Abram nipokio Alatala
12
Nangulimo i PUE ka Abram, “Palasimo ngatamu pade pura-pura sampesuwumu bo sapo umamu, pade kalaumo mpaka ri tana to kutujuraka ka iko. 2 Aku kana mombawai ka iko mulimu madea pade ira majadi ngata bete. Aku kana mombawai rasi ka iko bo mompakatolele sangamu, pade iko kana majadi rasi ka tau-tau ntanina. 3 Aku kana mombagane tau-tau to mombagane iko, pade Aku mombajanjiaka tau-tau to mombajanjiaka iko. Pade nggari mulimu banepia pura-pura manusia ri dunia kana mombarata rasi nggari jaꞌiku.”4-5 Jadi tempo Abram noumuru pitumpulu bo limampae, nalaumo iꞌa nggari ngata Haran nantuki tesa i PUE ka iꞌa. Nanggaliwomo iꞌa mpaka ri Tana Kanaan nosanggani-nggani ante rongona i Sarai, pinuanana i Lot, pade pura-pura kakalumana bo batua to niratana ri ngata Haran.
6 Sangga naratapa ira ri Tana Kanaan Abram nompesayo tana etu sampe iꞌa narata ri kayu bete ri More, namosu ngata Sikhem. Tempo etu to Kanaan danetoꞌo ri bagia etu. 7 Tempona etu i PUE nompopokita korona ka Abram pade nanguli ka iꞌa, “Eꞌimo tana kuwai ka mulimu.” Jadi ri setumo Abram nompowia saongu petoꞌo mpesomba ka i PUE to nompopokita korona ka iꞌa.
8 Naliu etu nipapolanamo polumakona mpaka ri puluna ri bagia buluna ri sabingga kamataeona ngata Betel. Nipatakana tenda ri olo ngata Betel bo ngata Ai, Betel ri sabingga kasolona pade Ai ri sabingga kamataeona. Pade ri setumo nipowiana saongu petoꞌo mpesomba pade nisombana i PUE. 9 Naopu etu nipapolana woꞌumo polumakona mpaka ri bagia puluna Tana Kanaan etu.
Abram ri Tana Masir
10 Tempo etu ri Tana Kanaan naria kamateoro. Jadi Abram napola woꞌumo mpaka ri Tana Masir ala maroo ri setu bara sakuya kasaena sabana kamateoro ri Tana Kanaan najaꞌa mpuꞌu. 11 Tempo iꞌa namosu pantaꞌa Tana Masir nangulimo iꞌa ka i Sarai, rongona etu, “Ninjaniku iko sambaꞌa besi to nagaya mpuꞌu. 12 Ane to Masir manggita iko ira kana manguli, ‘Tantu besi eꞌi rongona.’ Pade natantumo ira kana mompatesi aku pade mompakamba iko matuwu. 13 Jadi nabelopa iko manguli iko tuaꞌiku ala aku rapalamba ira matuwu bo rapowia ira ante mabelo sabana iko.” 14 Pade iwetu mpuꞌu to najadi. Sangga naratapa Abram ri Tana Masir, to Masir nanggita i Sarai etu nagaya mpuꞌu. 15 Bara sakuya mbaꞌa pangga bete magau nanggita iꞌa pade nompakilu ka magau nelabi mpuꞌu kagaya nu besi etu. Etu sampe i Sarai nikeni metoꞌo ri sapo nu magau. 16 Sabana nggari i Sarai magau nompowia Abram ante nabelo pade nombawai ka iꞌa bimba bo towau, japi, keledai, nabeloka tuamana nabeloka tinana unta bo batua-batua, nabeloka langgai nabeloka besi.
17 Tapi i PUE nombawai juꞌa-juꞌa to najaꞌana ka magau bo tau-tau riara njapo magau sabana iꞌa nangala i Sarai. 18 Nawela juꞌa etu magau nompokio Abram pade nompekutana iꞌa, “Nuapa nipowiamu ka aku eꞌi? Nokuya tanu daꞌa niulimu ka aku iꞌa etu rongomu? 19 Nokuya iko nanguli iꞌa etu tuaꞌimu, pade nompakamba aku nangala iꞌa majadi rongoku? Eꞌimo rongomu! Alamo iꞌa pade palaimo!” 20 Pade magau etu nompakau anabuana manggeni Abram nggari ngata etu nosanggani-nggani ante rongona bo pura-pura mbara-mbarana.