Sapo to neliu nggalanga ri Babel
11
Tempo etu pura-pura manusia ri dunia aga saongu lau basa, ira nompake tesa to nasimbayu. 2 Tempo ira nolinja-linja mpaka ri sabingga kamataeona ira nombarata saongu lemba bete ri Tana Sinear.a Pade naroomo ira ri setu. 3 Nangulimo ira sambaꞌa bo sambaꞌa, “Mai kita mompowia batu bata rapalabuta mpakakoꞌo.” Jadi batu bata etu nipake ira rapowia sapo pade aspal nipake ira rapombapulu batu bata etu. 4 Pade niuli ira woꞌumo, “Maimo kita mombabangu saongu ngata ante sapo to neliu nggalanga ante wumbuna marata ri langi ala kita rabila ntau pade ala neꞌe kita mosimpotatare mpaka ri umba-umba ri dunia.”5 Naopu etu nanaꞌumo i PUE nggari suruga nanggita ngata etu ante sapo to nalanga to nipowia manusia tempo etu. 6 Sangga nanggita etu, nangulimo i PUE, “Kita weꞌi! Manusia eꞌi nosaongumo, pade basa ira saongu lau. Eꞌimo lako pamulana panggawia ira. Ane majadimo nia ira etu, natantumo daꞌa mana masae ira mompakule mowia nuapa-nuapa to nipokono ira! 7 Nabelopa Kita manaꞌu mompakagado basa ira ala ira daꞌa mana mosinjani basa.” 8 Jadi iwetumo i PUE nompoposimpotatare ira mpaka ri umba-umba ri dunia. Pade nenontomo ira nombabangu ngata etu. 9 Etumo sampe ngata etu nipoposanga Babel,b sabana ri setumo i PUE nompakagado basa manusia, pade nggari setumo Iꞌa nompoposimpotatare ira mpaka ri umba-umba ri dunia.
Muli Sem
1Taw. 1:24-27
10 Iweꞌimo tesa muli i Sem: Rompae kaliuna ue nanggabuntu tempo i Sem noumuru satu mpae, iꞌa noana ka Arpakhsad. 11 Naopu etu iꞌa danatuwu limatu mpaepa pade danoana woꞌumo ka ngana-ngana langgai bo besi. 12 Tempo Arpakhsad noumuru tolumpulu bo limampae iꞌa noana ka i Selah. 13 Naopu etu Arpakhsad danatuwu patatu bo tolumpaepa, pade iꞌa danoana woꞌumo ka ngana-ngana langgai bo besi.
14 Tempo i Selah noumuru tolumpulu mpae iꞌa noana ka Eber. 15 Naopu etu i Selah danatuwu patatu bo tolumpaepa, pade iꞌa danoana woꞌumo ka ngana-ngana langgai bo besi.
16 Tempo Eber noumuru tolumpulu bo patampae iꞌa noana ka i Peleg. 17 Naopu etu Eber danatuwu patatu bo tolumpulu mpaepa, pade iꞌa danoana woꞌumo ka ngana-ngana langgai bo besi.
18 Tempo i Peleg noumuru tolumpulu mpae iꞌa noana ka i Rehu. 19 Naopu etu i Peleg danatuwu roatu bo siompaepa, pade iꞌa danoana woꞌumo ka ngana-ngana langgai bo besi.
20 Tempo i Rehu noumuru tolumpulu bo rompae iꞌa noana ka i Serug. 21 Naopu etu i Rehu danatuwu roatu bo pitumpaepa, pade iꞌa danoana woꞌumo ka ngana-ngana langgai bo besi.
22 Tempo i Serug noumuru tolumpulu mpae iꞌa noana ka i Nahor. 23 Naopu etu i Serug danatuwu roatu mpaepa, pade iꞌa danoana woꞌumo ka ngana-ngana langgai bo besi.
24 Tempo i Nahor noumuru rompulu bo siompae iꞌa noana ka i Terah. 25 Naopu etu i Nahor danatuwu satu bo sampulu siompaepa, pade iꞌa danoana woꞌumo ka ngana-ngana langgai bo besi.
26 Tempo i Terah noumuru pitumpulu mpae iꞌa noana ka Abram, i Nahor bo i Haran.
Muli Terah
27 Iweꞌimo tesa muli i Terah: Terah noana ka Abram, i Nahor bo i Haran. Pade i Haran noana ka i Lot. 28 Haran namate ri ngatana mboto, etumo ngata Ur ri Tana Babilonia tempo umana i Terah danatuwu. 29 Abram nomporongo i Sarai, pade i Nahor nomporongo i Milka, ana besi i Haran. Pade naria ana i Haran ntanina, nosanga ka Yiska. 30 Sarai nagampa.
31 Terah nompalasi ngata Ur ri Tana Babilonia nosanggani-nggani ante anana Abram, makumpuna i Lot bo maniana i Sarai, rongo Abram. Patujuna ala malau mpaka ri Tana Kanaan. Tapi sangga naratapa ira ri ngata Haran, naroomo ira ri setu. 32 Umuru i Terah nagana roatu bo limampaemo pade iꞌa namate ri ngata Haran.