*'Kuzu ylaa ‑Zezu la
4
Zuzu 'Pʋpa yea ‑Zezu tɔʋn,
'ɩn ɔ yia Zudɛɛɛn ‑gɔgɔ ‑gʋ 'bhʋ,
'ɩn ɔɔ Zuzu 'Pʋpa yia ɔ da bɛblɛɛ kwa.
2 'Ɩn 'Kuzu yia ‑mɔ ɔ layla,
'ylɩ glʋ 'sɔ nʋkplɛ.
Wee 'ylɩnya ‑mɩnɩ nya,
ɔ 'nɩ ‑lu yabhlogbɔɔ li.
Wee 'ylɩnya 'plɩa,
'ɩn ŋwɔ yia ɔ ‑yɔkpa.
3 'Kuzu nɛɛ ɔ ‑ylaɛ:
«‑Ɩn ‑ka ‑Lagɔɔ 'Yu nya ‑mɩ 'piɛɩn,
‑ɩn gba tʋkpa mɩa nɩ ‑yla,
we ‑zɛ 'floo.»
4 'Ɩn ‑Zezu yia we 'bɩgʋpalɩ we ‑ylaɛ:
«We mɩ cɛlɩda ‑Lagɔsɛbhɛ 'wʋɛ:
‹We 'nɩ lililu ‑bhlogbɔɔ ‑gʋ nyɩmɛɛ 'yliyɔgagɩe tlili.› »
5 'Kuzu yia ‑Zezu 'wʋpa ‑gɔgɔ 'kadʋ 'wlu kwa,
‑bha ‑bhlokpadɛ we ‑slolua ɔ dʋdʋʋ 'ŋnɩmnɩ ‑da weee 'klʋ.
6 'Ɩn we nɛɛ ɔ ‑ylaɛ:
«'Tɩtɛ weee nɩ klaa,
'ɩn dʋdʋ ‑gʋʋ 'ŋnɩmnɩe weee klaa,
ɩn 'ka ‑mɩ we 'nyɛ.
Wa ka 'mɩ we 'dɛ weee yoo 'nyɛ.
Nyɩmɛ ‑ɔ ɩn ‑ka 'yɩbha,
'mɔ ɩn mnenia ɩn 'ka we 'nyɛ.
7 ‑Ɩn ‑ka 'mɩ 'yu 'kukolu 'sibhli,
‑ɩn ‑ka 'mɩ bʋbɔ nɩ,
'ɩn we 'dɛ weee zɛa ‑na ‑nʋ.»
8 'Ɩn ‑Zezu yia we 'bɩgʋpalɩ we ‑ylaɛ:
«We mɩ cɛlɩda ‑Lagɔsɛbhɛ 'wʋɛ:
‹‑Ɩn bʋbɔ Jejitapɛ,
‑ɔ ‑wa ‑na ‑Lagɔ,
'ɩn ‑ɩn nʋ ɔ 'dɛbhlogbɔɔ ‑yla lubho.› »
9 'Kuzu yia ‑Zezu ‑Zeluzalɛmʋ kwa.
We dɩa ɔ ‑Lagɔbudu 'kadʋ 'wlu la,
'ɩn we nɛɛ ɔ ‑ylaɛ:
«‑Ɩn ‑ka ‑Lagɔɔ 'Yu nya ‑mɩ 'piɛɩn,
‑ɩn ‑blu 'wʋ,
‑ɩn 'ka lasibhli.
10 Nɩɩ,
we mɩ cɛlɩda ‑Lagɔsɛbhɛ 'wʋɛ:
‹‑Na 'gbʋ,
gbaa ɔ yia ɔ 'anzɩnya ‑yla we zʋ ‑mɩ 'yliyɔ.
11 'Ɩn we 'ka we sɔnya ‑mɩ zɔ laslʋlʋ,
‑na bhʋ yi tʋkpa gozoo 'gbʋ.› »
12 'Ɩn ‑Zezu yia we 'bɩgʋpalɩ 'Kuzu ‑ylaɛ:
«‑Lagɔsɛbhɛ nɛɛ,
‹Jejitapɛ ‑ɔ ‑wa ‑na ‑Lagɔ,
‑ɩn 'na ylalɩ ɔ la ‑nɩ.› »
13 'Kuzu bhɩa ‑Zezuu laylaylɩe sɔ weee lʋ nɩ,
'ɩn we yia ɔ gwevla ‑sɛ.
