Zuifʋʋ ‑cɩan zʋa ‑Zezuu ‑yɔgbʋ
14
Nɩɩ,
we ‑tʋ 'wʋ 'ylɩ 'sɔ 'Wʋzɩtɩylɩɩ 'fɛtɩ ‑yɔ Zuifʋʋ 'floo 'nɩa gɔɔ ‑yɔ ‑kaa 'fɛtɩ 'ka nyni.
‑Lagɔbʋbɔnyaa ‑cɩan ‑yɔ ‑Lagɔɔ titee gwesanya yia ‑Zezuu ‑yɔylɩ pla wa 'ka ɔ kpa ‑dawli nya,
'ɩn wa 'ka ɔ 'bha.
2 Wa nɛɛ:
«‑A 'na kpalɩ ɔ 'fɛtɩɩ 'ylɩ nya ‑nɩ.
We 'nɩ ‑mʋʋ,
'ɩn 'gbe gbugblolua.»
'Ŋwnɔ yabhlo slua ‑Zezu 'wluo ‑lasiklɔ
3 ‑Zezu mɩa Betani,
sɔlɩbhanyɔ 'Simɔɔɔ ‑budu zɔ,
da ɔ mɩa lida,
'ɩn 'ŋwnɔ yabhlo yia ‑mɔ pla.
Ɔɔ 'ŋwnɔ,
ɔ ka ‑bhonyida kwɛɛ.
‑Lasiklɔ ‑zɔnʋ,
‑we ka ‑valɛ 'tɛa,
we mɩ we 'wʋ.
Ɔ ‑dɩa wee ‑bhonyida ‑blɩ ŋwɛɛ,
'ɩn ɔ yia wee ‑lasiklɔ ‑Zezuu 'wluo slu.a
4 Nyɩma tɔlʋa mɩa ‑bha,
'ɩn ‑maa yia 'cɛ 'pa,
‑zugba wa 'yɩbhalɩ yɩbhalɩ la:
«Lɛɛ ‑lu ka 'gbʋ ɔ nyumɔ ‑lasiklɔ nɩa?
5 Wa mneni yaa wa 'ka we pɛlʋ 'pa 'gwɛzi duun lʋ,
‑we nyɩmɛ 'kaa 'yɩ ‑zʋ ŋwɛɛ,
'ɩn wa 'ka we bobabhanya 'nyɛ.»
'Ɩn wa yia ɔɔ 'ŋwnɔ ‑yɔ 'cɛpalɩ.
6 ‑Zezu nɛɛ wa ‑yla:
«Lɛɛ ‑lu ka 'gbʋ a sɩalɩ ɔa?
A 'tide ɔ 'yi.
‑We ɔ nʋa 'mɩ ‑yla lɛ,
gbʋ ‑zɔnʋ ‑wa.
7 Nɩɩ,
bobabhanya mɩ aɩn glaa 'ylɩ weee nya.
Da a ‑ka 'yɩbhalɩ,
a mneni a 'ka wa 'nanɩ 'wʋnʋ.
Nɩɩ,
‑amɩ mɩa,
ɩn 'nɩ aɩn glaa ‑mɩ 'ylɩ weee nya.
8 ‑We ɔ mnenia,
'mʋ ɔ nʋa 'mɩ ‑yla lɛ.
Nɩɩ,
‑lasiklɔ ɔ tlia 'mɩ ‑yɔ gbawlaa 'gbʋ 'gamʋ.
9 Ɩn nɛɛ aɩn ‑yla gbʋzɔnʋ saɛ:
da wa yia ‑Lagɔgbʋ gbaa dʋdʋ weee ‑gʋ,
‑we ŋwnɔ nɩ nʋa da lɛ,
gbaa wa yia we,
'ɩn ɔ lɛnʋgbʋ 'ka nyɩmaa dlɩ 'wʋ ‑tʋ.»
Zudasɩ 'yɩbha ɔ 'ka ‑Zezu wla
10 ‑Zezuu 'bɩnɔnya kugbua lɛ 'sɔ glaa,
nyɩmɛ yabhlo,
wa laa Zudasɩ Isɩkaliɔtʋ,
mɔ mnɩa ‑Lagɔbʋbɔnyaa ‑cɩan ‑gbɛ,
ɔ 'ka ‑Zezu wla.
11 Wa 'nʋa we,
'ɩn we yia wa 'mʋna 'wʋla.
'Ɩn wa nɛɛ ɔ ‑yla:
«'Gwɛzi ‑a yia ‑mɩ 'nyɛa.»
