तितुस खातिर यीसु मसीह के खास चेला पउलुस के चिट्ठी
भूमिका
तितुस बढ़िया खबर सुनावे में पउलुस के साथी हलई । पउलुस ओकर संगे करेते नाम के एगो टापु में गलई, जहां ढेरे युनानी अदमिनियन हलथीन । उहां के कलीसियन खातिर मुखिवन के ठहरावेला पउलुस ओकरा उहंई रहेला कह देलई । इ चिट्ठी में कलीसियन के खातिर ढेरे सलाह देवल गइल हई । कलीसियन के मुखिवन कइसन होखेला चाही ओकर बारे में भी लिखल हई । पउलुस तितुस से अइसन बतउलई कि बिसवासियन के बढ़िया आचरन खातिर परमेस्वर के धन्यबाद करेला चाही, आऊ ओकिन खातिर एगो नमुना बन के बढ़िया जिन्गी जीयेला चाही, आऊ झुठा सिक्छा देवेवोलन से आऊ कलीसिया के परेसान करेवोलन से हट के रहेला चाही । बिसवासियन के बेमतलब बकझक नई करेला चाही, बाकि परमेस्वर के नजर में बढ़िया जिन्गी जीयेला चाही ।
इ चिट्ठी में अइसन लिखल हई कि कवनो के बारे में बुरा बात नई करेला चाही, आऊ केकरो साथे झगड़ा नई करेला चाही, बाकि सीधापन आऊ सब अदमिनियन के संगे बड़ी दयालु होवेला चाही । आऊ बतावत हई कि मुक्ती हमिन के कवनो बढ़िया काम के चलते नई, बाकि यीसु मसीह के दया के चलते होइल हई । हमिन उनकर अनुग्रह के चलते उनकर नजर में बेकसुर होके हमिन अमर जिन्गी के भरोसा के साथे हकदार बनबई । कलीसिया के मुखिया अइसन होवेला चाही जेकरा पर कवनो दोस नई लगा सका हई ।
हमिन परमेस्वर के नजर में बेकसुर होके, आऊ बकझक में नई पड़ के आऊ खंदानी बतिया में मन नई लगा के यीसु मसीह के अनुग्रह के चलते बढ़िया जिन्गी जीये के बारे में ढेर सलाह इ चिट्ठी में हमिन के कलीसियन खातिर लिखल हई ।
रूप-रेखा:
पउलुस के जोहार 1:1-4
करेते टापु में तितुस के काम 1:5-16
सच्चा सिक्छा के मोताबिक चलेला सलाह 2:1-15
मसीह खातिर बिसवासियन के जिन्गी 3:1-11
आखिरी जोहार 3:12-15