Tesa Hagar bo Ismael
16
Sarai, rongo Abram, nagampamo. Tapi naria sambaꞌa batuana nggari Tana Masir to nosanga ka i Hagar. 2 Jadi nangulimo i Sarai ka Abram, “PUE daꞌa nombawai aku eꞌi moana. Sabana etu nabelopa iko mosampaturu ante batuaku eꞌi. Bara iꞌa mamala mangote ngana ka aku.” Abram nasituju ante pombarata i Sarai etu. 3 Jadi i Sarai nombawai batuana i Hagar ka Abram majadi rongo piarana. Tempo etu nagana sampulu mpaemo Abram netoꞌo ri Tana Kanaan. 4 Jadi nosampaturumo Abram ante i Hagar, pade natianamo besi etu.Tempo ninjani i Hagar iꞌa natianamo, nompamulamo iꞌa nanjauru i Sarai etu. 5 Jadi nangulimo i Sarai ka Abram, “Kasusa rara to nirasaiku weꞌi-weꞌi nggari salamu! Aku nombawai batuaku eꞌi ka iko. Tapi iwetu ninjanina iꞌa natianamo, mana nibilana aku eꞌi. Perapi i PUE mombatangara parakarata eꞌi!”
6 Nesonomo Abram, “Ikomo to nakuasa riara nggatuwu batuamu etu. Powiamo iꞌa umba dotamu.” Nangepe tesa Abram etu, i Sarai nompandasa i Hagar sampe kaopuna i Hagar nangowa nalai nggari setu.
7 Naopu etu malaeka i PUE nombarata i Hagar namosu saongu mata ue ri karawa baina ri jala mpaka ri ngata Syur. 8 Nangulimo malaeka etu, “Hagar, batua i Sarai, nggari umbamo iko? Mpaka ri umba iko?”
Nesonomo i Hagar, “Aku nangowa nalai nggari jaꞌi madikaku i Sarai.”
9 Pade nangulimo malaeka etu, “Panjilimo iko pade pekoumo ri jaꞌina. 10 Aku kana mompakadea mulimu sampe daꞌa ria sambaꞌa tau mamala mombabila ira. 11 Mana masae woꞌu iko kana mangote sambaꞌa ngana langgai. Poposangamo iꞌa Ismael,a sabana i PUE nangepe iwenu iko nipandasa. 12 Tapi anamu etu kana moinggu nasimbayu ewa keledai naila, iꞌa kana mangewa pura-pura tau pade pura-pura tau kana mangewa iꞌa. Iꞌa kana matuwu mosimpogaꞌa nggari sampesuwuna.”
13 Naopu etu nangulimo i Hagar ka i PUE to notesa ka iꞌa, “Komimo El-Roi,b sabana ri seꞌimo aku nanggita Alatala to nanggita aku.” 14 Etumo sabana buwu ri setu niuli ntau “Buwu Lahai-Roi.”c Pade buwu etu danaria ri olo ngata Kadesh bo ngata Bered.