Sa ɔ 'kaa nʋ ɔ 'ka ‑Zezu wla,
‑bha ɔ bhlia we 'yooo datalɩe.
‑Zezuu 'bɩnɔnya pia 'Wʋzɩtɩylɩɩ 'fɛtɩ ‑gʋ ‑lililu
12 'Floo 'nɩa gɔɔ ‑yɔ ‑kaa 'fɛtɩ ka nyni.
We 'ylɩɩ tɩanʋ ‑we nya wa bhaa bhlabhlɛyua 'Wʋzɩtɩylɩɩ 'fɛtɩ ‑gʋ ‑lililu nya,
wee 'ylɩ nya ‑Zezuu 'bɩnɔnya 'yɩbhaa ɔ laɛ:
«Mɔ ‑ɩn 'yɩbha ‑a mnɩ ‑mɩ ‑yla 'Wʋzɩtɩylɩɩ 'fɛtɩ ‑gʋ ‑lililu pia?»
13 ‑Zezu tiea ɔ 'bɩnɔnya 'sɔ,
'ɩn ɔ nɛɛ wa ‑yla:
«A mnɩ ‑zɔɔ.
A ‑ka ‑mɔ nyni,
nyɩmɛ ‑ɔ 'nyunyida mɩa 'wlu,
a ‑yɔ ɔ yia 'wʋgbelia,
a mnɩ ɔ 'bɩ.
14 Ɔ ‑ka ‑budu ‑mʋmʋ zɔ pla,
a gba wee ‑buduu ‑kanyɔ ‑yla:
‹‑Amɩaa ‑Kanyɔ nɛɛ,
«'Lee,
‑buduu 'yu ‑we zɔ ‑a 'kaa ‑amɩaa 'Wʋzɩtɩylɩɩ 'fɛtɩ ‑gʋ ‑lililu li nɩ,
mɔ we mɩa?» ›
15 'Ɩn ɔ slolua aɩn ‑buduu 'yu 'kadʋ yabhlo 'klʋ,
‑mɔ ‑budu 'wlu,
‑we zɔ ‑gʋladɩ ‑li ‑zɔnʋ mɩa.
‑Mɔ a 'kaa ‑amɩaa 'Wʋzɩtɩylɩɩ 'fɛtɩ ‑gʋ ‑lililu pili.»
16 Wa mnɩa,
wa nynia ‑zɔɔ,
'ɩn sa ‑Zezu gbaa wa ‑yla,
'ɩn wa yi 'saa we ylɩ.
'Ɩn wa yia wa 'fɛtɩ ‑gʋ ‑lililu pi.
‑Zezu ‑yɔ ɔ wlawlanyɔ lia
17 Jibhe zɔa,
'ɩn ‑Zezu ‑yɔ ɔ 'bɩnɔnya kugbua lɛ 'sɔ yia yi.
18 Da wa mɩa lida 'tabhle ‑gʋ,
‑Zezu nɛɛ:
«Ɩn nɛɛ aɩn ‑yla gbʋzɔnʋ saɛ:
aɩn glaa,
nyɩmɛ yabhlo ɩn ‑yɔ ɔ mɩa da lida nɩ,
mɔ yia 'mɩ wlaa.»
19 Tɔʋn,
wa plɛ sumanɩa,
'ɩn wa yia ɔ layɩbha ‑bhlo ‑bhlo.
«We 'nɩ ‑amɩ,
we 'nɩ mʋʋ?»
20 Ɔ nɛɛ wa ‑yla:
«Amɩa kugbua lɛ 'sɔ glaa nyɩmɛ yabhlo ‑wa.
Ɩn ‑yɔ ɔ 'sɔ mɩ 'floo 'ŋwada zapʋ ‑bhlo lʋ.
21 Gbʋzɔnʋ ‑wa:
sa we mɩa cɛlɩda ‑Lagɔsɛbhɛ 'wʋ ɔ daa,
'sa ɔɔ Nyɩmɛɛ 'Yu yia mnɩa.
Nɩɩ,
nyɩmɛ ‑ɔ 'kaa ɔ wla,
'ɩn wa 'ka ɔ 'bha,
gbʋnyuu mɩ ‑mɔɔ ‑nʋ nya.
Wa 'nɩ yaa ‑mɔɔ gwalɩ,
we nanɩ 'yli.»
‑Zezu ‑yɔ ɔ 'bɩnɔnya lia
22 Wa mɩa lida,
'ɩn ‑Zezu yia 'floo 'wʋbhu.
