Muli ana-ana Nuh
10
Iweꞌimo tesa muli-muli nggari ana-ana i Nuh, etumo i Sem, i Ham bo Yafet. Naopu ue nanggabuntu bete ira tolumbaꞌa noana ka ngana langgai.Muli Yafet
1Taw. 1:5-7
2 Iweꞌimo sanga-sanga ana Yafet: i Gomer, i Magog, i Madai, Yawan, i Tubal, i Mesekh bo i Tiras. 3 Muli i Gomer, etumo tau netoꞌo ri ngata Askenas, ngata Rifat pade ngata Togarma. 4 Muli Yawan, etumo tau netoꞌo ri Bagia Elisa, Tarsis, Siprusa bo Rodes. 5 Iramo to najadi totuꞌa nu pura-pura tau to netoꞌo ri wiwi talinti Tasi Tongo bo lewuto-lewutona. Ira puramo muli Yafet nantuki sanga ngata to nipetoꞌo ira, mbau ante basa ira mboto, sanga ira mboto santina bo ngata ira mboto.
Muli Ham
1Taw. 1:8-16
6 Iweꞌimo sanga ana-ana i Ham: i Kush, i Misraim, i Put pade i Kanaan. 7 Muli i Kush, etumo tau netoꞌo ri Bagia Seba, Hawila, Sabta, Raema pade ri Sabtekha. Muli ntau to netoꞌo ri Bagia i Raema, etumo tau to netoꞌo ri Bagia Syeba bo Dedan. 8 Kush noana ka i Nimrod to najadi tomalanggai pamulana riara dunia. 9 Iꞌa najadi sambaꞌa topoasu to nataꞌuna riara mpanggita i PUE. Etumo sampe tau nabiasa nanguli, “Perapi i PUE mompajadi iko topoasu to nataꞌuna nasimbayu ewa i Nimrod.” 10 Pamulana ngata-ngata to napokona riara poparentana etumo Babel, Erekh bo Akad bo Kalneh, pura-pura ri Tana Babilonia. 11 Nggari Babilonia iꞌa nalau mpaka ri Tana Asyur, pade nombabangu ngata Niniwe, ngata Rehobot-Ir, ngata Kalah, 12 bo ngata Resen, etumo ngata bete to naria ri olo ngata Niniwe bo ngata Kalah.
13 Muli i Misraim, etumo tau to netoꞌo ri ngata Ludim, Anamim, Lehabim, Naftuhim, 14 Patrusim, Kasluhim, bo Kaftorim. Ngata Kasluhim etu petoꞌo ntotuꞌa nto Filistin.
15 Ana-ana i Kanaan, etumo i Sidon, ana ulumbuana, pade i Het. 16 Kanaan woꞌu totuꞌa nto Yebusi, to Amori, to Girgasi, 17 to Hewi, to Arki, to Sini, 18 to Arwadi, to Semari bo to Hamati. Ri tempo nggapurina muli i Kanaan etu nosimpotatare nakawaomo. 19 Pantaꞌa nu bagia to nipetoꞌo muli i Kanaan nggari ngata Sidon sampe ri ngata Gerar, namosu ante ngata Gaza, pade mpaka ri kamataeona nosinggamosu ka ngata Sodom, Gomora, Adma bo Zeboim sampe namosu ante ngata Lasa.
20 Ira etu puramo muli i Ham nantuki sanga ira santina, sanga basa ira, sanga ntana to nipetoꞌo ira, bo sanga ngata ira.
Muli Sem
1Taw. 1:17-27, Kaj. 11:10-27
21 Sem, tuaka Yafet najadi totuꞌa nto Eber.b 22 Ana-ana i Sem, etumo: Elam, Asyur, Arpakhsad, i Lud bo Aram. 23 Muli Aram, etumo tau to netoꞌo ri ngata Us, Hul, Geter bo Mas. 24 Arpakhsad uma i Selah, pade i Selah uma Eber. 25 Eber noana ka rombaꞌa ngana langgai. Ana ulumbuana nosanga ka i Peleg,c sabana ri tempo iꞌa natuwu manusia ri dunia natibagi-bagi. Pade anana karombaꞌana nosanga ka Yoktan.
26 Muli Yoktan, etumo tau to netoꞌo ri Bagia Almodad, Selef, Hazar-Mawet, Yerah, 27 Hadoram, Uzal, Dikla, 28 Obal, Abimael, Syeba, 29 Ofir, Hawila, bo Yobab. Ira pura-pura muli Yoktan. 30 Bagia to nipetoꞌo ira nompamula nggari ngata Mesa mpaka ri ngata Sefar, etumo ri bagia buluna ri sabingga kamataeona.
31 Ira etu puramo muli i Sem nantuki sanga ira santina, sanga basa ira, sanga ntana to nipetoꞌo ira, bo sanga ngata ira.
32 Pura-pura tau to nitesa etu muli i Nuh, nantuki tuntu posisunju sanga ntotuꞌa ira santina. Iramo to najadi totuꞌa pura-pura tau to nakamburaka netoꞌo ri umba-umba ri dunia naliu ue nanggabuntu bete etu.