Abram nompakasalama Lot nggariara mpale nu balina
14
Tempo etu naria patambaꞌa magau to nosanga ka Amrafel nggari Babilonia, Ariokh nggari ngata Elasar, i Kedorlaomer nggari ngata Elam, bo i Tideal nggari ngata Goyim 2 nosibali ante alima magau ntanina, etumo i Bera nggari ngata Sodom, i Birsya nggari ngata Gomora, i Syinab nggari ngata Adma, i Syemeber nggari ngata Leboim, bo magau nggari ngata Bela to niuli woꞌu Zoar. 3-4 Sampulu rompae kasaena alima magau etu niparenta nu Magau Kedorlaomer, tapi riara mpae kasampulu tolumpaena ira nenggarawemba nangewa iꞌa. Alima magau etu nasintuwu meewa pade nompasiromu tantara ira ri Lemba Sidim, to niuli weꞌi-weꞌi Tasi Mate.a5 Riara mpae kasampulu patampaena naratamo Magau Kedorlaomer nosanggani-nggani ante magau-magau to nasintuwu ante iꞌa ante tantara-tantara ira. Pade ira nombadagi to Refaim ri ngata Asyterot-Karnaim, to Zuzim ri ngata Ham, to Emim ri ngata Syawe-Kiryataim, 6 pade to Hori to netoꞌo ri bagia buluna Seir sampe ri El-Paran ri soso nu karawa baina. 7 Naopu etu topedagi negoli bo nanjili bali mpaka ri ngata En-Mispat to niuli weꞌi-weꞌi ngata Kadesh. Ira nombakuasai njumaongu tana nto Amalek pade nombadagi to Amori to netoꞌo ri ngata Hazezon-Tamar woꞌu.
8 Naopu etu naratamo magau-magau nggari Sodom, Gomora, Adma, Zeboim bo Bela (etumo Zoar) nompasiromu tantara ira ri Lemba Sidim. Pade nosibalimo ira ka 9 Magau Kedorlaomer nggari Elam, Magau Tideal nggari Goyim, Magau Amrafel nggari Babilonia bo Magau Ariokh nggari Elasar. Jadi limambaꞌa magau nangewa patambaꞌa magau ntanina. 10 Ri Lemba Sidim etu ri umba-umba naria buwu aspal. Tempo magau nggari Sodom bo Gomora nompasimbuku nalai nangowa nggari posipatesi etu, ira nanawu riara buwu aspal etu. Pade tau to danatuwu nangowa nalai mpaka ri buluna. 11 Patambaꞌa magau padagi etu nangago pura-pura mbara-mbara nggari ngata Sodom bo Gomora, ante pura-pura panggoni. Pade etu nikeni ira mpalai pura. 12 Lot, pinuana Abram woꞌu nikeni ira mpalai, nosanggani-nggani ante pura-pura mbara-mbarana, sabana iꞌa netoꞌo ri ngata Sodom.
13 Tapi naria sambaꞌa tau namala nalai nggari posibali etu narata nopakilu pura-pura kajadia etu ka Abram, to Ibrani etu. Tempo etu Abram netoꞌo namosu kayu bete i Mamre to Amori. Mamre ante sampesuwu-sampesuwuna, iꞌamo Eskol bo Aner, iramo roa Abram. 14 Tempo Abram nangepe lele pinuanana nikeni mpalai, nipasiromuna pura-pura langgai to najadi ananjapona to napande nosipatesi, kadeana toluatu sampulu walumbaꞌa. Pade nalaumo ira nombaraga patambaꞌa magau etu sampe narata ri ngata Dan. 15 Ri setu tempo nggawengina, Abram nombabagi roa-roana majadi bara sakuya bagia ala mangewa bali ira. Ira nombadagi bali ira etu pade nombaraga ira sampe ri ngata Hoba ri sabingga tasina ngata Damsyik. 16 Abram nangago mpanjili mbara-mbara to niago ira. Pade pinuanana i Lot woꞌu nikenina mpanjili nosanggani-nggani ante pura-pura mbara-mbarana bo besi-besi bo tau-tau ntanina to nikeni mpalai etu.
Melkisedek nombagane Abram
17 Naopu nombadagi Magau Kedorlaomer ante magau-magau to nasintuwu ante iꞌa, nanjilimo Abram. Tempo etu naratamo Magau ngata Sodom nantomunaka iꞌa ri Lemba Syawe to niuli woꞌu Lemba Magau. 18 Pade narata woꞌu i Melkisedek, Magau ngata Salem,b sambaꞌa topanggeni pesomba ka Alatala to Neliu Nggalanga. Iꞌa nanggeni roti bo anggur ka Abram 19 pade nombagane Abram. Niulina, “Perapi Pue Alatala to Neliu Nggalanga to nompajadi langi bo dunia mombawai rasi ka Abram. 20 Ratoiyamo Alatala to Neliu Nggalanga to nantulungi komi mombadagi balimu!” Naopu etu Abram nombabagi pura-pura mbara-mbara to niagona etu majadi sampulu bagia, pade niwaina sabagia ka i Melkisedek.
21 Pade notesamo Magau Sodom ka Abram, “Alamo mbara-mbara to niagomu etu, tapi kuperapi popanjili ka akumo anabua-anabuaku to nikeni mpalai etu.”
22 Tapi nesonomo Abram ka magau Sodom, “Nojanjimo aku ri ngayo i PUE, Alatala to Neliu Nggalanga to nompajadi langi bo dunia, 23 aku daꞌa mangala nuapa-nuapa nggari anumu, nau bara sambalaa bana, bara sabingga lui nu sandala woꞌu daꞌa kuala. Ante iwetu iko daꞌa mamala manguli, ‘Akumo to nompowia Abram najadi nakalumana.’ 24 Aku daꞌa madota mangala nuapa-nuapa ntanina nggari nuapa to nikoni todeaku eꞌi, pade nuapa to masipato ratarima roa-roaku to nantulungi aku, etumo Aner, Eskol bo i Mamre. Wai ka iramo to masipato ratarima ira.”