Ɔ 'paa ‑Lagɔ fuo,
'ɩn ɔ yia we ladɩdlɩ.
Ɔ dlilia we ɔ 'bɩnɔnya 'wʋla,
'ɩn ɔ nɛɛ:
«A 'bhu we 'wʋ,
na ku ‑wa.»
23 ‑Mʋʋ 'bɩgʋ,
'ɩn ɔ yia nʋ ‑kɔpʋ 'wʋbhu,
ɔ 'paa ‑Lagɔ fuo,
'ɩn ɔ yia we wa yoo 'nyɛ ‑bhlo ‑bhlo,
'ɩn wa 'dɛ weee yia we 'ma.
Ɔ nɛɛ:
24 «‑We mɩa da nɩ,
mʋ ‑wa na 'pɩɔn ‑we yia jitea nyɩma duuun 'gbʋ,
'ɩn we 'ka ‑Lagɔ ‑yɔ nyɩma 'sɔ 'wʋsuslolu.
25 Nɩɩ,
ɩn nɛɛ aɩn ‑yla gbʋzɔnʋ saɛ:
zlɩ ‑Lagɔ ‑ka dʋdʋ 'wlulapɩlɩ,
we zlɩ na maa nʋ lolu.
We 'ylɩ 'nɩ ‑slɔ nyni,
ɩn 'na 'ka nʋ 'ma.»
26 Wa bhlɩa ‑Lagɔ ‑lʋʋ 'bhie,
wa yia 'tla,
'ɩn wa yia Olivʋsunyaa ‑gɔgɔ 'wlu mnɩ.
‑Zezu nɛɛ nɩɩ, Piɛlɩ yia ɔ gbʋ kpɛlɩa
27 ‑Zezu nɛɛ wa ‑yla:
«'Bɩ a yia 'mɩ 'bhʋa.
Nɩɩ,
we mɩ cɛlɩda ‑Lagɔsɛbhɛ 'wʋ:
‹Bhlabhlɛɛ 'yliyɔzʋnyɔ na yia 'bhaa,
'ɩn bhlabhlɛnya 'ka lamnɔ.›
28 Nɩɩ,
ɩn ‑ka tlɩ,
ɩn ‑ka 'wʋsɔ lʋ,
Galilee na yia aɩn wʋlʋa mnɩa.»
29 Piɛlɩ nɛɛ ɔ ‑yla:
«Nyɩma weee ‑ka ‑mɩ 'bɩ 'bhʋ,
‑amɩ 'na 'ka we lɛnʋ.»
30 'Ɩn ‑Zezu yia we 'bɩgʋpalɩɛ:
«Ɩn nɛɛ aɩn ‑yla gbʋzɔnʋ saɛ:
‑zɛɛn sabɔ mɩa,
‑na kpɛlɩ na gbʋ 'wʋla ‑zakpa ta,
‑zugba ‑kʋkɔ 'nɩ ‑slɔ ‑zakpa 'sɔnʋ gbo.»
31 Piɛlɩ nɛɛ ‑bhlokpadɛɛ:
«‑Ɩnnya,
we 'nɩ ‑mʋʋ!
We ‑ka 'bha wa 'ka ‑ɩn ‑yɔ 'mɩ 'sɔ 'bha,
ɩn 'na 'ka ‑na gbʋ kpɛlɩ.»
Tɔʋn,
wa 'dɛ weee yia wee wɛlɩ ‑bhlo gba.
‑Zezu bhubhoea ‑Lagɔ Gɛtɩsemanee
32 ‑Mʋʋ 'bɩgʋ,
‑Zezu ‑yɔ ɔ 'bɩnɔnya 'sɔ nynia Gɛtɩsemanee,
'ɩn ɔ nɛɛ wa ‑yla:
«A ‑dɩ dɛ la.
Ɩn 'ka ‑Lagɔ bhubhoe.»
33 Ɔ ‑yɔ Piɛlɩ klaa,
'Zake klaa,
we ‑yɔ Zaan,
wa yia mnɩ.
‑Bha ɔ ‑gʋ yia,
'ɩn 'pɩɔn yia ɔ dlɩ 'wʋ slo.
34 Ɔ nɛɛ wa ‑ylaɛ:
«Na dlɩ ka sumanɩ bhabha.
A ‑tʋ ‑seli,
a ‑tʋ 'yliyɔgada.»
