'Mnɔpanyɔɔ gbʋʋ nine
13
Wee 'ylɩ ‑bhlokpadɛ nya,
‑Zezu 'tlaa ‑budu zɔ,
'ɩn ɔ yia 'nyuu ‑gɔgɔ ‑gʋ ladɩa mnɩ.
2 Nyɩmaa ‑zlo ka ɔ gbelii 'gbʋ,
ɔ yia 'glʋ 'wʋbho,
'ɩn ɔ yia ‑mɔ ladɩ,
‑zugba nyɩmaa ‑zlo mɩ 'nyuu ‑gɔgɔ ‑gʋ.
3 Gbʋʋ nine nya ɔ ‑slolua wa gbʋ duun,
ɔ nɛɛ:
«Nɩɩ,
kpaapanyɔ yabhlo mnɩa 'mnɔ 'paa.
4 Ɔ mɩa wee 'mnɔ 'mnida,
'yaa ‑zakpa ‑bhlo yia 'yoo ŋwɛ ‑yɔ bhli,
'ɩn 'zianya yia we li.
5 Tɔlʋa bhlilia tʋkpa ‑dʋdʋ ‑gʋ,
da bla 'nɩa ‑zu.
Bla 'nɩ ‑bha ‑zuu 'gbʋ,
we yia mi sa slʋɩ.
6 Nɩɩ,
'ylʋ ‑sɔa 'wʋ,
we yia we ‑sie,
'ɩn we yia yɛ,
we somi 'nɩ ‑tlʋlʋʋ 'gbʋ.
7 We 'ya tɔlʋa sloa ‑kpɔga glaa,
'ɩn ‑kpɔga yia we ‑gʋ palɩlɩ,
'ɩn we yia we 'tuntnu.
We 'nɩ 'ya yabhlogbɔɔ 'pa.
8 Tɔlʋa yia dʋdʋ ‑zɔnʋ ‑gʋ bhlili,
'ɩn we yia zʋ.
We lakpa tɔlʋa wla 'ya glʋ ‑bhlo 'ya kugbua,
tɔlʋa wla 'ya glʋ ta,
'ɩn tɔlʋa wla 'ya glʋ gbu.
9 ‑Ɔ ‑ka 'nʋnʋ ‑yukwli 'wlu ‑ka,
ɔ 'nʋ we.»
‑We ka 'gbʋ ‑Zezu paa gbʋʋ nine
10 Ɔ 'bɩnɔnya bɛa ɔ kwesi,
'ɩn wa yia ɔ layɩbha:
«Lɛɛ ‑lu ka 'gbʋ ‑na slolu wa gbʋʋ nine ‑papɩe nya?»
11 Ɔ nɛɛ wa ‑yla:
«‑Lagɔ ka ɔ nyɩmaa 'wlulapɩlɩgbʋ mɩa zizeda aɩn 'klʋslolu,
nɩɩ,
ɔ 'nɩ we wamɩa 'klʋslolu.
12 Nɩɩ,
‑lukanyɔ mɩa,
ɔ ‑nʋ wa yia ‑gʋpalɩa,
'ɩn we 'ka 'wʋzumanɩ.
'Ɩn nyɩmɛ ‑ɔ 'nɩa ‑lu duun ‑ka,
we ‑sɛlɛ mɩa ɔ kwɛɛ,
kwɛɛ wa yia we ɔ ‑saa.
13 «We 'dɛɛ 'gbʋ na gbaa wa ‑yla gbʋʋ nine ‑papɩe nya.
Wa ‑ka ylada ‑mɩ,
wa'a 'yɩ la.
Wa ‑ka yukwli pʋda ‑mɩ,
wa'a 'nʋ.
Nɩɩ,
wa'a 'nʋ gbʋ yabhlogbɔɔ 'wʋla.
14 'Sa ‑we ‑Lagɔgbʋʋ ‑falɩpanyɔ Ezaii gbaa,
we ‑zɛa gbʋzɔnʋ wa gbɛgbɛɩn,
ɔ nɛɛ:
‹Yukwli a yia pʋa 'nanʋʋ,
'ɩn a 'na 'ka we 'wʋlanʋ.
Ylaa a yia 'nanʋʋ,
'ɩn a 'na 'ka ‑lu ‑yɔyɩ.
15 Nɩɩ,
waa nyɩma ‑manɩɩ 'wlukʋʋn ka 'wʋtʋ ‑dudluu.
