Pojanji Alatala ante Abram
15
Naopu etu notesamo i PUE ka Abram riara mpanggitana. Niulina, “Abram, neꞌe maeka. Aku kana manggalendu iko bo mombawai ka iko rasi nadea.”2 Tapi nesonomo Abram, “PUE to Neliu Nggalanga, nuapa gunana Komi mombawai rasi ka aku? Sabana daꞌa ria anaku, pade ane aku mamate, to mantarima kakalumanaku aga batuaku Eliezer to Damsyik etu. 3 Komi daꞌa nombawai ka aku ngana, jadi aga sambaꞌa batuaku to mantarima kakalumanaku banepia.”
4 Tapi nangulimo i PUE ka Abram iweꞌi: “Daꞌa batuamu etu to mantarima kakalumanamu banepia, tapi ana otemu mboto, iꞌamo to mantarima kakalumanamu.” 5 Naopu etu nikenina Abram mpaka ri sawalikuna pade niulina ka iꞌa, “Tingoamo langi, pesoba mombabila betuꞌe-betuꞌe ane iko mompakule. Iwetumo kadea nu mulimu banepia.”
6 Naopu etu Abram nomparasaya tesa i PUE, pade nggari pomparasayana etu iꞌa nireke i PUE tau nanoa.
7 Nanguli woꞌumo i PUE ka iꞌa, “Akumo i PUE to nanggeni iko nesuwu nggari ngata Ur ri Tana Babilonia ala mombawai tana eꞌi ka iko majadi bagiamu.”
8 Tapi nekutanamo Abram, “PUE to Neliu Nggalanga, iwenu kunjani tana eꞌi majadi bagiaku?”
9 Nesonomo i PUE, “Keni ka Akumo saongu japi tinana, saongu towau tinana, bo saongu bimba tuamana simbau noumuru tolumpae. Pade keni woꞌu sambaꞌa tonji togou bo sambaꞌa tonji banggebodo.” 10 Jadi Abram nanggeni binata-binata etu puramo ka i PUE. Japi, towau bo bimba etu saongu-saongu nisampana najadi robingga, pade sabingga-sabingga bau etu nibolina nipoposintingayona rojijiri. Aga tonji-tonji etu daꞌa nisampana. 11 Naratamo tonji-tonji to nanggoni bau matepudu netuꞌu ri setu. Tapi ira pura-pura nipopalai Abram.
12 Tempo eo nasolomo Abram naturu nalumpi. Pade iꞌa nibungu nu rumau mpii to mpuꞌu-mpuꞌu nompakawiora rarana. 13 Pade nangulimo i PUE ka iꞌa, “Natantumo mulimu kana mombasowo tau ri ngata ntanina. Ira kana rapajadi batua ri setu pade rapandasa patatu mpae kasaena. 14 Tapi tau-tau to mompandasa ira kana kusuku. Pade tempo mulimu mesuwu nggari ngata etu ira kana manggeni madea kakalumana nggari setu. 15 Tapi iko mboto kana mamate masana tempo moumuru masae pade ratana ri dayo. 16 Tapi mulimu kapatantapina kana manjili bali ri seꞌi ri Tana Kanaan. Aku daꞌapa mompopalai to Amori nggari tana eꞌi, sabana daꞌapa najaꞌa gaga pokainggu ira sampe paraluu rasuku.”
17 Tempo nasolomo eo pade nawengimo, sampegoli neumbamo kura to nosumoa bo sulo to najela, pade noliu ri olo nu bau nijijiri etu. 18 Eo etu woꞌu i PUE nowia pojanji ante Abram. Niulina, “Njumaongu tana eꞌi kuwai ka mulimu, mompamula nggari pantaꞌa nu Tana Masir sampe marata ri Binangga Efrat, 19 etumo tana nto Keni, to Kenas, to Kadmon, 20 to Het, to Feris, to Refaim, 21 to Amori, to Kanaan, to Girgasi bo to Yebus.”