35‑36 Ɔ bɛa 'yu ‑sɛ, ɔ ‑gblia dʋdʋ la, 'ɩn ɔ yia ‑Lagɔ bhubhoe, ɔ nɛɛ: «*Aba! Dide! ‑Ɩn mneni ‑ɩn 'ka ‑lu weee lɛnʋ. ‑Ɩn ‑ka we 'yɩbha nɩ, ‑ɩn vlalɩ 'mɩ sɩasɩe 'kadʋ ‑mɩnɩ gwe. Nɩɩ, we 'na ‑zɛlɩ na dʋmagbʋ ‑nɩ: we ‑zɛ ‑na dʋmagbʋ.»
37 Ɔ yia ɔ 'bɩnɔnyaa ‑gbɛ lʋ,
‑zugba wa mɩ 'ylaa 'wʋ.
Ɔ nɛɛ Simɔ Piɛlɩ ‑yla:
«'Ylaa ‑na ŋwɔa yɩ?
‑Ɩn 'nɩ mneni ‑ɩn 'ka 'yliyɔgada ‑tʋ 'lɛlɩ ‑bhloo ‑kpʋaa?
38 A ‑tʋ 'yliyɔgada,
a bhubhoe ‑Lagɔ,
a yi laylagbʋ lʋ bhlili.
Nɩɩ,
nyɩmɛɛ dlɩ 'yɩbha we 'ka ‑lu ‑zɔnʋ lɛnʋ,
'ɩn ɔ ku 'nɩ we mneni.»
39 Tɔʋn,
ɔ 'bhʋ 'yaa wa ‑yɔ lʋ,
'ɩn ɔ yia ‑Lagɔ bhubhoe wɛlɩ ‑bhlokpadɛ nya.
40 Ɔ yia lʋ,
‑zugba wa mɩ 'ya 'ylaa 'wʋ,
wa 'yli ka 'wʋwɔmanɩɩ 'gbʋ.
Wɛlɩ ‑we wa 'kaa ɔ ‑yla gba,
we 'nɩ ‑mɩ.
41 Ɔ yia lʋ ‑zakpa tanʋ nya,
ɔ nɛɛ wa ‑ylaɛ:
«A mɩ 'ylaa 'wʋ ‑bhlokpadɛ,
nyapɛda a mɩa yɩ?
We ‑tʋ 'sa.
Da wa 'kaa Nyɩmɛɛ 'Yu wla gbʋnyuu ‑lɛnʋnya ‑yla,
we bhla ka nyni.
42 A ‑sɔ 'wʋ,
‑a 'ka mnɩ.
A ‑talɩ,
nyɩmɛ ‑ɔ 'kaa 'mɩ wla,
mɔ yia mɔ.»
‑Zezu wa yia kpaa
43 Da ‑Zezu mɩa gbada,
wɛlɩ mɩ ɔ ŋwɛɛ,
tɔʋn Zudasɩ yia yi.
Ɔɔ Zudasɩ mɩa,
ɔ mɩ ‑Zezuu 'bɩnɔnya kugbua lɛ 'sɔ glaa.
'Ɩn ɔ ‑yɔ nyɩmaa ‑zlo yia yi,
tʋgʋgblɛ ‑yɔ su kibhe nya kwɛɛ.
Nɩɩ,
‑Lagɔbʋbɔnyaa ‑cɩan klaa,
‑Lagɔɔ titee gwesanya klaa,
we ‑yɔ nyɩma kpasɩ,
ma tiea wa.
44 Zudasɩ,
‑ɔ 'kaa ‑Zezu wla,
sa ɔ 'kaa ɔ wla,
ɔ ka we wa ‑yla gba.
Ɔ nɛɛ:
«Nyɩmɛ ɩn ‑ka gbleli nɩ,
mɔ ‑wa.
A kpa ɔ,
a ‑yɔ ɔ 'sɔ mnɩ,
a zʋ ɔ 'yliyɔ 'nanʋʋ.»
45 Zudasɩ nynia ‑Zezu kwesi,
'ɩn ɔ nɛɛ:
«*Wlabi.»
'Ɩn ɔ yia ɔ gbleli.
46 ‑Bha wa yibhelia ‑Zezu,
'ɩn wa yia ɔ kpa.
47 Ɔ 'bɩnɔnyɔ yabhlo ‑saa tʋgʋgblɛ tʋkpa 'wʋ tɔʋn,
ɔ yia ‑Lagɔbʋbɔnyaa ‑kanyɔ 'kadʋʋ zɔlubhonʋnyɔ yabhlo yukwli 'wlu ‑dɩ.
