‑Zezuu ‑zɔɔ ‑nyɩma 'nɩ ɔ gbʋ ŋwnu
6
‑Zezu 'bhʋa ‑bhɛdɛ,
'ɩn ɔ ‑yɔ ɔ 'bɩnɔnya 'sɔ yia ɔ ‑zɔɔ mnɩ.
2‑3 Wa Nyapɛylɩ nya, 'ɩn ‑Zezu yia wa ‑Lagɔbudu zɔ mnɩ, 'ɩn ɔ yia ‑mɔ gbʋ ‑slolu. Nyɩma, ‑wa ɔ mɩa ‑sloluda, we ‑sʋbhalɩa wa ŋwɛgaga, 'ɩn wa nɛɛ: «Ɔɔ mɩa dɛ nɩ, ɔ 'nɩ Maliii yuu? 'Lee, ɔ 'nɩ 'Zake klaa, Zozee klaa, Zudɩ klaa, we ‑yɔ 'Simɔɔɔ bhelii? Ɔ bhɔlɔa 'nɩ da ‑aɩn glaa ‑mɩɩ? Ɔɔ mɩa dɛ nɩ, ‑budukʋnyɔ ‑wa. Wee gbʋ mɩa dɛ nɩ, da ɔ salɩ wea? Gbʋyilo ‑mʋmʋ ‑Lagɔ 'nyɛ ɔmɔ, ɔ 'ka ‑aɩn ‑slolua? Nyɔɔ 'nyɛ ɔ 'tɩtɛ, 'ɩn ɔ nʋ gwɛdigbʋ nɩ lɛa?»We 'dɛɛ 'gbʋ, wa 'nɩ ɔ wɛlɩ 'wʋŋwnu.
4 'Ɩn ɔ nɛɛ wa ‑ylaɛ:
«‑Lagɔgbʋʋ ‑falɩpanyɔ ‑ka ‑mɩ,
da weee ‑bha wa zʋa ɔ.
Nɩɩ,
wa'a zʋ ‑bha ɔ ɔ ‑zɔɔ,
ɔ zʋayli we ‑yɔ ɔ ‑buduŋwɛɛ.»
5 We 'nɩ,
ɔ ka nyɩma ‑bhlo ‑bhlo jipe,
wa sɔ ‑gʋ lapalɩe nya 'wʋbhʋ,
ɔ 'nɩ mneni ɔ 'ka gwɛdigbʋ lɛnʋ,
6 'ɩn ɔ nɛɛ:
«Aya!
Ɩn 'nɩ ‑slɔ 'sasʋkpa ‑nyɩma,
‑wa'a zʋa ‑Lagɔ dlɩ ‑gʋ,
'yɩ.»
‑Zezu tiea ɔ 'bɩnɔnya kugbua lɛ 'sɔ
‑Mʋʋ 'bɩgʋ,
'ɩn ‑Zezu yia kwesi ‑gbenya 'wʋplɩlɩ nyɩma gbʋslolue nya.
7 Ɔ laa ɔ 'bɩnɔnya kugbua lɛ 'sɔ,
ɔ 'ka wa tie 'sɔ 'sɔ,
'ɩn ɔ yia wa 'tɩtɛ 'nyɛ,
wa 'ka zuzu 'nyii vu.
8‑9 Ɔ nɛɛ wa ‑yla: «We 'nɩ kɔɔsu ‑bhlogbɔɔ 'wʋbhʋ, a 'na 'bhulu ‑lu yabhlogbɔɔ 'wʋ ‑nɩ. A 'na 'bhulu 'floo 'wʋ ‑nɩ. A 'na 'bhulu ‑bada 'wʋ ‑nɩ. A 'na 'bhulu 'gwɛzi 'wʋ ‑nɩ. Nɩɩ, a ‑pla ‑sakwla bhʋ 'wʋ, a ‑yɔ ‑banaa 'sɔnʋ 'na mnɩnɩ ‑nɩ.10 «A ‑ka 'gbe ‑mʋmʋ 'wʋ nyni,
‑budu ‑we ka ŋwɛɛ a ‑ka ladɩ,
a ‑gʋ ‑bha.
