Tesa Kain ante Habel
4
Naopu etu nosampaturumo Adam ante rongona i Hawa, pade natianamo i Hawa. Tempo naganamo mbulana iꞌa nangote sambaꞌa ngana langgai to nipoposangana i Kain.a Nangulimo i Hawa, “Ante petulungi i PUE aku nombarata sambaꞌa ngana langgai.” 2 Naliu etu besi etu noana woꞌumo sambaꞌa ngana langgai, tuaꞌi Kain, pade nipoposangana i Habel. Tempo iꞌa nabetemo i Habel najadi topoewu bimba bo towau, pade i Kain najadi topotinalu. 3 Naria sanggani i Kain nangala sabagia asele ntinaluna nikenina nipesombana ka i PUE. 4 Pade tuaꞌina i Habel nangala saongu ana bimba ulumbua nisambalena pade nialana bagia-bagia to neliu nggabelona nipesombana ka i PUE. Habel bo pesombana etu nikonoa rara i PUE, 5 tapi i Kain bo pesombana daꞌa nikonoa rara i PUE. Nanggita etu narau mpuꞌu rara i Kain sampe nakambuꞌumo lenjena. 6 Pade nangulimo i PUE ka i Kain, “Nokuya iko narau raramu? Nokuya lenjemu nakambuꞌu? 7 Ane iko nanggawia to nabelona natantumo iko kana mongiri ante madamba rara. Tapi ane iko daꞌa mowia to nabelona silaka nopeamo madota mombadagi iko, tapi iko kana mombadagi silaka etu.”8 Naopu etu i Kain nalau nanguli ka tuaꞌina i Habel, “Mai kita malau ranggarawana.” Sangga naratapa ira rombaꞌa ranggarawana, sampegoli i Kain nombabaga tuaꞌina i Habel pade nompatesi iꞌa.
9 Naopu etu nangulimo i PUE ka i Kain, “Ri umbamo tuaꞌimu i Habel?”
Nesonomo i Kain, “Daꞌa ninjaniku! Aku daꞌa topojaga tuaꞌiku!”
10 Pade nangulimo i PUE ka i Kain, “Nokuya iko nompowia to najaꞌana ka tuaꞌimu? Leina nekakai ka Aku nggariara tana ala topompatesi iꞌa rapesawa. 11 Jadi weꞌi-weꞌi iko nijanjiakamo sabana iko nompatesi tuaꞌimu. Iko kana rapopalai nggari tana eꞌi to nikatiti nu lei tuaꞌimu. 12 Ane iko mokarajaa tana, daꞌa ntoto maria aselena. Pade iko daꞌa woꞌu maroo petoꞌomu. Iko aga majadi topenjayo-njayo ri dunia.”
13 Nangepe etu nangulimo i Kain ka i PUE, “Natomo gaga pesuku to niwai Komi etu! Daꞌa kupakule manjumbuakana! 14 Komi nompopalai aku nggari tana eꞌi, nakawao nggari jaꞌimu. Daꞌa mana maroo petoꞌoku, aku damo topanjayo-njayo gusaꞌa guseꞌi. Aku kana mamate rapatesi isema-sema to mosintomu ante aku!”
15 Tapi nangulimo i PUE ka iꞌa, “Daꞌa nakono. Ane iko rapatesi, topompatesi etu kana rapesawa pitu nggani katomona nggari pesuku to nipawela ka iko.” Pade i PUE nombadika tandai ka i Kain ala isema-sema mosintomu ante iꞌa, tau etu daꞌa madota mompatesi iꞌa. 16 Naopu etu nalaimo i Kain nggari ngayo i PUE nalau netoꞌo ri Tana Nod b ri sabingga kamataeo nu Pampa Eden.
Muli Kain
17 Naliu etu nosampaturumo i Kain ante rongona pade natianamo rongona etu. Tempo naganamo mbulana iꞌa nangote sambaꞌa ngana langgai to nipoposangana i Henokh. Naliu etu i Kain nombabangu saongu ngata, pade nipoposangana ngata etu ngata Henokh nantuki sanga anana etu. 18 Henokh noana ka Irad. Pade Irad noana ka i Mehuyael. Mehuyael noana ka i Metusael. Metusael noana ka i Lamekh. 19 Lamekh noradua, sambaꞌa nosanga ka Ada pade sambaꞌapa nosanga ka i Zila. 20 Ada noana ka Yabal, pade muli Yabal iramo tau to netoꞌo ri tenda pade nompoewu binata. 21 Tuaꞌi Yabal nosanga ka Yubal, pade muli Yubal iramo tau to napande nomore kacapi pade nosasuli. 22 Zila noana ka i Tubal-Kain, pade muli Tubal-Kain iramo tau to najadi topomempe mpengele-ngele parewa nggari tambaga bo ase. Tuaꞌi besi i Tubal-Kain nosanga ka i Naama.
23 Naria saeo i Lamekh nanguli ka rongona rombaꞌa iweꞌi:
“Ada bo Zila, epemo tesaku!
Rongo i Lamekh petalingamo jaritaku eꞌi!
Aku nompatesi sambaꞌa kabilasa sabana iꞌa nombatimbe aku.
Aku nompatesi iꞌa sabana iꞌa nombaboba aku.
24 Ane i Kain rapatesi ntau, pesuku tau etu pitu nggani katomona nggari pesuku i Kain,
Tapi ane aku rapatesi ntau, pesuku tau etu kana pitumpulu bo pitu nggani katomona!”
Tesa Set bo Enos
25 Naliu i Habel nipatesi i Kain, Adam nosampaturu woꞌumo ante rongona, pade natiana woꞌumo rongona. Tempo nagana mbulana iꞌa nangote sambaꞌa ngana langgai to nipoposangana i Set.c Niulina, “Alatala nombawai ka aku sambaꞌa ngana langgai nanjambei i Habel sabana iꞌa nipatesi i Kain.”
26 Sangga nabetemo i Set iꞌa noana ka sambaꞌa ngana langgai to nipoposangana Enos. Tempo etu nompamulamo manusia nanguli sanga i PUE tempo nepue.