तितुस खातिर यीसु मसीह के खास चेला पउलुस के चिट्ठी
पउलुस के जोहार
1
1 हम पउलुस परमेस्वर के बंधुवा दास आऊ यीसु मसीह के खास चेला हियई । परमेस्वर के चुनल अदमिनियन के सच्चा बिसवास के बारे में बतावे खातिर, आऊ सच्चाई के बारे में सिखावे खातिर हमरा भेजल गइल हई। आऊ इ सच्चाई ओकिन के परमेस्वर के नजर में बढ़िया जिन्गी जीयेला मदत करतई । 2 इहे सच्चाई के चलते ओकिन अमर जिन्गी के पूरे भरोसा करा हथीन, एकरा कहियो झुठ नई बोलावोला परमेस्वर सब कुछ सिरजे से पहिले-पहल वादा करले हथीन। 3 आऊ इहे वादा के परमेस्वर आपन ठहरावल समय में बढ़िया खबर के चलते जनउलथीन, आऊ इ बढ़िया खबर के परचार हमिन के मुक्ती देवेवोला परमेस्वर के हुकुम के मुताबिक हमरा जिमा देवल गइल हई ।4 तितुस, हम तोहर खातिर इ चिट्ठी लिखत हियई । तू हमर खातिर एगो सच्चा बेटा जइसन हई, काहेकि हमिन दूनो मसीह यीसु में बिसवास कइले हियई ।
पिता परमेस्वर आऊ हमर मुक्ती देवेवोला मसीह यीसु देने से तोहरा अनुग्रह आऊ सांती मिलते रहतई ।
करेते टापु में तितुस के काम
5 हम तोहरा करेते टापु में इहेला छोड़ देले हियऊ, ताकि तू बचलका काम के पूरा करबे, आऊ हमर हुकुम के मुताबिक सहर-सहर के कलिसियन में मुखिवन के चुन के ठहरइबे। 6 कलीसिया के मुखिया अइसन होवेला चाही, जेकरा पर कवनो दोस नई लगा सका हई, आऊ ओकर एकेगो मेहारु होवे, आऊ ओकिन के बाल-बच्चा चुलपट नई, बाकि माई-बाप के हुकुम मानेवोलन आऊ बिसवासी होवेला चाही । 7 काहेकि कलीसिया के मुखिया के परमेस्वर के काम के देख-ताक करे के चलते अइसन होवेला चाही, जेकरा पर कवनो दोस नई लगा सका हई, आऊ हठीला, तुरत गोसायवोला, निसेबाज, झगड़ा करेवोला आऊ घुसखोर नई होवेला चाही ।
8 बाकि पहुनाई करेवोला, भलाई के चाहेवोला, संयमी, ठीक फइसला करेवोला, परभु के हुकुम के मानेवोला, आपन बस में रहेवोला होवेला चाही । 9 आऊ सिखावल गइल परभू के सिक्छा परे मुखिया के मजबुती से बिसवास करेला चाही, ताकि उ अदमिनियन के सच्चा सिक्छा के सिखा सकतई आऊ बिरोधियन के मूंह बंद करतथीन ।
10 काहेकि ढेरे अदमिनियन सच्चा सिक्छा के नई मानेवोलन, फालतू बतियायवोलन आऊ ठगेवोलन हथीन; जादे करके एकिन यहूदी लोगन में से हथीन । 11 बिसवासियन के झुठा सिक्छा देवे से एकिन के मना करेला चाही, अइसन अदमिनियन नीच कमाई खातिर जवन नई सिखावेला चाही उहो सिक्छा दे के घर-परिवार के नास कर देवा हथीन । 12 करेते टापु में एगो अगमजानी हलई । उ आपन लोगन के बारे में अइसन कहलई कि “करेते के लोगन हर घरी झूठ बोला हथीन, आऊ जंगली जनावर तरी भेयानक आऊ आलसी हदिलाह हथीन” । 13 इ गोवाही में एको दाना झूठ नखई, इहेसे झुठा सिक्छा के पीछे चलेवोलन के डाटिहें, ताकि ओकिन सच्चा बिसवास पर बनल रहतथीन, 14 आऊ यहुदी लोगन के किसा-कहानी, आऊ जे सच्चाई के नई मंजूर करा हथीन, ओकिन के कवनो हुकुम परे मन नई लगउतथीन ।
15 जेकिन मन में सुध हथीन, ओकिन खातिर सब कुछ सुध हई, आऊ जेकिन मन में असुध हथीन आऊ अबिसवासियन हथीन, ओकिन खातिर सब कुछ असुध हई, काहेकि ओकिन के मन आऊ अकिल दूनो असुध हई । 16 झूठा सिक्छा देवेवोलन कहा हथीन कि हमिन परमेस्वर के जाना हियई, बाकि आपन काम से उनकरा इनकार करा हथीन, काहेकि ओकिन अदमिनियन से नफरत कइल गइल आऊ परमेस्वर के नई मानेवोलन हथीन, आऊ कवनो बढ़िया काम के लायक नखथीन ।