Tesa Abraham bo Abimelekh
20
Naopu etu nolinjamo Abraham nggari Mamre mpaka ri bagia puluna Tana Kanaan pade naroo ri bagia ri olo ngata Kadesh bo Syur. Naliu etu iꞌa netoꞌo ri ngata Gerar. 2 Ri ngata etu Abraham nanguli ka tau i Sara tuaꞌina. Jadi Abimelekh, magau nto Gerar, nompakau tau lau manggeni i Sara ka iꞌa ala iꞌa mamala raporongona.3 Tapi naria sambengi Alatala nompopokita korona ka Abimelekh riara mpangipina pade nanguli, “Iko kana mamate sabana besi to nialamu etu rongo ntaumo.”
4 Tapi Abimelekh daꞌapa nosampaturu ante i Sara. Jadi niulina, “Pue, Komi mompatesi aku ante todeaku to daꞌa nasala? 5 Abraham mboto nanguli ka aku besi etu tuaꞌina, bo besi etu woꞌu nanguli Abraham tuakana! Aku nowia anu etu ante rara to nagasa. Aku daꞌa nasala!”
6 Pade nesonomo Alatala riara mpangipi magau etu, “Nakono. Ninjanikumo iko nowia etu ante rara to nagasa. Sabana etu Aku nombalawa iko mowia silaka ri ngayoku. Etu sampe Aku daꞌa nompalamba iko mantui besi etu. 7 Jadi weꞌi-weꞌi popanjilimo iꞌa ka rongona, sabana rongona sambaꞌa nabi. Pade iꞌa kana momposambaya iko ala iko daꞌa mamate. Tapi ane iko daꞌa mompopanjili iꞌa, natantumo iko bo njumaongu todeamu kana mamate sanggani!”
8 To naile mpadondona Abimelekh nompokio pura-pura pangga betena pade nitesana ka ira nuapa to najadi etu. Nangepe tesa etu naeka puramo ira. 9 Naopu etu Abimelekh nompokio Abraham pade niulina ka iꞌa, “Nokuya bo nipowiamu iweꞌi ka kami? Nuapa salaku ante komi sampe komi nompakarata silaka eꞌi ri jaꞌiku bo todeaku? Mpuꞌu-mpuꞌu komi nowia ka kami anu daꞌa masipato rapowia! 10 Nuapa patuju komi nowia iwetu?”
11 Nesonomo Abraham, “Nipekiriku daꞌa ria tau ri ngata eꞌi to naeka ka Alatala. Naekamo aku rapatesi ntau to madota mangala rongoku. 12 Pade rongoku etu kakonona tuaꞌiku, ana nu umaku, tapi mbau ntanina indo. Tapi kaopuna iꞌa najadi rongoku. 13 Tempo Alatala nompakau aku nompalasi sapo nu umaku nombasowo ri tana tau ntanina niuliku ka rongoku etu iweꞌi: ‘Popokitamo towemu ka aku, etumo ri umba-umba rakalauta, ulimo aku tuakamu.’ ”
14 Naopu etu Abimelekh nombawai ka Abraham bimba, japi, batua langgai bo batua besi, pade nipopanjilina i Sara ka iꞌa. 15 Pade niulina ka iꞌa, “Eꞌimo njumaongu tanaku. Karoomo ri umba-umba mupodota.”
16 Pade niulina woꞌu ka i Sara, “Niwaikumo ka tuakamu sanjobu mpeka doi salaka ala majadi tandaina ka pura-pura tau to nosanggani-nggani ante iko daꞌa ntoto ria salamu.”
17-18 Naopu i Sara niala Abimelekh i PUE nompakagampa pura-pura besi riara njapo Magau Abimelekh sabana nuapa to najadi ante i Sara rongo Abraham. Jadi nosambayamo Abraham ka Alatala, pade Alatala nompakabelo Abimelekh njamboko bo batua-batuana besi, sampe besi-besi etu namala moana bali.