48 ‑Zezu nɛɛ wa ‑yla:
«'Wienyɔ ɩn ‑mɩa,
'ɩn a yia 'mɩ kpaa yi tʋgʋgblɛ ‑yɔ su kibhe nya kwɛɛ ‑nya yɩ?
49 ‑Ɩnnya,
'ylɩ weee nya,
ɩn mɩ aɩn glaa gbʋ ‑sloluda ‑mɔ ‑Lagɔbudu 'kadʋ zɔ,
'ɩn a 'nɩ 'mɩ kpa.
Sanɛɛ a kpaa 'mɩ,
'ɩn ‑we mɩa cɛlɩda ‑Lagɔsɛbhɛ 'wʋ,
we 'ka gbʋzɔnʋ ‑zɛɛ 'gbʋ.»
50 Tɔʋn,
'ɩn ɔ 'bɩnɔnya yia ‑bha ɔ tɩ ‑gwagwɩe nya.
51‑52 Nyimeslɔyu yabhlo yia ɔ 'bɩ, ɔ ka 'naa ‑bhlogbɔɔ ‑gʋ. Wa kpaa wee 'naa, 'ɩn ɔ yia we wa kwɛɛ tɩ, 'ɩn ɔ yia ‑gwa kpanʋ nya.‑Zezu wa kwaa gbʋwʋbhunya 'kadɩ 'yu
53 Wa yia ‑Zezu ‑Lagɔbʋbɔnyaa ‑kanyɔ 'kadʋʋ ‑gbɛ kwa.
Da ‑Lagɔbʋbɔnyaa ‑cɩan klaa,
nyɩma kpasɩ klaa,
we ‑yɔ ‑Lagɔɔ titee gwesanya weee,
wa gbelia 'wʋ.
54 Piɛlɩ mɩ ‑Zezu 'bɩ,
ɔ 'nɩ ɔ ‑yɔ cɩpa.
Ɔ plalɩa ‑Lagɔbʋbɔnyaa ‑kanyɔ 'kadʋʋ ‑buduŋwɛɛ,
'ɩn ɔ yia ‑kosu ‑yɔ ladɩ,
ɔ ‑yɔ 'slʋja 'sɔ.
55 ‑Lagɔbʋbɔnyaa ‑cɩan ‑yɔ gbʋwʋbhunya weee tɩtalɩa ‑Zezu ‑yɔ la wa 'ka ɔ gbʋ ‑dɩlɩ,
'ɩn wa 'ka ɔ 'bha,
wa 'nɩ gbʋ yabhlogbɔɔ 'yɩ.
56 Nyɩma ‑duun zʋlʋa ɔ yo ‑yɔ,
'ɩn ‑maa wɛlɩ 'nɩ bhli ‑bhlo.
57 Tɔlʋa ‑sɔa 'wʋ,
‑maa dɩlɩa ɔ yo gbʋ 'wlu la,
'ɩn ‑maa nɛɛ:
58 «Gbʋ ɔ gbaa,
‑a ka we 'nʋ.
Ɔ nɛɛ nɩɩ,
‑Lagɔbudu 'kadʋ,
‑we nyɩma 'sʋbhaa da nɩ,
‑wlɔa ɔ yia we.
'Ɩn 'ylɩ ta zɔ we ‑putu ‑we nyɩmɛɛ sɔ 'nɩa 'tlili,
ɔ 'ka ‑mʋʋ 'sʋbha.»
59 Wee gbʋ nɩ ‑gʋ,
wa'a gba wɛlɩ ‑bhlo.
60 ‑Lagɔbʋbɔnyaa ‑kanyɔ 'kadʋ ‑sɔa 'wʋ wa nyɩdɩ,
'ɩn ɔ yia ‑Zezu layɩbha:
«Nyɩma nɩ mɩ ‑mɩ gbʋ 'wluladɩlɩda.
‑Ɩn 'nɩ mneni ‑ɩn 'ka we ‑gʋ ‑saa?»
61 ‑Zezu 'nɩ ŋwɛ gba.
Ɔ ‑sɔ yaa 'wʋ,
'ɩn ɔ yia ɔ layɩbha:
«'Lee,
‑Lagɔɔ ‑Bhasanyɔ ‑ɩn ‑mɩa yɩ?
‑Lagɔ ka 'ŋnɩ ‑a mnɩnɩa,
ɔ 'Yu ‑ɩn ‑mɩa yɩ?»