Wa ka wa yukwli 'sumanɩ,
wa ka wa 'yli 'mu,
wa yi layɩ,
wa yi 'nʋ,
wa yi gbʋ yibhelii 'gbʋ,
wa yi wa dlɩ 'bhitii 'gbʋ,
ɩn yi wa gbʋ 'wʋsa.
'Sa ‑Lagɔ gbaa.›
16 Amɩa,
amɩaa 'yli yɩ la,
'ɩn amɩaa yukwli nʋa,
'wʋtʋtʋe ‑dlɔɔ mɩ amɩaa ‑nʋ nya.
17 Ɩn nɛɛ aɩn ‑yla gbʋzɔnʋ saɛ:
‑Lagɔgbʋʋ ‑falɩpanya ‑yɔ ‑Lagɔnyɩma tɩklɩɩɩ ‑zlo 'yɩbha ‑we a yɩa ‑yɔ,
wa 'ka we ‑yɔyɩ,
'ɩn wa 'nɩ we ‑yɔyɩ,
‑we a nʋa,
wa 'ka we 'nʋ,
'ɩn wa 'nɩ we 'nʋ.
'Mnɔpanyɔɔ gbʋʋ ninee 'ji
18 «We 'dɛɛ 'gbʋ,
amɩa,
a 'nʋ mnɔpanyɔɔ gbʋʋ ninee ji nɩ 'wʋla.
19 ‑Wa 'nʋa ‑Lagɔɔ nyɩmaa 'wlulapɩlɩee wɛlɩ,
'ɩn wa'a 'nʋa we 'wʋla,
wa 'wlʋ 'yoo ŋwɛ ‑yɔ da 'mnɔ bhlia.
Gbʋnyuuu dide ‑ka yi,
‑we wa faa wa dlɩ zɔ,
'ɩn we saa ‑mɔ we.
20 'Sa ‑bhlokpadɛ tɔlʋa mɩ ‑bha tʋkpa ‑dʋdʋ 'bhisa,
da ‑Lagɔwɛlɩ bhlia.
'Ɩn wa ‑ka we 'nʋ nɩ,
'ɩn wa ŋwnua we gbʋ 'mʋna nya,
'ɩn wee 'mʋna'a ‑gwlɛ.
21 Nɩɩ,
wa 'nɩ ŋwnu we 'ka somi fa wa dlɩ zɔ.
Waa nyɩma mɩa,
bhla ‑sɛlɛ nya wa ŋwnua we ‑yɔ,
'ɩn wa ‑ka wa sɩalɩda ‑mɩ,
wa ‑ka wa 'klɩyɩe 'wʋpalɩda ‑mɩ ‑Lagɔwɛlɩɩ 'gbʋ,
'ɩn wa saa ‑Lagɔwɛlɩ dlɩ ‑gʋ.
22 Tɔlʋa 'wlʋ 'ya 'mnɔya ‑we ‑wa ‑Lagɔwɛlɩ ‑mɔ ‑kpɔga glaa.
Wa 'nʋa wee wɛlɩ,
'ɩn dʋdʋ ‑gʋʋ dlɩlʋe klaa,
wa 'gwɛzi ‑we nanɩa wa dʋdʋ,
'ɩn we nʋa wa ‑dawli 'wʋ klaa,
mʋ palɩlɩa we ‑gʋʋ 'gbʋ,
we'e tnʋa.
23 'Ɩn nyɩma tɔlʋa mɩa,
‑maa 'wlʋa wee 'mnɔya ‑we ‑wa ‑Lagɔwɛlɩ ‑mɔ dʋdʋ ‑zɔnʋ ‑gʋ.
Wa 'nʋa we,
'ɩn wa yia we ‑yɔŋwnu.
Tɔʋn,
wee wɛlɩ ‑we mɩa wa 'wʋ,
'ɩn we yia tnʋ.
We lakpa yabhlo wla 'ya glʋ ‑bhlo 'ya kugbua,
we tɔlʋa 'ya glʋ ta,
'ɩn we tɔlʋa wla 'ya glʋ gbu.»
‑Petu 'nyuuu gbʋʋ nine
24 ‑Zezu 'pa 'yaa wa ‑yla gbʋʋ nine yabhlo,
ɔ nɛɛ:
«‑We ‑yɔ ‑Lagɔɔ nyɩmaa 'wlulapɩlɩe 'wʋwlʋa,
'mʋ na yia da aɩn ‑yla gbaa.