'Ylɩ ‑we nya a 'nɩ ‑slɔ 'wʋsɔ,
a 'na 'bhʋlʋ ‑bha ‑nɩ.
11 'Ɩn da ‑mʋmʋ wa 'nɩ amɩaa 'lakpasu kpa,
wa 'nɩ aɩn yukwli pʋlʋ,
a gbɔtɔ amɩaa bhʋ ‑yɔ ‑bhubhui,
'ɩn nyɩma 'ka we 'jiyibheli nɩɩ,
wa 'nɩ ‑Lagɔgbʋ ‑yɔŋwnu.»
12 Wa mnɩa,
'ɩn wa nɛɛ nyɩma ‑yla nɩɩ,
wa 'bhiti wa dlɩ.
13 ‑Zugba wa vua zuzu 'nyiii ‑zlo,
'ɩn wa slua guzʋnya duun 'kpɩ 'wluo,
'ɩn ‑maa pʋa.
Ewlodʋ wlaa Zaan wa 'ka ɔ 'bha
14 ‑Zezuu 'ŋnɩ mnenia da weee la,
'ɩn dʋdʋʋ 'wlulapɩlɩnyɔ Ewlodʋ yia we 'nʋ.
Ɔ nɛɛ:
«'Zan ‑Batisɩ ‑wa.
Nɩɩ,
mɔ ‑sɔa 'wʋ tlɩtlɩnya glaa.
We 'dɛɛ 'gbʋ ɔ mneni ɔ 'ka gwɛdigbʋ lɛnʋ.»
15 Nyɩma tɔlʋa nɛɛ:
«*Elii ‑wa.»
'Ɩn tɔlʋa nɛɛ:
«‑Lagɔgbʋʋ ‑falɩpanyɔ ‑wa,
bhlasabhla ‑Lagɔgbʋʋ ‑falɩpanyaa 'yabhlo 'bhisa.»
16 Nɩɩ,
Ewlodʋ 'nʋa we,
'ɩn ɔ nɛɛ:
«Zaan ‑wa.
‑Amɩ wlaa ɔ,
'ɩn wa yi bhaa ɔ 'wlu ‑gʋ ‑dɩ.
Mɔ ‑sɔa tlɩtlɩnya glaa 'wʋ.»
17‑20 Nɩɩ, Ewlodʋ mɩa, ɔ ka bha ɔ bheli Filipʋʋ 'ŋwnɔ Ewlodiadɩ ‑mɔɔ ‑glosa, 'ɩn ɔ yia ‑mɔɔ kwa. 'Ɩn Zaan nɛɛ ɔ ‑yla: «Nɩɩ, we 'nɩ 'ylinanɩ ‑Lagɔɔ tite 'wʋ, nyɩmɛ 'ka ɔ 'dɛɛ bhelii 'ŋwnɔ kwa.» ‑Bha Ewlodiadɩ 'paa 'cɛ. Ɔ 'yɩbha ɔ 'ka Zaan 'bha. Nɩɩ, Ewlodʋ sɔa Zaan, 'ɩn ɔ ‑yi we 'ji nɩɩ, ‑Lagɔnyɩmɛ tɩklɩɩ ‑wa. 'Ɩn Zaan ‑ka gbada ‑mɩ, we nanɩ Ewlodʋ dʋdʋ, 'ɩn we bhitia ɔ 'wlukʋʋn. We 'dɛɛ 'gbʋ Ewlodʋ 'yɩbha ɔ 'ka Zaan 'wʋgʋ. 'Ɩn ɔ yia ɔ gbʋan, ɔ yia ɔ ‑kaslʋ 'wʋpa Ewlodiadɩ yi ɔ 'bhaa 'gbʋ.
21 Nɩɩ,
'ylɩ yabhlo nya,
'ɩn Ewlodiadɩ yia ‑jɔlʋ 'yɩ.