‑Zezu dɩa ɔ lubhoo gwe Galilee ‑dʋdʋ ‑gʋ
14 ‑Lagɔɔ Zuzuu 'tɩtɛ mɩ ‑Zezu yeda,
'ɩn ɔ yia Galilee lʋyi.
'Ɩn ɔ 'ŋnɩ yia lamneni Galilee ‑dʋdʋ weee ‑gʋ.
15 Nyɩma ɔ slolua ‑Lagɔbudunya zɔ,
'ɩn nyɩma weee kwalɩa ɔ 'ŋnɩ.
Nazalɛtɩ ‑nyɩma 'nɩ ‑Zezuu gbʋ ‑yɔŋwnu
16 ‑Zezu ka Nazalɛtɩ mnɩ,
‑mɔ wa zʋa ɔ.
Nyapɛylɩ nya nɩ,
sa ɔ plaa 'cɩn ‑Lagɔbudu zɔ nɩ,
'ɩn ɔ yi 'saa ‑mɔ pla.
Ɔ yia 'wʋsɔ ‑Lagɔsɛbhɛɛ zɛlɩzɛlɩee 'gbʋ.
17 'Ɩn wa yia ɔ ‑Lagɔgbʋʋ ‑falɩpanyɔ Ezaiii 'sɛbhɛ yoo 'nyɛ glɩda,
ɔ yia we 'wʋkalɩ,
da wɛlɩ nɩ mɩa cɛlɩda nɩ,
'ɩn ɔ yia we 'yɩ,
'ɩn ɔ yia we zɛlɩɛ:
18 «Jejitapɛɛ Zuzu mɩ 'mɩ ‑gʋ.
Ɔ ka ‑bha 'mɩ ‑sa,
ɩn 'ka nyazɩnya ‑yla ‑Lagɔgbʋ gba.
Ɔ ka 'mɩ tie,
ɩn 'ka ‑kaslʋnyɩma ‑yla gba nɩɩ:
‹Amɩaa ‑kaslʋ ka ‑zɛɛn bhɩa.›
‹Lɔlɔnya,
amɩaa 'yli ka ‑zɛɛn ‑blo.›
‹Amɩa wa nyɛa 'wʋ,
a ka ‑zɛɛn gbʋ 'wʋbhʋ.›
19 'Ɩn,
‑zʋ ‑we nya Jejitapɛ 'kaa ɔ zʋzɔnʋ lɛnʋ,
ɩn 'ka we 'dɩ wa ‑salɩ.»
20 ‑Zezu glɩa wee 'sɛbhɛ,
'ɩn ɔ yia we ‑Lagɔbudu zɔɔ lubhonʋnyɔ yoo 'nyɛ,
'ɩn ɔ yia ladɩ.
Nyɩma weee ‑wa mɩa ‑bha,
‑maa yia ɔ ylada ‑tʋ sa tenyii.
21 Tɔʋn,
'ɩn ɔ nɛɛ wa ‑ylaɛ:
«‑We 'sɛbhɛɛ 'ya gbaa,
we ka ‑zɛɛn lɛnʋ,
amɩa pʋlʋa da 'mɩ yukwli,
amɩaa 'yibadɩ.»
22 ‑We wa 'dɛ weee yɩa ‑yɔ ‑Zezuu gbɛgbɛɩn,
'ɩn wa yia we gbagbɩe bhli.
'Ɩn gbʋzɔnʋ ‑gbʋnya ɔ mɩa gbada,
we ka wa ŋwɛgaga ‑sʋbhalɩ.
'Ɩn wa nɛɛ:
«Nyɩmɛ mɩa dɛ,
ɔ 'nɩ ‑Zɛzɛfʋʋ yuu?»
23 ‑Zezu nɛɛ wa ‑ylaɛ:
«Nine 'nɩ a yia 'mɩ ‑yla 'paa,
gbʋzɔnʋ sa.
Gbaa a yia:
‹‑Dɔtlɔɔ,
‑ɩn jipe ‑na 'dɛ.›
'Ɩn gbaa a yi 'yaa 'mɩ ‑ylaɛ:
‹‑We weee ‑ɩn nʋa lɛ Kapɛnaumʋ nɩ,
‑a ka we 'dɩ 'nʋ.
