Manusia nanawu riara silaka
3
Nggari pura-pura binata ntanina to nipajadi i PUE Alatala ule to neliu nggataꞌuna. Naria sanggani ule nompekutana besi iweꞌi: “Nakono Alatala nombatagi komi manggoni wua nggari pura-pura kayu riara pampa eꞌi?”2 Nesonomo besi etu, “Daꞌa iwetu. Pura-pura wua kayu riara pampa eꞌi mamala rakoni kami. 3 Tapi aga wua kayu ri tatongo pampa etu nitagi Alatala rakoni kami. Niulina ka kami, ‘Ane komi manggoni bara mantui wua etu, komi kana mamate.’ ”
4 Tapi nesonomo ule etu, “Daꞌa nakono! Komi daꞌa ntoto mamate! 5 Ninjani Alatala ane komi manggoni wua kayu etu pekiri komi manotomo. Komi kana majadi ewa Alatala mboto. Ranjani komimo anu nabelo bo anu najaꞌa.”
6 Besi etu nanggita wua kayu etu nagaya mpuꞌu bo nabelo ane rakoni. Pade nipekirina isema manggoni wua kayu etu kana majadi manoto. Jadi nipuinamo wua kayu etu pade nikonina. Pade niwaina woꞌu ka rongona langgai to nosanggani-nggani ante iꞌa, pade iꞌa woꞌu nanggoni wua kayu etu. 7 Naopu etu nanotomo pekiri ira pade ninjani iramo koro ira etu nelaya. Jadi niala ira njamboko tawa kayu ara nijau nipajadi pewo.
8 Kangguwiana eo etu ira njamboko nangepe i PUE Alatala narata nenjayo-njayo riara pampa etu. Nangepe etu nalaimo ira netabuni riara nggayu ri pampa etu ala neꞌe rakita i PUE Alatala. 9 Tapi i PUE Alatala nompokio langgai etu. Niulina, “Adam, ri umba iko?”
10 Nesonomo langgai etu, “Niepeku Komi nenjayo-njayo riara pampa eꞌi, pade naekamo raraku sabana aku nelaya. Etu sampe aku nalai netabuni.”
11 Nangulimo Alatala, “Isema nanguli iko nelaya? Bara nikonimu wua kayu to nitagiku etu?”
12 Nesonomo langgai etu, “Besi to niwai Komi momporoa aku etu, iꞌa nombawai ka aku wua kayu etu, pade nikoniku.”
13 Naopu etu nangulimo i PUE Alatala ka besi, “Nokuya iko nompowia etu?”
Nesonomo besi etu, “Ule etu nombabagiu aku sampe aku nanggoni wua kayu etu.”
Alatala nombasuku manusia
14 Naopu etu nangulimo i PUE Alatala ka ule, “Iko nasala sabana iko nombabagiu manusia. Etu sampe nggari pura-pura binata naila bo pura-pura binata namou aga ikomo to rajanjiaka. Nompamula eo eꞌi iko kana mekanjoyo ante taꞌimu molumako ri bunggu ntana, pade panggonimu aga sowu ntana sampe iko mamate. 15 Aku mompowia iko ante besi mosipowua mata, pade mulimu ante mulina woꞌu mosipowua mata. Muli nu besi etu kana mombatampadu mpakaoya balenggamu, pade iko woꞌu mombateo padu kada nu mulina.”
16 Pade nanguli woꞌumo i PUE Alatala ka besi etu, “Aku mantambai kasusamu tempo matiana, pade tempo iko mangote ngana kana majuꞌa mpuꞌu muepe. Tapi mabete mpuꞌu raramu mosanggani ante rongomu, pade iko kana matundu ri jaꞌina.”
17 Pade nangulimo i PUE Alatala ka langgai, “Iko nantuki pantesa rongomu besi sampe iko nanggoni wua kayu to nitagiku etu. Sabana powiamu etu natejanjiakamo tana. Iko kana mokarajaa ntomo mangelo katuwumu sampe iko mamate. 18 Kawoko bo karui kana matuwu ri tana eꞌi, pade panggonimu aga mopuꞌu nggari asele ntana. 19 Iko kana mokarajaa ntomo ante matiti inimu mangelo panggonimu sampe kaopuna iko manjili majadi tana. Sabana iko nipajadi nggari tana, pade iko kana manjili mpaka ri tana.”
20 Adam nompoposanga rongona besi etu i Hawaa sabana besi etumo to najadi indo nu pura-pura manusia to matuwu ri dunia.
21 Naopu etu i PUE Alatala nangala kulimba binata nipowiana pakea ka Adam bo rongona i Hawa, pade nipopasuanamo pakea etu ka ira.
Adam bo Hawa nipopalai nggari Pampa Eden
22 Naopu etu nangulimo i PUE Alatala, “Kita weꞌi. Manusia najadi ewa Kita, ninjani iramo belo bo jaꞌa. Jadi neꞌe sampe ira mompui pade manggoni wua nggari kayu to mombawai katuwua. Sabana ane ira manggoni etu ira kana matuwu sampe ri kasae-saena.” 23 Jadi i PUE Alatala nompopalai manusia nggariara Pampa Eden pade nompakau ira mokarajaa tana to nipake Alatala nombapandu ira. 24 Naopu manusia nipopalai nggari Pampa Eden, i PUE Alatala nompakau bara sakuya mbaꞌa malaekana to niuli Kerub mombajagai bagia kamataeona nggari Pampa Eden etu. Pade naria samata guma ante ira to najela ewa apu to nanggasoe gusaꞌa guseꞌi mombalawa jala mesua mpaka ri kayu to mombawai katuwua.