Nɩɩ,
nyɩmɛ yabhlo 'paa ɔ kpaa 'mnɔ ‑zɔnʋ.
25 ‑Mʋʋ 'bɩgʋ,
sabɔ,
da nyɩma weee mɩa 'ylaa 'wʋ,
ɔ tʋnyɩmɛ yia,
'ɩn ɔ yia ‑petuu 'ya glʋ wee 'mnɔ ‑kpaa,
'ɩn ɔ yia mnɩ.
26 Da wee 'mnɔ mia,
'ɩn we mɩa zʋda,
‑zugba wee ‑petu mi 'ya ‑mɔ we nyɩdɩ.
27 «Wee kpaa ‑kanyɔɔ lubhonʋnya yia yi,
'ɩn wa nɛɛ ɔ ‑ylaɛ:
‹‑Amɩaa ‑kanyɔ,
'lee,
‑ɩn 'nɩ zlɩmɛ da 'mnɔya ‑zɔnʋ 'paa?
'Ɩn da ‑petunya nɩ 'bhʋlʋa?›
28 «Ɔ nɛɛ wa ‑ylaɛ:
‹Na tʋnyɩmɛ nʋa we lɛ.›
«'Ɩn ɔ lubhonʋnya nɛɛ ɔ ‑yla:
‹'Lee,
‑a mneni ‑a 'ka wee ‑petu 'tluu?›
29 «Ɔ nɛɛ:
‹‑Ɩnnya,
nɩɩ,
a ‑ka wee ‑petu 'tlua yi,
a mneni a 'ka 'mnɔ 'tlu ‑bha ‑bhlokpadɛ.
30 A 'tide we 'yi,
we 'dɛ 'sɔ 'ka 'ylimanɩ.
We ‑dɩdɩ bhla ‑ka bɛ,
'ɩn ɩn 'ka we ‑dɩdɩnya 'tʋlʋ nɩɩ,
wa ‑dɩ ‑slɔ ‑petu,
wa gbʋan we,
'ɩn wa 'ka we sie.
‑Mʋʋ 'bɩgʋ,
wa 'ka 'mnɔ ‑dɩ,
'ɩn wa 'ka we na ‑gbagbʋ 'wʋkwa.› »
‑Lagɔɔ nyɩmaa 'wlulapɩlɩee gbʋʋ nine
31 ‑Zezu 'pa 'yaa wa ‑yla gbʋʋ nine yabhlo,
ɔ nɛɛ:
«‑Lagɔɔ nyɩmaa 'wlulapɩlɩe 'wlʋ su ‑we wa laa mutadɩ,
we 'ya.
'Mʋ nyɩmɛ yabhlo 'bhua 'wʋ,
'ɩn ɔ yia we glʋ ɔ kpaa.
32 We 'kienyi we ‑zi dʋdʋ ‑gʋʋ su weee 'ya.
Nɩɩ,
we ‑ka mi,
'ɩn we ylimanɩa 'kadʋʋ,
'ɩn we zɛa su ‑we ‑zia su weee 'wʋ.
Nɩɩ,
'zianya yia we lʋlʋ 'sʋbhaa we 'klɩya ‑nyɩdɩ.»
33 ‑Zezu 'pa 'yaa wa ‑yla gbʋʋ nine yabhlo,
ɔ nɛɛ:
«‑Lagɔɔ nyɩmaa 'wlulapɩlɩe 'wlʋ gɔɔ 'ŋwnɔ yabhlo slua 'floo ‑bhʋbhʋʋ kilo glʋ ‑bhlo 'ya gbu lʋ,
ɔ bhɩtɩa we,
'ɩn we yia 'ylɩ,
mʋ.»
‑We ka 'gbʋ ‑Zezu paa gbʋʋ nine
34 Nɩɩ,
gbʋ weee mɩa dɛ,
gbʋʋ nine ‑papɩe nya ɔ ‑slolua we nyɩmaa ‑zlo.
We 'nɩ gbʋʋ nine ‑papɩe 'wʋbhʋ,
ɔ'ɔ ‑slolu nyɩma gbʋ.
35 'Sa we 'plɩa sa,
'ɩn ‑we ‑Lagɔgbʋʋ ‑falɩpanyɔ gbaa,
we 'ka gbʋzɔnʋ ‑zɛ,
ɔ nɛɛ:
«Nɩɩ,
gbʋʋ nine ‑papɩe nya na yia wa ‑yla gbʋ gbaa.