‑Ɩn nʋ wee gbʋnya ‑bhloo 'dɛ lɛ ‑na 'dɛɛ dʋdʋ ‑gʋ ‑seli.› »
24 ‑Zezu nɛɛ wa ‑yla 'yaɛ:
«Cɩɩn,
gbʋzɔnʋ ‑wa,
wa'a ‑tɔlʋ ‑Lagɔgbʋʋ ‑falɩpanyɔ nyɩmɛ,
ɔ 'dɛɛ dʋdʋ ‑gʋ.
25 Gbʋzɔnʋ na gbaa da aɩn ‑yla.
‑Dʋgbaŋwnɩ duun mɩ Izlaɛlɩ ‑dʋdʋ ‑gʋ zlɩmɛ,
‑Lagɔgbʋʋ ‑falɩpanyɔ Eliii bhla.
‑Zugba 'nyu'u lʋa ‑zʋ ta 'cʋ gbelibhlo,
'ɩn ŋwɔ 'kadʋ yabhlo yia wee dʋdʋ weee ‑gʋ yi.
26 'Ɩn ‑mʋʋ bhla,
‑Lagɔ 'nɩ Elii tie ‑dʋgbaŋwnɩ mɩa Izlaɛlɩ ‑dʋdʋ ‑gʋʋ ‑gbɛ,
'ɩn ɔ 'ka wa 'yabhlo 'wʋsa.
Nɩɩ,
‑dʋgbaŋwnɔ ‑ɔ mɩa Salɛpʋtagbe nʋkplɛ,
Sidɔɔn ‑dʋdʋ ‑gʋ,
ɔ ‑gbɛ ‑Lagɔ tiea Elii.
27 ‑Lagɔgbʋʋ ‑falɩpanyɔ Elizeee bhla,
‑zugba sɔlɩbhanya duun mɩ Izlaɛlɩ ‑dʋdʋ ‑gʋ.
Elizee 'nɩ wa 'yabhlogbɔɔ jipe,
nɩɩ,
Silii ‑yu Naamaa ɔ jipea.»
28 Nyɩma weee ‑wa mɩa ‑Lagɔbudu zɔ,
wa 'nʋa wee wɛlɩnya ‑mɩnɩ,
'ɩn we yia wa 'cɛdlɔ la.
29 Wa 'dɛ weee ‑sɔa 'wʋ,
'ɩn wa ‑yɔ ‑Zezuu 'susue yia 'gbe ‑glima mnɩ.
'Ɩn ‑gɔgɔ ‑we kwesi wa 'gbe mɩa 'sʋbhada,
'ɩn wa yia we 'wlu ɔ kwa,
wa 'ka ɔ zɔ vitelii 'gbʋ.
30 Nɩɩ,
'ɩn ‑Zezu yia wa nyɩdɩ 'plɩlɩ,
'ɩn ɔ yia mnɩ.
‑Zezu puea nyɩmɛ ‑ɔ kaa zuzu 'nyuu 'bɩ
31 Tɔʋn,
‑Zezu mnɩa Kapɛnaumʋ,
Galilee ‑dʋdʋʋ 'gbe yabhlo nʋkplɛ,
'ɩn ɔ yia nyɩma ‑Lagɔgbʋ ‑slolu Nyapɛylɩ weee nya,
‑Lagɔbudu zɔ.
32 Ɔ nyɩma ‑slolu sɔ ka wa ŋwɛgaga ‑sʋbhalɩ.
Nɩɩ,
se ‑we ‑Lagɔ 'nyɛa ‑Zezu,
we nya ɔ gbaa.
33 ‑Mɔ ‑Lagɔbudu zɔ,
nyɩmɛ yabhlo kaa pʋɩn ‑ka ‑zuzu 'nyuu 'bɩ,
mɔ 'kpɩa 'wʋ 'tɩtɛɛ,
ɔ nɛɛ:
34 «'Aaa!
Nazalɛtɩyu ‑Zezu,
‑naa lɛɛ ‑gbʋ pɩlɩ ‑amɩaa gbʋ 'wʋ la?
‑Amɩaa lasasɩee 'gbʋ ‑ɩn yia yi yɩ?
Ɩn ‑yi ‑mɩ ŋwɛɛ ŋwɛɛ:
‑Lagɔɔ ‑Mɔwlʋnyɔ ɔ tiea,
'mɔ ‑ɩn ‑mɩa.»
35 ‑Zezu yia we,
we ŋwɛɛ labhalɩ ‑gla nya.