We zlɩ mɩa,
Ewlodʋʋ gwalɩylɩ ‑wa.
'Ɩn ɔ yia 'gbee ‑cɩan klaa,
'slʋjaa nyɩma 'kadɩ klaa,
we ‑yɔ Galilee ‑nyɩma kpasɩ la,
wa 'ka 'fɛtɩ ‑sa.
22 Ewlodiadɩɩ 'ŋwnɔyu plaa,
'ɩn ɔ yia lɩtɛ,
'ɩn ɔ yia wa dʋdʋ namanɩ.
‑Bha ɔɔ dʋdʋʋ 'wlulapɩlɩnyɔ Ewlodʋ gbaa ɔ ‑yla:
«Nɩɩ,
‑we a ‑ka 'yɩbha,
a ‑zlalɩ 'mɩ we,
'ɩn ɩn 'ka we aɩn 'nyɛ.»
23 'Ɩn ɔ yia ɔ ‑yla biɛ:
«Nɩɩ,
‑lu weee a yia 'mɩ ‑zlalɩa,
yoo na nyɛa we aɩn.
We yi na dʋdʋ kibhe ‑zɛoo,
'nyɛa na yia we aɩn.»
24 Ɔɔ 'ŋwnɔyu 'tlaa,
'ɩn ɔ yia ɔ 'nyaa layɩbha:
«Lɛɛ ‑lu ɩn 'ka ɔ ‑zlalɩa?»
'Ɩn ‑mɔɔ nɛɛ:
«A ‑zlalɩ ɔ 'Zan ‑Batisɩɩ 'wlu.»
25 Ɔɔ 'ŋwnɔyu mnɩa lʋ ‑gwagwɩe nya,
'ɩn ɔ nɛɛ Ewlodʋ ‑yla:
«‑We ɩn 'yɩbhaa nɩ,
mʋ ‑wa 'Zan ‑Batisɩɩ 'wlu.
‑Ɩn ‑la dɛslɛɛn 'mɩ we ‑plaa ‑gʋ.»
26 We wlaa ɔ 'kʋayli la,
ɔ ka bi ɔ ‑limaa 'yibadɩɩ 'gbʋ,
ɔ 'nɩ mneni ɔ 'ka gba nɩɩ,
ɔ 'nɩa we ŋwnu.
27 Ɔ yia 'slʋjayu yabhlo la,
ɔ nɛɛ ɔ ‑yla:
«Mnɩ,
‑ɩn ‑dɩ ‑bha 'Zan ‑Batisɩɩ 'wlu,
‑ɩn ‑yɔ we yi.»
28 Ɔ mnɩa ‑kaslʋ 'wʋ,
ɔ yia Zaaan 'wlu ‑bha ‑dɩ,
'ɩn ɔ yia we ‑plaa ‑gʋ ladɩ,
'ɩn ɔ ‑yɔ we yia yi.
Ɔ 'nyɛa we ɔɔ 'ŋwnɔyu yoo,
'ɩn ‑mɔɔ yia ‑mɔɔ 'nyaa we kwa.
29 Zaaan 'bɩnɔnya 'nʋa we 'dɩ,
'ɩn wa yia ɔ 'kwie 'bʋmnɩ,
wa 'ka we gbawla 'wʋfa.
‑Zezu 'nyɛa nʋkpasia 'wlu glʋ ‑bhlo 'wlu gbu lililu
30 ‑Zezuu tietienya yia lʋ,
'ɩn wa ‑yɔ ɔ 'sɔ yia 'wlugbeli.
Gbʋ weee wa nʋa lɛ,
‑we wa ‑slolua nyɩma,
'ɩn wa yia we 'dɩ ɔ ‑salɩ.
31 Nyɩmaa ‑zlo,
‑wa yia,
‑wa mnɩa,
wa 'gbʋ,
‑Zezu ‑yɔ ɔ 'bɩnɔnya 'nɩ mneni wa 'ka li.
