Ue nanggabuntu bete
7
Naopu etu nangulimo i PUE ka i Nuh, “Pesuamo riara sakaya bete etu komi njamboko ntaliana ntalimania, sabana nikitaku nggari pura-pura manusia to natuwu weꞌi-weꞌi aga ikomo to nanoa riara mpanggitaku. 2-3 Keni woꞌu pitunjamboko-pitunjamboko nggari pura-pura ngele binata bo tonji ri laerawa to daꞌa nakapali. Tapi ane binata to nakapali kana mukeni aga sanjamboko-sanjamboko. Kawiamo etu ala mpengele-ngele binata bo tonji etu neꞌe maropu pade mamala momuli bali ri dunia. 4 Sabana pitu eopa Aku mompakadunggu uja ri dunia to daꞌa maura-ura patampulu eo bo patampulu mbengi kasaena. Pade pura-pura to natuwuna to nipajadiku riara dunia eꞌi kana kupakaropu.”5 Nangepe etu i Nuh nantuki pura-pura to niparenta i PUE ka iꞌa. 6 Umuru i Nuh onoatu mpaemo tempo karata ue nanggabuntu nompakalodo dunia. 7 Nesuamo ira i Nuh njamboko ntaliana ntalimania riara sakaya bete etu ala masalama nggari ue nanggabuntu bete to marata etu. 8-9 Pade naratamo sanjamboko nggari mpengele-ngele binata, tonji, bo binata to nekanjoyo, nabeloka to nakapali, nabeloka to daꞌa nakapali. Nesuamo ira riara sakaya bete nosanggani-nggani ante i Nuh ewa to niparenta Alatala ka iꞌa bopia. 10 Pitu eo kaliuna naratamo ue nanggabuntu nompakalodo dunia.
11 Tempo i Nuh noumuru onoatu mpae ri tanggal sampulu papitu wula karonguna, nepogu puramo ue nggariara ntana, pade ue nggari langi ewa ue nggari salura bete nanawu ri bunggu dunia. 12 Naujamo daꞌa naura-ura patampulu eo bo patampulu mbengi kasaena. 13 Ri eo etu woꞌu nesuamo i Nuh njamboko riara sakaya bete etu nosanggani-nggani ante tolumbaꞌa ana ira, etumo i Sem, i Ham bo Yafet ante rongo-rongo ira. 14 Nosanggani-nggani ante ira naria woꞌumo mpengele-ngele binata naila, mpengele-ngele binata namou, mpengele-ngele binata to nekanjoyo bo mpengele-ngele tonji, etumo pura-pura nuapa to nokapi. 15 Ira pura-pura sanjamboko-sanjamboko nggari mpengele-ngele lenje binata to natuwuna narata nesua riara sakaya bete etu nosanggani-nggani ante i Nuh. 16 To nesua etumo sambaꞌa besi bo sambaꞌa tuamana nggari mpengele-ngele binata bo tonji to natuwuna ewa to niparenta Alatala ka i Nuh. Sangga nesua puramo ira, i PUE mboto nombapiku pewobo sakaya bete etu.
17 Patampulu eo bo patampulu mbengi kasaena ue nanggabuntu etu nompakalodo dunia. Ue etu nantambai nabete sampe sakaya bete nationggotakamo mpakalanga-langa nggari bunggu ntana. 18 Nantambai eo nantambaimo kabete nu ue, pade nantambaimo kandalana ri bengo dunia. Pade sakaya etu nolanto-lantomo ri bunggu ue. 19 Ue etu tunggai nantambaimo kabetena sampe pura-pura bulu to nalangana ri dunia mana nanoto nikita nitutu nu ue. 20 Nantambai-mbaimo kandala nu ue sampe neliu bunggu nu bulu to neliu nggalanga papitu metere. 21 Pade namatemo pura-pura nuapa to natuwu ri bengo dunia, nabeloka tonji-tonji, nabeloka binata namou, nabeloka binata naila, nabeloka binata to nekanjoyo, nabeloka manusia. 22 Pura-pura nuapa to natuwu ri kabatana namate sanggani, etumo pura-pura nuapa to naria nosana nompakatuwu iꞌa. 23 Pura-pura nuapa to natuwu ri dunia nipakaropu Alatala, etumo manusia, binata-binata bo tonji-tonji. To daꞌa namate damo aga i Nuh bo ira to nosanggani-nggani ante iꞌa riara sakaya. 24 Pade ue bete etu daꞌa naunju satu limampulu eo kasaena.