We 'ka dʋdʋʋ gwedɩda 'bhʋ,
gbʋ ‑we ‑Lagɔ zizea,
gbaa na yia we.»
36 Tɔʋn,
‑Zezu 'bhʋa nyɩma glaa,
'ɩn ɔ yia ‑buduŋwɛɛ mnɩ.
Ɔ plaa ‑budu zɔ,
'ɩn ɔ 'bɩnɔnya yia ɔ kwesi bɛ,
'ɩn wa nɛɛ ɔ ‑ylaɛ:
«Gba ‑aɩn ‑yla kpaa ‑petu 'nyuu nɩɩ gbʋʋ ninee 'ji.»
37 Ɔ nɛɛ wa ‑ylaɛ:
«Nɩɩ,
‑ɔ 'paa 'mnɔya ‑zɔnʋ,
Nyɩmɛɛ Yu ‑wa.
38 'Ɩn kpaa mɩa,
mʋ ‑wa dʋdʋ ‑gʋ,
'ɩn 'mnɔya ‑zɔnʋ mɩa,
mʋ ‑wa nyɩma ‑wa ‑Lagɔ pɩlɩa 'wlu la.
‑Petu mɩa,
mʋ ‑wa nyɩma ‑wa gbʋnyuuu dide pɩlɩa 'wlu la.
39 Ɔɔ tʋnyɩmɛ ‑ɔ glʋa wee ‑petu,
‑Saatan ‑wa.
We ‑dɩdɩ bhla mɩa,
‑mʋʋ ‑wa dʋdʋʋ bhɩalɩ da.
We ‑dɩdɩnya mɩa,
‑mʋʋ ‑wa 'anzɩnya.
40 Sa wa tlua ‑petu,
'ɩn wa vitelia we ‑kosu 'wʋ,
'sa ‑bhlokpadɛ we yia dʋdʋ ‑bhɩa bhla ‑mɩa.
41 Ɔɔ Nyɩmɛɛ Yu yia ɔnʋʋ 'anzɩnya yoo 'paa.
Nɩɩ,
‑wa kwaa wa ‑lima gbʋnyuu lʋ we ‑yɔ ‑wa ka dɛ nʋa gbʋnyuu lɛ,
we 'ka wa 'wʋgbɩzɩ,
‑wa ‑Lagɔ pɩlɩa 'wlu la glaa.
42 'Ɩn we 'ka wa ‑kosu 'kadʋ 'wʋ viteli.
‑Mɔ wa wia,
‑mɔ wa lia gla 'wʋ.
43 ‑Wa nʋa ‑Lagɔɔ dʋmagbʋ lɛ,
ma yia lɩa 'ylʋ 'bhisa da wa Dide pɩlɩa nyɩma 'wlu la.
‑Ɔ ‑ka 'nʋnʋ ‑yukwli 'wlu ‑ka,
ɔ 'nʋ we.
'Ŋnɩmnɩlu ‑we mɩa zizeda
44 «‑We ‑yɔ ‑Lagɔɔ nyɩmaa 'wlulapɩlɩe 'wʋwlʋa mʋ ‑wa 'ŋnɩmnɩlu yabhlo ‑we mɩa zizeda kpaa.
'Mʋ nyɩmɛ yabhlo 'yɩa,
'ɩn ɔ yia we zize lʋ.
Ɔ plɛ mɛnɩ,
'ɩn ɔ mnɩa,
ɔ yia ɔ ‑lu weee pɛlʋ 'pa ɔ 'ka wee kpaa zɔ.
Tʋkpa ‑zɔnʋ ‑we ka ‑valɛ 'tɛa, we gbʋʋ nine
45 «‑We ‑yɔ ‑Lagɔɔ nyɩmaa 'wlulapɩlɩe 'wʋwlʋa,
mʋ ‑wa 'ya,
‑valɛpanyɔ ‑ɔ mɩa tʋkpa ‑zɔnʋ ‑we ka ‑valɛ 'tɛaa datalɩda.
46 Ɔ 'yɩa wee 'ylinanʋ ‑tʋkpa,
‑we ka ‑valɛ 'tɛa ‑we ‑zia we ‑lima nɩ,
ɔ mnɩa,
'ɩn ɔ yia ɔ ‑lu weee pɛlʋ 'pa ɔ 'ka we zɔ.