32 We 'gbʋ ɔ nɛɛ ɔ 'bɩnɔnya ‑yla:
«‑A mnɩ da mɩa blenyii,
‑a 'ka ‑mɔ ladɩ.»
'Ɩn wa 'dɛkpʋa yia 'glʋ 'wʋ ‑bho,
'ɩn da nyɩma 'nɩa ‑mɩ,
wa yia ‑mɔ mnɩ.
33 Nyɩma duun 'yɩa da wa ‑yɔ mnɩda,
'ɩn wa yia wa yibheli.
'Ɩn 'gbe weee 'wʋ ‑nyɩma yia ɔ 'yu zili bhʋ ‑gʋ ‑gwagwɩe nya.
34 ‑Zezu 'tlaa 'glʋ 'wʋ,
'ɩn ɔ yia nyɩmaa ‑zlo ‑yɔyɩ.
Wa 'wlʋ bhlabhlɛ ‑we 'nɩ 'yliyɔzʋnyɔ ‑ka.
We 'gbʋ wa laa ɔ nyazɩ 'wʋ,
'ɩn ɔ yia wa gbʋ duun ‑slolu.
35 Jibhe zɔa,
ɔ 'bɩnɔnya bɛa ɔ kwesi,
'ɩn wa nɛɛ ɔ ‑yla:
«Da ‑mɩnɩ ‑tlʋlʋ la,
'ɩn 'ylʋ ka ‑fla.
36 Gba wa ‑yla,
wa mnɩ kʋdanya ‑yɔ 'gbenya mɩa da ‑aɩn kwesi 'wʋ,
wa 'ka wa 'dɛɛ lililu zɔ.»
37 Ɔ nɛɛ wa ‑ylaɛ:
«Amɩaa 'dɛ 'nyɛ wa lililu!»
Wa nɛɛ:
«'Cʋ gbetaa lubho ‑gwɛzi 'nɩ mneni we 'ka wa 'floo zɔ.»
38 'Ɩn ɔ nɛɛ wa ‑yla:
«'Floo zuma mɩ aɩn kwɛɛa?
A mnɩ a 'ka we zɛlɩ.»
Wa zɛlɩa we,
'ɩn wa nɛɛ ɔ ‑yla:
«Nɩɩ,
'floo gbu ‑yɔ zibhii 'ya sɔ mɩa ‑bha.»
39 ‑Bha ɔ gbaa wa ‑yla,
‑maa 'tʋlʋ nyɩma nɩɩ,
wa ‑dɩ la ‑zlo ŋwɛɛ ‑petu kɔlɩ ‑gʋ.
40 'Ɩn wa yia ‑zlo ŋwɛɛ ladɩ.
‑Zlo yabhlo ka nyɩma 'wʋ glʋ gbu,
'ɩn tɔlʋa ka 'wʋ glʋ 'sɔ 'ya kugbua.
41 ‑Zezu 'bhua wee 'floo gbu ‑yɔ zibhii 'ya 'sɔ 'wʋ,
ɔ ylaa yalɩ,
ɔ 'paa ‑Lagɔ fuo,
ɔ dɩdlɩa wee 'floo la,
'ɩn ɔ yia we ɔ 'bɩnɔnya yoo 'nyɛ,
wa 'ka we nyɩma 'wʋladlili.
'Sa ‑bhlokpadɛ ɔ dlilia nyɩma weee zibhi 'wʋ la.
42 Wa 'dɛ weee lia,
'ɩn wa yia lʋ.
43 'Floo pnɩɩ ‑yɔ zibhi ‑we wa sɩalɩa,
we nyni ‑cɩcɛ kugbua lɛ 'sɔ.
44 Nyɩma ‑wa lia,
wa nʋkpasia mɩa wa glaa,
wa nyni nyɩmaa 'wlu glʋ bhlo 'wlu gbu (5.000).
