Alatala nombasili pojanjina mombawai sambaꞌa ngana langgai ka Abraham
18
Naopu etu i PUE nompopokita korona ka Abraham namosu kayu bete ri Mamre. Tempo etu Abraham nekatoko nangosaraka ri pewobo tendana sabana napanemo eo. 2 Tempo iꞌa nantongoaka nikitana tolumbaꞌa tau nenggore ri setu. Nanggita ira nangowamo iꞌa mantomunaka ira etu. Notimbakotumo iꞌa sampe ri tana, 3 pade niulina ka ira, “Tua, ane aku nikonoa komi, pesaimo ruru, neꞌe raliunaka tendaku eꞌi. 4 Pekatokomo mangosaraka ri wayo kayu eꞌi. Batuaku kana mangala ue sakedi rapombarama kada komi. 5 Kupakasadia panggoni sakedi ka komi ala komi maroso bali mompapola polumako komi, sabana aku eꞌi nibila ante karata komi ri jaꞌiku.”Nesonomo ira, “Iyo. Powiamo nuapa to niulimu etu.”
6 Jadi nompari-mparimo Abraham nesua mpaka riara tendana pade niulina ka i Sara, “Masalisa sakedi alamo sabatutu labu gando to nabelona, pade powiamo roti.” 7 Naopu etu nalaumo Abraham mpaka ri petoꞌo pompatuwuna. Nipelisina saongu ana japi to naboyana to nalulu bo nabelo isina, pade niwaina ka sambaꞌa batua. Pade batua etu nasalisa nomporiapu bau etu. 8 Naopu etu Abraham nangala susu, susu naoko bo bau japi to niporiapu etu, pade niwainamo ka toratana. Tempo ira nanggoni iꞌa mboto nombatande ira ri wayo nu kayu bete etu.
9 Nekutanamo torata ka iꞌa, “Ri umbamo rongomu i Sara?”
Nesonomo iꞌa, “Ria, riara tenda.”
10 Pade nangulimo i PUE, “Natantumo mpae marata Aku kana manjili bali manggita komi, pade daꞌapa aku marata rongomu i Sara kana moana sambaꞌa ngana langgai.”
Tempo etu i Sara nompetalinga nggari pewobo nu tendana ri taliku ntorata etu. 11 Abraham bo i Sara natuꞌa ntotomo, pade Sara mana nirata nu wulana. 12 Jadi sangga nangepe tesa paneꞌa nongirimo i Sara, pade niulina riara ntaꞌina, “Aku eꞌi natuꞌamo bo rongoku woꞌu natuꞌa. Dakupakulepa moana?”
13 Pade nangulimo i PUE ka Abraham, “Nokuya i Sara nongiri bo nanguli, ‘Natuꞌamo aku. Dakupakulepa moana?’ 14 Daꞌa naria anu daꞌa majadi ane Aku madota! Mpae marata ri tempo to nipakatantuku Aku kana manjili bali manggita komi, pade daꞌapa aku marata i Sara kana moana sambaꞌa ngana langgai.” 15 Nangepe tesa i PUE etu naekamo rara i Sara, jadi iꞌa nesapu iweꞌi: “Aku daꞌa nongiri.”
Tapi nesonomo i PUE, “Daꞌa nakono! Iko nongiri mami paneꞌa.”
Abraham nerapi kabelo rara i PUE manggita pue ngata Sodom
16 Naopu etu nanggaliwomo torata etu nikeni Abraham. Tempo nolumako ira nompetiro ngata Sodom. 17 Pade notesamo i PUE riara ntaꞌina, “Daꞌa kutabuniaka ka Abraham nuapa kupowia. 18 Sabana mulina kana majadi pue ngata to nabetena, pade nggari mulina banepia pura-pura manusia ri dunia kana mombarata rasi nggari jaꞌiku. 19 Iꞌamo to nipelisiku ala iꞌa mompatuduki anana bo mulina mantuki jalaku, etumo mompowia to nakono bo nanoa. Ante iwetu nuapa to nijanjiku ka iꞌa bopia kana kupakadupa.” 20 Jadi naopu etu nanguli woꞌumo i PUE ka Abraham, “Natomo mpuꞌu pepangadu ri jaꞌi pue ngata Sodom bo Gomora, pade najaꞌa mpuꞌumo silaka ira. 21 Sabana etu Aku kana motua mpaka gusaꞌa momparesa ala manggita ane pepangadu to niepeku nakono bara daꞌa.”
22 Naopu etu napolamo rombaꞌa torata etu mpaka ri ngata Sodom, tapi i PUE naboli ante Abraham. 23 Abraham nompakamosu i PUE pade nekutana, “Iwenumo, PUE? Nakono Komi madota mompakaropu tau-tau to nanoa mosanggani-nggani ante tau to najaꞌa ri setu? 24 Iwenu ane maria limampulu mbaꞌa tau to nanoa riara ngata etu? PUE mpuꞌu-mpuꞌu mompakaropu pura-pura tau ri ngata etu? Daꞌa madota Komi mombaampungi pue ngata etu ala limampulu mbaꞌa tau nanoa etu masalama? 25 Neꞌe sampe tau-tau nanoa etu rapatesi mpasanggani-nggani ante tau-tau najaꞌa! Neꞌe, PUE! Komi Topotangara dunia! Komi kana manoa!”
26 Nesonomo i PUE, “Ane Aku mombarata limampulu mbaꞌa tau to nanoa ri ngata Sodom, Aku daꞌa mompakaropu ngata etu sabana ira.”
27 Pade nanguli woꞌumo Abraham, “Aku mpuꞌu-mpuꞌu netibia motesa ka i Pue, naupa aku eꞌi aga manusia biasa. 28 Tapi ane rapana maria aga patampulu bo limambaꞌa tau to nanoa, daꞌa limampulu. Komi damompakaropu njumaongu ngata etu sabana nakura limambaꞌa tau nanoa?”
Nesonomo i PUE, “Ngata etu daꞌa kupakaropu ane kurata patampulu bo limambaꞌa tau to nanoa.”
29 Pade nanguli woꞌumo Abraham, “Iwenu ane aga maria patampulu mbaꞌa tau nanoa?”
Nesonomo i PUE, “Ane maria patampulu mbaꞌa tau nanoa Aku daꞌa mompakaropu ngata etu.”
30 Pade nanguli woꞌumo Abraham, “Neꞌe marau, Pue, ane aku motesa woꞌumo. Iwenu ane aga maria tolumpulu mbaꞌa tau nanoa ri setu?”
Nesonomo i PUE, “Ane maria tolumpulu mbaꞌa Aku daꞌa mompakaropu ngata etu.”
31 Nanguli woꞌumo Abraham, “Aku mpuꞌu-mpuꞌu netibia motesa ka i Pue. Rapana aga maria rompulu mbaꞌa?”
Nesonomo i PUE, “Ane kurata rompulu mbaꞌa ngata etu daꞌa kupakaropu.”
32 Kaopuna nanguli woꞌumo Abraham, “Neꞌe marau, Pue, aku kana motesa sangganipa. Iwenu ane rapana aga maria sampulu mbaꞌa?”