62 ‑Zezu yia we 'bɩgʋpalɩ:
«Cɩɩn,
'mɔ ɩn ‑mɩa.
Nyɩmɛɛ Yu yia 'tɩtɛ ‑ka ‑Lagɔɔ lilisɔlʋ ladɩa.
'Yɩa a yia ɔ yalɩpʋpa ‑gʋ we nya kwlida.»
63‑64 ‑Lagɔbʋbɔnyaa ‑kanyɔ 'kadʋ yia ɔ 'naa yla 'cɛ nya. Ɔ nɛɛ: «Ɔ ka ‑Lagɔ vɛlɩ, a 'dɛ weee ka we 'nʋ. ‑A 'nɩ ‑slɛɛn gbʋdayɩnyɔɔ gbʋ ‑ka.»
Ɔ nɛɛ wa ‑yla: «Amɩa nɛɛ lɛa?»
Wa nɛɛ: «Ɔ ka gbʋnyuu lɛnʋ.»
‑Zugba wa kpɩa 'wʋ: «A 'bha ɔ! A 'bha ɔ! A 'bha ɔ!»
65 Nyɩma tɔlʋa slua ɔ ‑dlɛ ‑gʋ.
Wa ‑gblia ɔ 'naa 'yli ‑gʋ,
'ɩn wa yia ɔ bhɩtɩ ‑kwli nya,
wa nɛɛ ɔ ‑yla:
«Nyɔɔ 'pa ‑mɩ ‑lua?
‑Ɩn gba ɔ 'ŋnɩ!»
'Ɩn 'slʋja yia ɔ 'kpa yukwli 'wʋ sʋbha.
Piɛlɩ kpɛlɩa ‑Zezuu ‑gʋgbʋ
66‑67 Nɩɩ, da Piɛlɩ mɩa 'wɔlɔda ‑mɔ wee ‑buduŋwɛɛ, 'ɩn ‑Lagɔbʋbɔnyaa ‑kanyɔ 'kadʋʋ zɔlubhonʋŋwnɔ yia yi. Ɔ 'yɩa Piɛlɩ, 'ɩn ɔ yia ɔ yla tenyii, 'ɩn ɔ nɛɛ ɔ ‑yla: «‑Mɩ mɩa da, ‑ɩn ‑yɔ Nazalɛtɩyu ‑Zezu 'sɔ mɩ ‑benyi.»
68 Piɛlɩ nɛɛ:
«Yo ‑wa yo,
ɩn 'nɩ ɔ ‑yi.
‑We a gbaa dɛ nɩ,
ɩ'ɩn 'nʋ we 'wʋla.»
Tɔʋn,
'ɩn ɔ yia 'wʋsɔ,
ɔ yia klolo ŋwɛɛ 'yligbe.
'Ɩn ‑kʋkɔ yia gbo.
69 Ɔɔ 'ŋwnɔ 'yɩ 'yaa ɔ,
‑wa mɩa ‑bha,
ɔ nɛɛ wa ‑yla:
«Ɔɔ nʋkpasu mɩa da nɩ,
ɔ mɩ waa nyɩma nɩ glaa.»
70 Piɛlɩ nɛɛ:
«Yo ‑wa yo.»
Tɔʋn,
‑wa mɩa ‑bha,
wa nɛɛ Piɛlɩ ‑yla:
«Gbʋzɔnʋ ‑wa,
‑ɩn mɩ wa glaa.
Nɩɩ,
Galilee ‑nyɩmɛ ‑ɩn ‑mɩa.»
71 'Ɩn Piɛlɩ yia bi,
ɔ nɛɛ:
«Nyɩmɛ a saa dɛ 'ŋnɩ,
ɩn 'nɩ ɔ ‑yi,
ɩn ‑ka yo 'tʋbhʋ,
‑Lagɔ 'pa 'mɩ ‑kaslʋ 'wʋ!»
72 ‑Bha ‑bhlokpadɛ,
‑kʋkɔ yia ‑zakpaa 'sɔnʋ gbo,
'ɩn Piɛlɩɩ dlɩ yia ‑Zezuu wɛlɩ ‑gʋ ‑bho,
nɩɩ,
ɔ kpɛlɩ ‑Zezu gbʋ 'wʋla ‑zakpa ta,
‑zugba ‑kʋkɔ 'nɩ ‑slɔ ‑zakpaa 'sɔnʋ gbo.
'Ɩn Piɛlɩ yia wie bhli.