‑Zezu nɔa 'nyu ‑gʋ
45 Tɔʋn,
‑Zezu nɛɛ ɔ 'bɩnɔnya ‑yla:
«A ‑bho 'glʋ 'wʋ,
a ‑galɩ 'mɩ 'yu ‑mɔ Bɛtɩsaida mnɩda.
'Ɩn ɩn 'ka waa nyɩma wɛlɩ 'pa.»
46 Wa 'bhʋbhlʋa ‑yɔ,
'ɩn ɔ yia ‑gɔgɔ 'wlu mnɩ,
ɔ 'ka ‑Lagɔ bhubhoe.
47 ‑Kwɩtatʋkpa ylumanɩa la,
‑zugba ‑Zezuu 'bɩnɔnya mɩ ‑mɔ 'nyu ‑nyɩdɩ 'glʋ 'wʋ,
'ɩn ɔmɔ mɩa dʋdʋ,
ɔ 'dɛ ‑bhlo.
48 ‑Zezu 'yɩa nɩɩ,
‑maa mɩ sɩada,
‑pɩpɛ mɩ wa 'klʋ ‑yɔ ‑gbɛɩn bhʋlʋda,
'ɩn 'glʋ ‑papɩe kalɩ ‑yɔ,
tɩatɩa ‑kʋkɔ gboa,
'ɩn ɔ yia wa 'bɩ mnɩ 'nyu ‑gʋ ‑nɔnʋe nya,
ɔ 'ka wa ‑gʋ ylɩ.
49‑50 Wa 'yɩa ɔ ‑yɔ nɔda ‑mɔ 'nyu ‑gʋ, wamɩa nɛɛ 'sa 'kuzu ‑wa. Wa 'dɛ weee 'yɩa ɔ ‑yɔ, 'ɩn wa yia nyanɔ nʋ. Wa 'kpɩa 'wʋ, ‑Zezu nɛɛ: «A 'na nʋnʋ nyanɔ ‑nɩ, ‑amɩ ‑wa, a palɩ dlɩ la.»51 'Ɩn ɔ yia wa lʋ ‑bho ‑mɔ 'glʋ 'wʋ,
'ɩn ‑pɩpɛ yia zɔbɛ.
Wee gbʋ 'nɩ wa ŋwɛgaga ‑sʋbhalɩ ‑sɛ.
52 Nɩɩ,
wa yukwli ‑yɔ 'tɛlaa 'gbʋ,
‑Zezu 'nyɛa nyɩmaa ‑zlo lililu gwɛdi sa,
wa 'nɩ ɔ 'tɩtɛ yibheli.
53 ‑Zezu ‑yɔ ɔ 'bɩnɔnya ‑dɩa 'nyu 'wʋ,
wa nynia Zenezalɛtɩ ‑dʋdʋ ‑gʋ,
‑mɔ wa jɩa 'glʋ lubhu.
54 Wa mɩ 'glʋ 'wʋ lasibhlida,
'ɩn nyɩma yia ‑Zezu yibheli.
55 Wa ‑yɔ 'pulo ‑pulue mɩ 'gbe weee 'wʋ 'plɩlɩda,
'ɩn da wa ‑ka 'nʋ nɩɩ,
‑Zezu mɩ ‑bha,
'ɩn wa mnɩa ‑mɔ,
wa ‑yɔ wa guzʋnya 'sɔ,
‑zugba ‑maa mɩ 'sowli 'wʋ.
56 Da ɔ ‑ka mnɩ,
'ɩn wa laa ɔ guzʋnya.
We yi kʋda ‑zɛoo,
we yi ‑zɔɔ ‑zɛoo,
we yi 'gbe 'kadʋ 'wʋ ‑zɛoo,
'ɩn wa palɩa wa guzʋnya ‑zejila 'wʋ la.
'Ɩn wa palɩa ‑Zezu zukpa nɩɩ,
ɔ 'ka wa guzʋnya 'yoo 'nyɛ wa 'ka ɔ ‑banaa ŋwɛ kwɛzɩ.
'Ɩn ‑wa weee zɩa we kwɛ,
‑maa yia 'pʋ.