Abram bo Lot nosimpogaꞌa
13
Jadi nalaumo Abram nggari Tana Masir mpaka ri bagia puluna Tana Kanaan nosanggani-nggani ante rongona bo njumaongu mbara-mbarana. Pade i Lot woꞌu netuki. 2 Tempo etu nasugi mpuꞌumo Abram. Nadeamo pompatuwuna, pade naria woꞌu salaka bo bulawana. 3 Nalaumo iꞌa nggari bagia puluna Tana Kanaan etu nompesayo nompakamosu ngata Betel. Naratamo iꞌa ri bagia olo nu Betel bo Ai, to nipotendana bopia, 4 etumo petoꞌo nipompowiana petoꞌo mpesomba bopia. Ri setumo iꞌa nombasomba i PUE woꞌumo.5 Lot, to nalau mpasanggani-nggani ante Abram, nadeamo bimbana, japina bo tendana. 6 Sabana etu tana ri setu daꞌa nagana kawokona ane ira rombaꞌa mosanggani-nggani ri setu, sabana pompatuwu ira neliu gagamo kadeana. 7 Nggari sabana etu najadimo posinggarau ri olo topoewu Abram bo topoewu i Lot. (Tempona etu to Kanaan bo to Feris woꞌu netoꞌo ri tana etu.)
8 Jadi nangulimo Abram ka i Lot, “Kita eꞌi nosampesuwu. Daꞌa nabelo kita mosinggarau, pade daꞌa nabelo topoewumu bo topoewuku mosinggarau-rau. 9 Kitamo, naluo mpuꞌumo tana ri ngayomu. Nabelopa kita mosimpogaꞌa. Ane iko malau mpaka ri bagia ri sabingga njidina, aku malau mpaka ri bagia ri sabingga nggana. Ane iko malau mpaka ri bagia ri sabingga nggana, aku malau mpaka ri bagia ri sabingga njidina.”
10 Nangepe etu i Lot nangantoaka nikitana pura-pura Lemba Yordan sampe ri ngata Zoar. Nadea uena nasimbayu ewa pampa nu PUE bo Tana Masir. (Iwetumo lenjena tempo etu sabana i PUE daꞌapa nompakaropu ngata Sodom bo Gomora ri setu.) 11 Kaopuna i Lot nompelisi njumaongu Lemba Yordan etu. Naopu etu nosimpogaꞌamo iꞌa ante Abram, pade nanggaliwomo iꞌa mpaka ri kamataeona. 12 Abram naroo netoꞌo ri Tana Kanaan tapi i Lot netoꞌo notenda ri ngata-ngata ri lemba, namosu ngata Sodom. 13 Pue ngata Sodom etu tau neliu nggajaꞌa bo nadea mpuꞌu silaka ira ri jaꞌi PUE.
Abram nolinja mpaka ri Hebron
14 Sangga nalaipa i Lot, nangulimo i PUE ka Abram, “Antoakamo nggari petoꞌo pekanggoremu etu mpaka ri sabingga tasina bo puluna pade ri sabingga kamataeona bo kasolona. 15 Njumaongu tana to nikitamu etu kana kuwai ka iko bo mulimu majadi bagiamu sampe ri kasae-saena. 16 Aku kana mombawai ka iko mulimu meliu kadeana sampe daꞌa ria sambaꞌa tau mompakule mombabila ira. Nasimbayu ewa tau daꞌa namala mombabila sowu ri tana, iwetu woꞌu mulimu daꞌa mamala rabila ira. 17 Weꞌi-weꞌi pesayomo njumaongu tana eꞌi, sabana Aku kana mombawai ka iko tana eꞌi.”
18 Naopu etu Abram nombalinja tendana bo naroo namosu kayu bete ri Mamre, namosu ngata Hebron. Pade ri setumo iꞌa nowia petoꞌo mpesomba ka i PUE.