Pojanji Alatala ante Nuh
9
Pade Alatala nombagane i Nuh ntalianana. Niulina, “Poanamo komi pade momuli mpakadea-dea ala muli komi mombaisi njumaongu dunia. 2 Komi kana rapokaeka bo rapowiora rara pura-pura binata naila, pura-pura tonji ri laerawa, pura-pura binata to nekanjoyo bo pura-pura bau rara ntasi. Ira pura-pura riara kuasamu. 3 Pura-pura to natuwu etu kana majadi panggonimu. Nasimbayu ewa Aku nombawai ka komi mpengele-ngele uta to naramata najadi panggonimu bopia, iwetu woꞌu weꞌi-weꞌi kuwai ka komi pura-pura majadi panggonimu. 4 Aga sangele daꞌa namala rakoni komi, etumo bau nggamata to danaria leina, sabana wayona naria riara leina. 5 Pade lei komi woꞌu nasuli. Butu mbaꞌa tau bo butu mbaꞌa binata to mompatesi manusia kana kusuku. 6 Manusia nipajadiku nantuki lenjeku mboto. Jadi isema-sema mompatesi manusia kana rapatesi manusia woꞌu. 7 Ane komi, poanamo komi bo momuli mpakadea-dea ala mulimu etu mantambai madea riara dunia eꞌi.”8 Naopu etu nangulimo Alatala ka i Nuh ntaliana, 9 “Weꞌi-weꞌi Aku mowia pojanjiku ante komi pade ante muli komi, 10 pade ante pura-pura to natuwuna to nesuwu mpasanggani-nggani ante komi nggariara sakaya bete etu, etumo tonji-tonji, binata-binata namou bo naila. 11 Aku nojanji ante komi iweꞌi: pura-pura to natuwuna daꞌa mana rapakaropu ante ue nanggabuntu bete. Daꞌa mana maria ue nanggabuntu bete mompakalodo dunia.” 12 Pade niuli Alatala woꞌumo, “Iweꞌimo tandaina pojanjiku ante komi bo pura-pura to natuwuna riara dunia sampe ri muli nu mulimu: 13 Aku mombatuꞌu sampinoraaku ri kulimu majadi tandaina pojanjiku ante dunia. 14 Butu nggani Aku mombabungu langi ante kulimu pade sampinoraa rakita, 15 kana kutora pojanji to nipowiaku ante komi bo pura-pura to natuwuna riara dunia. Daꞌa mana maria ue nanggabuntu bete mompakaropu pura-pura to natuwu ri dunia. 16 Ane maria sampinoraa rakita ri kulimu, kana kukita pade kutora pojanjiku ante pura-pura to natuwuna riara dunia to nalaku sampe ri kasae-saena eꞌi.” 17 Pade niuli Alatala woꞌumo ka i Nuh, “Sampinoraa etumo tandaina pojanji to nipowiaku ante pura-pura to natuwuna riara dunia.”
Nuh ante ana-anana
18 Ana-ana i Nuh to nesuwu nggariara sakaya bete etumo i Sem, i Ham, bo Yafet. (Ham etumo uma i Kanaan.) 19 Ira tolumbaꞌa ana i Nuh, pade iramo to najadi totuꞌa nu pura-pura manusia to netoꞌo ri njumaongu dunia.
20 Nuh najadi topotinalu, pade iꞌamo tau pamulana nombatuja anggur ri tinaluna. 21 Tempo i Nuh nanginu ue anggurna nakalangumo iꞌa. Niwonjuna puramo pakeana pade naturu nelaya riara tendana. 22 Ham, uma i Kanaan etu, nanggita umana i Nuh nelaya riara tendana, pade nesuwumo iꞌa mpaka ri sawalikuna nombatesa ka sampesuwuna i Sem bo Yafet. 23 Nangepe pantesa i Ham, i Sem bo Yafet nangala santonga buya niposaluabe ri winga ira. Pade nalaumo ira ntaliku mpaka ri jaꞌi uma ira. Sangga naratapa ri jaꞌi uma ira, nijini iramo buya etu ri bungguna. Tempo etu ira notaliku nombajini buya etu ala neꞌe ira manggita uma ira to naturu nelaya etu.
24 Tempo i Nuh nembangu nggari paturuna pade nanotomo rarana nggari kalanguna, ninjaninamo nuapa to nipowia i Ham, ana kaopuna etu ri jaꞌina tempo iꞌa nakalangu. 25 Jadi nangulimo iꞌa,
“Nasurukawumo i Kanaan!
Iꞌa kana majadi batua to mpuꞌu-mpuꞌu raporau rara sampesuwu-sampesuwuna!”
26 Pade niulina woꞌu,
“Ratoiyamo i PUE, Alatala to nisomba i Sem!
Perapi i Kanaan majadi batua i Sem.
27 Perapi Pue Alatala mompakaluo tana to rapetoꞌo Yafet,
Perapi muli-mulina metoꞌo mpasanggani-nggani ante muli i Sem!
Tapi perapi i Kanaan majadi batua Yafet!”