu. Nanggita etu nalaumo i Hagar nantombu ue ri pomboli uena pade niwaina ka anana niinuna.
20 Alatala nomporoa Ismael sampe nabete. Sangga nabetepa naroomo iꞌa ri karawa baina ri Bagia Paran. Pade iꞌa najadi sambaꞌa topopana to napandena. 21 Tempo iꞌa netoꞌo ri karawa Paran, indona nangelo ka iꞌa sambaꞌa besi to Masir raporongona.
Pojanji Abraham ante Abimelekh
22 Tempo etu Magau Abimelekh bo i Pikhol, tadulako tantarana narata ri jaꞌi Abraham pade nanguli, “Alatala nosanggani-nggani ante komi riara mpengaya-ngaya to mupowia. 23 Sabana etu janjimo ka aku ri seꞌi ri ngayo Alatala, komi daꞌa mowia to nadenggona ri jaꞌiku atau ri jaꞌi ana-anaku bara muliku. Nasimbayu ewa aku nosimpobelo rara ante komi, powiamo iwetu woꞌu ante aku bo ngata to nipetoꞌomu eꞌi.”
24 Nangulimo Abraham, “Aku nojanji.”
25 Naopu etu Abraham nompakasala Abimelekh ewa saongu buwu to niago batua-batua magau etu. 26 Nesonomo Abimelekh, “Daꞌa ninjaniku isema to nompowiana. Daꞌapa naria komi nanguli ka aku, dako sanggani eꞌi ntoto aku nangepe anu etu.”
27 Naopu etu Abraham nanggeni bara sakuya ongu bimba bo japi niwaina ka Abimelekh, pade ira rombaꞌa nompowia pojanji. 28 Abraham nompatani pituongu ana bimba besina nggari roa bimbana. 29 Pade nekutanamo Abimelekh ka iꞌa, “Rapokuya pituongu ana bimba etu?”
30 Nesonomo Abraham, “Tarimamo pituongu ana bimba eꞌi majadi tandaina to nompakatantu akumo topokae buwu eꞌi.” 31 Jadi etu sampe petoꞌo etu nipoposanga ka Bersyeba,c sabana ri setumo ira rombaꞌa nojanji.