Muli Adam
5
Iweꞌimo sanga-sanga muli Adam.(Tempo manusia nipajadi Alatala ira nipajadina nantuki lenjena mboto. 2 Nipajadina langgai bo besi. Naopu nipajadi ira nigane Alatala, pade nipoposangana “manusia.”)
3 Tempo Adam noumuru 130 mpae iꞌa noana ka sambaꞌa ngana langgai ewa lenjena mboto. Pade nipoposangana ngana etu i Set. 4 Naopu pesuwu i Set Adam danatuwu 800 mpaepa, pade iꞌa danoana woꞌumo ka ngana-ngana langgai bo besi. 5 Umuru Adam nagana 930 mpae pade iꞌa namate.
6 Tempo i Set noumuru 105 mpae iꞌa noana ka Enos. 7 Naopu i Set noana ka Enos iꞌa danatuwu 807 mpaepa, pade iꞌa danoana woꞌumo ka ngana-ngana langgai bo besi. 8 Umuru i Set nagana 912 mpae pade iꞌa namate.
9 Tempo Enos noumuru 90 mpae, iꞌa noana ka i Kenan. 10 Naopu pesuwu i Kenan Enos danatuwu 815 mpaepa, pade iꞌa danoana woꞌumo ka ngana-ngana langgai bo besi. 11 Umuru Enos nagana 905 mpae pade iꞌa namate.
12 Tempo i Kenan noumuru 70 mpae iꞌa noana ka i Mahalaleel. 13 Naopu pesuwu i Mahalaleel i Kenan danatuwu 840 mpaepa, pade iꞌa danoana woꞌumo ka ngana-ngana langgai bo besi. 14 Umuru i Kenan nagana 910 mpae pade iꞌa namate.
15 Tempo i Mahalaleel noumuru 65 mpae iꞌa noana ka Yared. 16 Naopu pesuwu Yared i Mahalaleel danatuwu 830 mpaepa, pade iꞌa danoana woꞌumo ka ngana-ngana langgai bo besi. 17 Umuru i Mahalaleel nagana 895 mpae pade iꞌa namate.
18 Tempo Yared noumuru 162 mpae iꞌa noana ka i Henokh. 19 Naopu pesuwu i Henokh Yared danatuwu 800 mpaepa, pade iꞌa danoana woꞌumo ka ngana-ngana langgai bo besi. 20 Umuru Yared nagana 962 mpae pade iꞌa namate.
21 Tempo i Henokh noumuru 65 mpae iꞌa noana ka i Metusalah. 22 Naopu pesuwu i Metusalah i Henokh danatuwu nowega ante Alatala 300 mpaepa, pade iꞌa danoana woꞌumo ka ngana-ngana langgai bo besi. 23 Umuru i Henokh nagana 365 mpae. 24 Iꞌa natuwu nowega ante Alatala, pade iꞌa nalipo waꞌamo, sabana iꞌa niore Alatala mboto nggari dunia eꞌi.
25 Tempo i Metusalah noumuru 187 mpae iꞌa noana ka i Lamekh. 26 Naopu pesuwu i Lamekh i Metusalah danatuwu 782 mpaepa, pade iꞌa danoana woꞌumo ka ngana-ngana langgai bo besi. 27 Umuru i Metusalah nagana 969 mpae pade iꞌa namate.
28 Tempo i Lamekh noumuru 182 mpae iꞌa noana ka sambaꞌa ngana langgai, 29 pade ngana etu nipoposangana i Nuh.a Niulina, “Ngana eꞌi kana mompakawoe rarata tempo kita nandasa bo natomo mokarajaa tana to nijanjiaka i PUE.” 30 Naopu pesuwu i Nuh i Lamekh danatuwu 595 mpaepa, pade iꞌa danoana woꞌumo ka ngana-ngana langgai bo besi. 31 Umuru i Lamekh nagana 777 mpae pade iꞌa namate.
32 Naopu i Nuh noumuru 500 mpae iꞌa noana ka tolumbaꞌa ngana langgai to nosanga ka i Sem, i Ham, bo Yafet.