KAJADIA
Tesa kajadia langi bo dunia
1
Ri lamba pamulana Alatala nompajadi langi bo dunia. 2 Tempo etu dunia daꞌapa nolenje, daꞌapa ria isina. Rumau mpii nombatutu ue bete. Pade Nosa Nagasa nu Alatala nantaya-ntaya ri baꞌa nu ue etu.3 Nangulimo Alatala, “Kajadimo reme!” Pade najadi mpuꞌumo reme. 4 Nikita Alatala reme etu nabelo, pade nipopogaꞌana reme etu ante rumau. 5 Naopu etu nipoposangana reme etu Eona, pade rumau etu nipoposangana Nggawengina. Naeo nawengi, etumo eo pamulana.
6 Pade nanguli woꞌumo Alatala, “Kajadimo sangele to nompopogaꞌa ue etu majadi robagia.” Pade najadi mpuꞌumo iwetu. 7 Jadi Alatala nompopogaꞌa ue, sagaꞌa ri wayona pade sagaꞌa ri baꞌana. 8 Pade nipoposangana to nompopogaꞌa ue etu Laerawa. Naeo nawengi, etumo eo karoena.
9 Naliu etu nanguli woꞌumo Alatala, “Pura-pura ue ri wayo laerawa etu kana moili mompakasalibo ala maria rakita tana to nabaina.” Pade najadi mpuꞌumo iwetu. 10 Nipoposangana tana to nabaina etu Kabatana, pade kasiromu nu ue etu nipoposangana Tasi. Nikita Alatala panggawiana etu nabelo puramo.
11 Pade nanguli woꞌumo Alatala, “Kajadimo pura-pura anu natuwu ri tana, etumo mompengele kayu mowua, pade mompengele tuja-tuja to noongu ewa pae bo jole.” Pade najadi mpuꞌumo iwetu. 12 Nggari tana etu neumba puramo to natuwu ri tana, etumo kayu mowua, pade nompengele tuja-tuja to noongu. Naopu etu nikita Alatala panggawiana etu nabelo puramo. 13 Naeo nawengi, etumo eo katolueona.
14 Pade nanguli woꞌumo Alatala, “Kajadimo anu mareme ri langi ala mompopogaꞌa wengina bo eona. Anu nareme etu majadi tandai ala ranjani ntau moreke eona, mpaena bo eo bete agama. 15 Kajadimo to naremena etu ri langi ala mompakareme dunia.” Pade najadi mpuꞌumo iwetu. 16 Alatala nompajadi rongaya anu nareme to nabetena ri langi. To neliu nggabetena etumo mata eo rapompakareme ri eona, pade to nanggedina etumo wula rapompakareme ri wengina. Pade nipajadina woꞌu betuꞌe-betuꞌe. 17 Pura-pura anu nareme etu niboli Alatala ri langi ala mompakareme dunia, 18 pade ala majadi tandai eona bo wengina, pade mompopogaꞌa tempo nareme ante tempo narumau. Nikita Alatala panggawiana etu nabelo puramo. 19 Naeo nawengi, etumo eo kapataeona.
20 Pade nanguli woꞌumo Alatala, “Kajadimo mompengele bau riara ue pade mompengele tonji ri laerawa.” 21 Jadi Alatala nompajadi puramo bau bete riara ntasi bo nompengele bau ntanina natuwu riara ue bo nompengele lenje tonji. Pade nikita Alatala panggawiana etu nabelo puramo. 22 Naopu etu nigane Alatalamo binata-binata etu. Niulina ka bau, “Poanamo pade momuli mpakadea-dea ala mombaisi tasi.” Pade niulina ka tonji-tonji, “Pomulimo mpakadea-dea ri dunia.” 23 Naeo nawengi, etumo eo kalimaeona.
24 Naliu etu nanguli woꞌumo Alatala, “Kajadimo mompengele binata ri kabatana, etumo mompengele binata namou bo naila.” Pade najadi mpuꞌumo iwetu. 25 Jadi Alatala nompajadi nompengele binata namou bo naila. Pade nikitana panggawiana etu nabelo puramo.
26 Naopu etu nanguli woꞌumo Alatala, “Kamaimo Kita mompajadi manusia nantuki lenjeta mboto ala ira mpuꞌu-mpuꞌu ewa Kita. Ira kana rapakakuasa ka pura-pura bau riara ntasi, tonji-tonji ri laerawa, pura-pura binata namou bo naila, bo pura-pura isi dunia.” 27 Jadi Alatala nompajadi manusia nantuki lenjena mboto; ewa lenje nu Alatala ira nipajadina. Manusia etu nipajadina langgai bo besi. 28 Naopu etu niganena ira. Niulina, “Poanamo komi pade momuli mpakadea-dea mombaisi bo mombakuasai dunia. Aku mompakakuasa ka komi pura-pura bau riara ntasi, tonji-tonji to nembua ri laerawa bo pura-pura binata to natuwu ri kabatana.”
29 Pade nanguli woꞌumo Alatala, “Kitamo! Kuwai ka komi pura-pura tuja-tuja to noongu ewa pae bo pura-pura kayu mpowua majadi panggoni komi. 30 Tapi ane binata-binata bo tonji-tonji, kuwai ka ira kawoko ante tawa-tawa nggayu majadi panggoni ira.” Pade najadi mpuꞌumo iwetu.
31 Naopu etu nikita Alatala pura-pura to nipowiana mpuꞌu-mpuꞌu nabelo. Naeo nawengi, etumo eo kaonoeona.