Ɔ nɛɛ we ‑ylaɛ:
«'Mu ŋwɛ,
'bhʋ ɔ 'wʋ!»
Zuzu 'nyuu yia ɔɔ nʋkpasu labhlɩ dʋdʋ,
nyɩma weee ‑zejila 'wʋ,
'ɩn we yia ɔ 'wʋtla,
we 'nɩ ɔ gbʋnyuu yabhlogbɔɔ ‑yla lɛnʋ.
36 Ŋwɛgaga yia wa 'dɛ weee sʋbha,
'ɩn wa nɛɛ wa 'dɛkpʋa nyɩdɩɛ:
«Mɔɔ ‑wɛlɩ mʋ dɛa?
Se ‑yɔ 'tɩtɛ nya ɔɔ nyɩmɛ gbaa zuzu 'nyii ‑yla gbʋ,
'ɩn we tlaa nyɩma 'wʋ!»
37 'Ɩn ‑Zezuu 'ŋnɩ yia lamneni wee dʋdʋ weee ‑gʋ.
‑Zezu jipea guzʋnya
38 ‑Zezu 'bhʋa ‑Lagɔbudu zɔ nɩ,
'ɩn ɔ yia 'Simɔɔɔ ‑budu zɔ mnɩ.
‑Zugba 'Simɔɔɔ 'ŋwnɔɔ 'nyaaa ku ‑su sa ‑glagla,
'ɩn wa nɛɛ ɔ ‑yla,
ɔ zukpa ‑wa,
ɔ jipe ɔ.
39 ‑Zezu kwlia ɔ ‑gʋ 'wʋ,
'ɩn ɔ nɛɛ ɔ kusulo ‑yla wɛlɩ 'tɩtɛ nyaɛ:
«‑Ɩn 'bhʋ ɔ ‑gʋ la.»
Ɔ gba 'saa tɔʋn,
'ɩn we yia ɔ ‑gʋ labhʋ.
‑Bha ‑bhlokpadɛ ɔɔ 'ŋwnɔ ‑sɔa 'wʋ,
'ɩn ɔ yia wa ‑yla pipie bhli.
40 Jibheylʋ nya,
‑wa kaa guzʋnyaa 'yli ‑bhlo ‑bhlo nɩ,
'ɩn ‑maa ‑yɔ ‑maa guzʋnya yia ‑Zezuu ‑gbɛ yi.
Ɔ yia wa kwɛzɩ ‑bhlo ‑bhlo,
'ɩn ɔ yia wa jipe.
41 Zuzu 'nyii yi 'yaa guzʋnya duun 'wʋtla 'wʋkpɩkpɩe nya:
«‑Lagɔɔ 'Yu ‑ɩn ‑mɩa!»
‑We ka gbʋ ‑wa,
wa ‑yi we 'ji ‑nya nɩɩ,
‑Zezu mɩa,
‑Lagɔɔ ‑Bhasanyɔ ‑wa.
'Ɩn ‑Zezu yia we wa ŋwɛɛ labhalɩ ‑nya,
ɔ 'nɩ ŋwnu wa 'ka gba.
‑Zezu mnɩa ‑Lagɔgbʋ gbaa dʋdʋ weee ‑gʋ
42 Zlɩ 'ka 'wʋladolua mnɩ tɔʋn,
'ɩn ‑Zezu yia 'gbe nʋkplɛ 'tla,
'ɩn ɔ yia da yabhlo mnɩ ‑flii.
'Ɩn nyɩmaa ‑zlo yia ɔ 'yli 'bɩ lanɔnʋe bhli,
da ɔ mɩa nɩ,
'ɩn wa yia ‑bha nyni.
Wa 'yɩbha ɔ 'na 'bhʋlʋ wa ‑yɔ ‑nɩ,
'ɩn wa yia ɔ lakpʋkpalɩ.
43 'Ɩn ‑Zezu nɛɛ wa ‑ylaɛ:
«We mɩ 'ya nɩɩ,
ɩn gba ‑Lagɔɔ nyɩmaa 'wlulapɩlɩgbʋ 'gbe tɔlʋa 'wʋ.
We 'gbʋ,
‑Lagɔ yia 'mɩ tie.»
44 'Ɩn ɔ gbaa ‑Lagɔgbʋ,
‑Lagɔbudunya zɔ,
dʋdʋ weee ‑gʋ.