Ada mposuna najadi tandai pojanji Alatala ante Abram
17
Tempo Abram noumuru siompulu bo siompae, i PUE nompopokita korona ka iꞌa pade nanguli, “Akumo Alatala to Neliu Nggakuasa. Tukimo parentaku pade tunggai mowia dotaku. 2 Aku kana mowia pojanji ante iko pade mombawai ka iko muli madea-dea.”3 Nangepe etu notimbakotumo Abram sampe ri tana. Pade nangulimo Alatala ka iꞌa, 4 “Iweꞌimo pojanji to kupowia ante iko. Aku mojanji iko kana majadi uma ntodea ri mpengele-ngele ngata. 5 Sabana etu sangamu manamo Abram,a tapi weꞌi-weꞌi sangamu kubali majadi Abraham,b sabana nipakatantukumo iko kana majadi uma ntodea ri umba-umba ri dunia. 6 Aku kana mompakadea-dea mulimu. Mulimu kana iwetu kadeana sampe ira majadi ngata-ngata bete. Pade nggari tatongo ira kana maria to majadi magau. 7 Aku kana mowia pojanji ante iko bo mulimu sampe ri ntapi-ntapina, pade pojanjiku etu daꞌa malipo sampe ri kasae-saena. Aku kana majadi Alatalamu bo Alatala nu mulimu. 8 Aku kana mombawai ka iko pade ka ira woꞌu tana eꞌi to nipetoꞌomu weꞌi-weꞌi ewa topesowo. Njumaongu Tana Kanaan eꞌi kana majadi bagia mulimu sampe ri kasae-saena, pade Aku kana majadi Alatala ira.”
9 Naopu etu nanguli woꞌumo Alatala ka Abraham, “Iko kana maroo manjoko pojanji eꞌi, nabeloka iko, nabeloka mulimu. 10 Iweꞌimo to masipato mupowia bo masipato rapowia mulimu woꞌu: butu mbaꞌa langgai nggari tatongo komi kana rasuna. 11 Kuli nu utimu kana rasuna, pade etumo to majadi tandaina pojanjiku ante komi. 12 Nompamula weꞌi-weꞌi sampe ri mulimu ntapi-ntapina, butu mbaꞌa ngana langgai kana rasuna tempo noumuru walumbengi, nabeloka ira to raote ri sapomu, nabeloka batua to niolimu nggari tau ntanina to daꞌa nawela sampesuwumu. 13 Ira to niote ri sapomu bo batua to muoli nggari tau ntanina kana rasuna, pade etu majadi tandaina ri koromu to mompakanoto pojanjiku ante iko etu daꞌa malipo sampe ri kasae-saena. 14 Ane maria langgai daꞌa nisuna iꞌa mana rareke sambaꞌa nggari todeaku, sabana iꞌa daꞌa nantuki pojanjiku etu.”
15 Pade niuli Alatala woꞌumo ka Abraham, “Rongomu i Sarai mana mupokio iꞌa Sarai. Nompamula weꞌi-weꞌi sangana i Sara. 16 Aku kana mombagane iꞌa pade iꞌa kana mangote sambaꞌa ngana langgai ka iko. Aku mboto kana mombagane iꞌa sampe iꞌa majadi indo ntodea ngata-ngata bete. Pade nggari mulina banepia kana maria to majadi magau.”
17 Nangepe etu notimbakotumo Abraham sampe ri tana. Tapi iꞌa nongiri pade nompekiri riara ntaꞌina iweꞌi: “Iwenumo langgai to noumuru satu mpae damombarata ngana? Iwenu sampe i Sara mamala moana tempo umuruna siompulu mpaemo?” 18 Naopu etu nangulimo iꞌa ka Alatala, “Agina Ismaelmo to rawai ka rasimu etu.”
19 Tapi nangulimo i PUE, “Daꞌa. Rongomu i Sara kana mangote sambaꞌa ngana langgai pade iꞌa kana mupoposanga Ishak.c Aku kana mowia pojanji ante iꞌa bo mulina sampe ri kasae-saena. 20 Niepekumo pomperapimu nosinggawela ante anamu Ismael. Jadi iꞌa woꞌu kana kugane pade kuwai ka iꞌa mulina madea-dea. Iꞌa kana majadi totuꞌa nu sampulu rombaꞌa magau. Pade mulina woꞌu kana kupajadi ngata-ngata to nabetena. 21 Tapi pojanjiku kana kupowia ante Ishak, anamu to raote i Sara mpae marata kira-kira tempo ewa iweꞌi woꞌu.” 22 Sangga naopu notesa iwetu nipalasi Alatalamo Abraham.
23 Ri eo etu woꞌu Abraham nompokio anana Ismael bo pura-pura langgai to najadi ananjapona, nabeloka langgai to niote riara njapona, nabeloka batua to niolina. Ira pura-pura nisunana nantuki tesa nggari jaꞌi Alatala ka iꞌa. 24 Tempo etu Abraham noumuru siompulu bo siompae, 25 pade anana Ismael noumuru sampulu tolumpaemo. 26 Ira rombaꞌa nisuna mpasanggani eo etu 27 nosanggani-nggani ante pura-pura langgai to najadi ananjapona, nabeloka ira to niote riara njapona, nabeloka batua to niolina nggari tau ntanina.