Kajaꞌa nu manusia
6
Tempo manusia nompamula nantambai kadeana riara dunia eꞌi, pade naria ngana-ngana besi nipoanaka, 2 malaeka-malaeka nu Alatala nanggita randoo-randoo riara dunia nosinggagaya lenje ira. Jadi naratamo ira nomporongo randoo-randoo manusia to nipokono ira. 3 Nanggita etu nangulimo i PUE, “Daꞌa mana kupokono manusia matuwu ri bunggu dunia sampe ri kasae-saena, sabana ira etu aga manusia bo kana mamate. Mompamula weꞌi-weꞌi daꞌa mana melabi nggari satu rompulu mpae umuru ira ri dunia.” 4 Tempo etu pade naliu tempo etu woꞌu naria manusia to nabete mpuꞌu ri dunia. Ira etumo muli nggari besi-besi to niporongo malaeka-malaeka nu Alatala. Iramo tau-tau to najadi tadulako to nipogumaa ntau ri dunia nggaolu.5 PUE nanggita manusia ri dunia tempo etu najaꞌa mpuꞌumo, pade pura-pura pekiri rara ntaꞌi ira bate-batena najaꞌa mpuꞌumo. 6 Jadi nanjoso mpuꞌumo rara i PUE nompajadi manusia ri dunia. Nasusa mpuꞌumo rarana nanggita kajaꞌa ira. 7 Jadi niulina, “Kana kupakaropu manusia to nipajadiku nosanggani-nggani ante binata-binata bo tonji-tonji ri laerawa. Mana maria ira ri dunia eꞌi sabana nanjoso mpuꞌumo raraku nompajadi ira pura-pura.” 8 Tapi i Nuh nikonoa rara i PUE.
Tesa Nabi Nuh
9 Iweꞌimo tesa i Nuh ante mulina. Iꞌa sambaꞌa tau to nanoa. Nggari pura-pura manusia ri dunia to natuwu tempo etu, aga iꞌamo to daꞌa ria pokainggu to nasalana. Pade iꞌa natuwu nowega ante Alatala. 10 Naria tolumbaꞌa anana langgai, etumo i Sem, i Ham, bo Yafet. 11 Tapi pura-pura tau ntanina ri dunia nadenggo mpuꞌumo riara mpanggita Alatala. Manusia ri umba-umba aga nasingi bo najaꞌa mpuꞌu. 12 Alatala nanggita dunia, pade nikitana pura-pura manusia mpuꞌu-mpuꞌu nadenggo, sabana ira tunggai natuwu ri dunia ante pokainggu to najaꞌana.
13 Jadi nangulimo Alatala ka i Nuh, “Nipakatantukumo mompakaropu pura-pura to natuwuna riara dunia eꞌi, sabana manusia ri umba-umba aga nasingi bo najaꞌa puramo. Natantumo Aku kana mompakaropu ira nosanggani ante dunia eꞌi woꞌu. 14 Jadi powiamo saongu sakaya bete nggari kayu to narosona. Pade riara sakaya etu powia woꞌumo tombi-tombina, pade pulu puramo sakaya etu ante aspal, nabeloka riarana nabeloka ri sawalikuna. 15 Iko kana mompowia sakaya etu iweꞌi: kandatena 133 metere, karembana 22 metere, pade langana 13 metere. 16 Powia woꞌu ata sakaya etu ante olo ata bo leruna rondanga. Powiamo sakaya etu tolu njunju, pade powia woꞌu saongu pewobo ri wiwi nu sakaya etu. 17 Epemo! Aku kana mompowia ue manggabuntu ri dunia eꞌi ala mompakaropu pura-pura to natuwuna. Pura-pura to natuwu ri bengo dunia kana mamate. 18 Tapi ante iko kana kupowia pojanjiku. Iko kana mesua riara sakaya bete etu mosanggani-nggani ante rongomu bo ana-anamu ante mania-maniamu. 19 Pade komi kana manggeni riara sakaya sanjamboko nggari pura-pura binata ala mompakasalama ira mosanggani-nggani ante komi. 20 Nggari pura-pura tonji bo binata raranggayu bo binata to nekanjoyo sanjamboko-sanjamboko kana marata ri jaꞌimu ala ira daꞌa maropu. 21 Pade komi kana manggeni mpengele-ngele panggoni. Bolimo etu riara sakaya ala majadi panggoni komi bo panggoni binata-binata etu.” 22 Nangepe tesa etu, i Nuh nompowia pura-pura nuapa to niparenta Alatala ka iꞌa.