Ue nanggabuntu naunjumo
8
Alatala nantora i Nuh ante pura-pura binata to nosanggani-nggani ante iꞌa riara sakaya bete etu. Jadi nipakaratana poiri nantawui dunia sampe nompamulamo ue nanggabuntu etu naunju. 2 Pura-pura ue to nesuwu nggariara tana niwusu Alatala mpakapiimo, pade ue to nanaꞌu nggari langi nitondo Alatala woꞌumo. Uja daꞌa mana nadunggu 3 sampe ue nanggabuntu etu nantambai eona nantambai naunju. Naliu satu limampulu eona ue bete nantambaimo kaunjuna. 4 Sangga naratapa tanggal sampulu papitu wula papitu netaꞌamo sakaya bete etu ri bunggu Bulu Ararat. 5 Nantambai eo nantambai kaunju nu ue nanggabuntu sampe narata ri tanggal saongu wula sampulu bunggu-bunggu nu bulu nanoto nikita.6 Sangga naganamo patampulu eona i Nuh nombabea saongu tilalaba to nipowiana ri sakaya etu, 7 pade nikabasakanamo sambaꞌa tonji kolaa. Tonji etu daꞌa mana nanjili ri sakaya, tapi aga nembua gusaꞌa guseꞌi sampe ue etu naunju puramo. 8 Naliu etu nikabasaka i Nuh woꞌumo sambaꞌa tonji banggebodo ala tonji etu manggita ane ue etu naunju puramo bara daꞌapa. 9 Tapi tonji banggebodo etu daꞌa nombarata kayu rapooruna, sabana ue etu daꞌapa naoti nggari bengo dunia. Jadi nanjili balimo iꞌa mpaka ri sakaya. Nuh nangulunjaka palena nangala tonji etu pade nituꞌuna bali riara sakaya.
10 Naopu etu i Nuh nompopea pitu eopa pade nikabasakana woꞌumo tonji banggebodo etu nggariara sakaya. 11 Sangga nangguwiapa nanjili balimo tonji banggebodo etu ri jaꞌi Nuh nanggeni santaꞌu tawa kayu zaitun ri sumbana to dananggamata. Nanggita etu ninjani i Nuhmo ue bete etu naunjumo nggari bengo dunia. 12 Naliu etu nipopeana woꞌumo pitu eopa, pade nikabasakana woꞌumo tonji banggebodo etu. Tapi tonji etu daꞌa mana nanjili ri jaꞌina.
13 Tempo i Nuh noumuru onoatu bo sampaemo ri tanggal saongu wula saongu nabai puramo dunia. Nibuka i Nuhmo ata sakaya etu pade nitangoakana ri ntalilina nabaimo tana. 14 Ri tanggal rompulu bo papitu wula rongu nangau ntotomo dunia.
15 Pade nangulimo Alatala ka i Nuh, 16 “Pesuwumo nggariara sakaya, komi njamboko ntaliana ntalimania. 17 Keni mpesuwumo tonji-tonji bo binata-binata to nosanggani-nggani ante komi riara sakaya, ala ira mamala momuli mpakadea sampe mantambai kadeana riara dunia.” 18 Jadi nesuwu mpuꞌumo i Nuh njamboko ntaliana ntalimania mpaka ri sawaliku sakaya etu. 19 Pade nesuwu woꞌu mpengele-ngele to nonggaya ri kabatana, etumo binata naila, binata to nekanjoyo bo mpengele-ngele tonji, simbau nantuki roana mboto.
Nuh nombawai pesomba ka i PUE Alatala
20 Naopu etu i Nuh nompowia petoꞌo mpesomba ka i PUE. Nialana bara sakuya mbaꞌa nggari mpengele-ngele binata bo tonji to daꞌa nakapali pade nipalabuna ri bunggu petoꞌo etu najadi pesomba ka i PUE. 21 Tempo i PUE nangenga soa mpesomba to nawongi etu niulina riara ntaꞌina, “Aku daꞌa mana mombajanjiaka tana sabana pokainggu manusia, naupa dota rarana bate-batena najaꞌa nggari kakedina sampe mabete. Aku daꞌa mana mompakaropu mpengele-ngele to natuwuna ewa to lako-lako nipowiaku eꞌi. 22 Sakuya kasaena dunia eꞌi maria daꞌa mana menonto tempo motuja bo tempo mokato, tempo leni bo tempo mapane, tempo uja bo tempo daꞌa mauja, pade bate-batena maria eo bo wengi.”