तिमुथियुस खातिर पउलुस के सलाह
4
1 जवन घरी मसीह यीसु राजा बन के अतथीन, उहे घरी उ जीयत के आऊ मुवलकनो के नियाय करतथीन, इहेसे परमेस्वर आऊ मसीह यीसु के गोवाह मान के हम तोहरा हुकुम देवत हियऊ, 2 कि तू बढ़िया खबर के परचार करिहें आऊ बढ़िया समय आऊ खराबो समय में तइयार रहिहें,a अदमिनियन के का करेला चाही, ओकरा समझाहीं । जखनी ओकिन गलती करतथीन, त ओकिन के समझा देहीं, आऊ लोगन के हिम्मत साथे समझा के ढाढ़स देहीं ।3 काहेकि अइसन दिन अतई कि अदमिनियन सच्चा सिक्छा के नई सुनेला चाहतथीन, बाकि आपन मर्जी के पूरा करेला झुठा सिखावेवोलन के बतिया सुनतथीन, आऊ अइसन सिखावेवोलन के बोलउतथीन जे ओकिन के पसंन-लायक बतिया सुनउतथीन । 4 आऊ सच्चा सिक्छा के सुनेला कहियो नई चाहतथीन, ओकर बदला में झुठा किसा परे आपन मन लगउतथीन।
5 बाकि हे तिमुथियुस, तू इ सब बतिया में संयमी रहिहें, धीरज संगे दुख के सहेला चाही, बढ़िया खबर के परचार करिहें आऊ आपन सब सेवा के पुरा करिहें ।
6 हम तोहरा इ सब हुकुम इहेसे देवत हियई कि परमेस्वर खातिर हमर जिन्गी अरपण कइल जात हियई, आऊ हमर आखिरी घरी आइल हई । 7 हम परभु खातिर बढ़िया लड़ाई लड़ लेलियई, हम आपन दउड़ के पूरा कइले हियई, आऊ हम आपन बिसवास के कहियो नई छोड़ले हियई । 8 अब परमेस्वर के नजर में बढ़िया जिन्गी जीये के चलते परभु हमर खातिर एगो जीत के मुकुट रखले हथीन, जेकरा मुंह-देखी नयाय नई करेवोला परभु उहे नयाय के दिन हमरा देतथीन, उ खाली हमर खातिर नई, बाकि सब के खातिर हई जेकिन उनकर दुबारा आवे के बाट जोहत हथीन ।
आखिरी जोहार
9 तिमुथियुस, हमरा भीरा जल्दिये आवे खातिर कोसिस करिहें । 10 काहेकि देमास सन्सारिक चीज में मन लगा के हमरा छोड़ देले हई आऊ थिसलुनिकी सहर में चल गलई, करेसकेस गलातिया इलाका में आऊ तितुस दलमतिया इलाका में चल गलथीन । 11 खाली लुका हमरा भीरा हई । मरकुस के आपन संगे लेले अइहें, काहेकि सेवा खातिर उ हमरा ढेरे मदत करले हई । 12 तुखिकुस के हम इफिसुस नगर में पेठउले हियई । 13 जवन चदर के हम तरोवास सहर में करपुस के घर में छोड़ले हियऊ, जखनी तू अइबे, त ओकरो आऊ किताबवन के, बिसेस कर के चमड़ा के लिखल पत्र के लेले अइहें ।
14 सिकंदर ठठेरा हमरा संगे ढेरे बुराई कइले हई, परभु ओकरा ओकर काम के जइसन बदला देतथीन । 15 तुहूं ओकरा से चेतल रहिहें, काहेकि उ हमिन के सिक्छा के ढेरे बिरोध कइले हई ।
16 हमर पहिला मुकदमा के घरी कवनो हमरा साथ नई देलई, बाकि सब हमरा अकेले छोड़ देलथीन, हम पराथना करत हियई कि परमेस्वर ओकिन के माफ कर देवे । 17 तबो में परभु हमरा मदत करलथीन आऊ हमरा सामरथ देलथीन, इहेसे हम यीसु मसीह के बढ़िया खबर के साफ-साफ परचार कर सकलियई, आऊ गइर-येहूदी लोगन सुनले हथीन । आऊ परमेस्वर हमरा सिंह के मुंह में पड़े जइसन भयानक दसा से छोड़उलथीन । 18 परभु हमरा हर एक बुरे काम से छोड़उतथीन, आऊ आपन सरग के राज्य में बढ़िया से संभार के पहुंचउतथीन । उनकर महिमा जुग-जुग होते रहतई, आमीन ।
19 पिरिसकिला बहिन आऊ अकविला भाई आऊ उनेसिफुरुस भाई के सबे परिवार के हमर जोहार । 20 इरास्तुस भाई कुरिन्थिस सहर में रह गलई, आऊ तरोफिमुस भाई के हम मिलेतुस सहर में छोड़ले हियई, काहेकि उ बिमार हलई ।
21 तू जाड़ा परे से पहिले इहां आवे के कोसीस करिहें, युबूलुस, पुदेंस, लिनुस भइवन आऊ किलउदीया बहिन आऊ सब भाई-बहिनियन तोहरा जोहार करा हथीन ।
22 परभु तोहर आत्मा के संगे रहतथीन आऊ तोहरा पर परभु के अनुग्रह होते रहतई ।