Zibhi ‑bha ‑sowlii gbʋʋ nine
47 «‑We ‑yɔ ‑Lagɔɔ nyɩmaa 'wlulapɩlɩe 'wʋwlua,
mʋ ‑wa 'ya,
'sowli ‑we wa viteli 'nyu lʋ,
'ɩn we yi zibhii 'yli ‑bhlo ‑bhlo kpa.
48 We yea,
'ɩn zibhibhanya yia we 'nyu lʋ gbize,
'ɩn wa yia we 'nyu ‑gɔgɔ ‑gʋ ladɩ,
wa 'ka zibhi 'wʋgbɩzɩ.
We zʋzɔnʋ wa gbɩzɩa 'wʋ,
‑mʋʋ wa slua wa ‑cɩcɛ 'wʋ,
'ɩn ‑we 'nɩa 'ylinanɩ,
'ɩn wa yia we kwnɛɛ viteli.
49 'Sa ‑bhlokpadɛ we yia ‑mɩa dʋdʋʋ bhɩa zlɩ.
Nyɩma ‑wa nʋa gbʋnyuu lɛ ‑yɔ ‑wa nʋa gbʋ ‑zɔnʋ lɛ,
'anzɩnya yia yia we 'ka wa ‑yɔsɩsalɩ,
50 'ɩn ‑wa nʋa gbʋnyuu lɛ,
we 'ka ‑maa ‑kosu 'kadʋ 'wʋ viteli.
‑Mɔ wa yia wilia,
‑mɔ wa yia gla 'wʋ lia.»
Gbʋzɔnʋ sʋa ‑yɔ gbʋzɔnʋ lolu
51 ‑Zezu nɛɛ ɔ 'bɩnɔnya ‑yla:
«A ka we 'dɛ weee 'wʋlanʋʋ?»
Wa nɛɛ:
«Ɩɩn,
‑a ka we 'wʋlanʋ.»
52 Tɔʋn,
‑Zezu nɛɛ wa ‑yla:
«Nɩɩ,
‑Lagɔɔ titee gwesanyɔ ‑ɔ yibhelia ‑Lagɔɔ nyɩmaa 'wlulapɩlɩgbʋ,
ɔ 'wlʋ nɩɩ,
‑buduŋwɛɛ ‑kanyɔ yabhlo ‑ɔ wleli 'ŋnɩmnɩlu sʋa ‑yɔ 'ŋnɩmnɩlu lolu,
ɔ ‑luu lazʋda.»
‑Zezuu ‑zɔɔ ‑nyɩma 'nɩ ɔ gbʋ ‑yɔŋwnu
53 ‑Zezu ka gbʋʋ nine ‑papɩe bhɩa 'bhie,
ɔ yia ‑bhadɛ 'bhʋ.
54 'Gbe ‑we 'wʋ ɔ 'ylimanɩa,
ɔ mnɩa ‑mɔ,
'ɩn ɔ yia nyɩma ‑slolu ‑mɔ ‑Lagɔbudu zɔ.
‑Wa weee mɩa ‑bha,
'ɩn we yia wa ŋwɛgaga ‑sʋbhalɩ.
'Ɩn wa nɛɛ:
55 «Ɔɔ nyɩmɛ mɩa da nɩ,
‑budukʋnyɔɔ yu ‑wa,
we 'nɩ mʋʋ?
Ɔ 'nyaa mɩa nɩ,
Malii ‑wa.
'Zake klaa,
‑Zɛzɛfʋ klaa,
'Simɔɔ klaa,
we ‑yɔ Zudɩ,
wa 'nɩ ɔ bheliaa?
56 Ɔ bhɔlɔa mɩ ‑aɩn glaa.
Aya!
Mɔ ɔ ‑salɩ gwɛdigbʋ lɛnʋ sea?»
57 We 'dɛɛ 'gbʋ,
wa 'nɩ mneni wa 'ka ɔ dlɩ ‑gʋ zʋ.
Tɔʋn,
‑Zezu nɛɛ wa ‑yla:
«‑Lagɔgbʋʋ ‑falɩpanyɔ ‑ka ‑mɩ,
da weee wa zʋa ‑bha ɔ.
Wa'a zʋ ‑bha ɔ,
ɔ ‑zɔɔ we ‑yɔ ɔ ‑buduŋwɛɛ.»
58 Nyɩma 'nɩ ɔ dlɩ ‑gʋ zʋʋ 'gbʋ,
ɔ 'nɩ ‑bha gwɛdigbʋ duun lɛnʋ.