सच्चा सिक्छा के मोताबिक चलहीं
2
1 बाकि तू तितुस, बिसवासियन के पक्का आऊ ठोस सिक्छा के सिखावल करिहें । 2 खास कर के बुढ़वन के अइसन सिक्छा दिहें कि ओकिन निसेबाज नई, बाकि आदर के लायक आऊ आपन बस में रहेवोला, आऊ बिसवास, परेम आऊ धीरज में मजबुत होवेला चाही ।3 इहे तरी बुढ़ियनो के अइसन सिक्छा दिहें कि ओकिन के चाल-चलन पबितर होई, ओकिन कुटनी आऊ निसेबाज नई होथीन, बाकि बढ़िया बतिया के सिखावेवोली होथीन । 4 ताकि ओकिन जवनकिन मेहरुवन के सिखउतथीन कि आपन आपन मरदाना आऊ आपन बचवन से परेम रखतथीन । 5 आऊ अपने बस में रहेवोली, पबितर, घर के काम-काज करेवोली, दूसर के दया करेवोली आऊ आपन-आपन मरदवन के बस में रहेवोली होथीन, ताकी कवनो आदमीन परमेस्वर के वचन के बेजती नई करतई ।
6 ओइसही जवनकन मरदवनो के समझावल करिहें कि ओकिनो आपन बस में रहेवोलन होथीन । 7 सब बातियन में बढ़िया काम कर के आपन जिन्गी के एगो नमुना बन जतथीन, आऊ जखनी तू सिखइबे, त गंभीर आऊ आदर साथे सिखाहीं । 8 आऊ जे सच हई उहे सिखाहीं, ताकि कवनो बुरा नई कह सकतई; आऊ तोहरा परे दोस लगावेवोलन लजा जतथीन, काहेकि ओकिन भीर हमिन के बिरोध में कहेला कवनो बुराई के बात नखई ।
9 जेकिन बंधुवा मजदूर हथीन, ओकिन के अइसन समझा देहीं कि आपन-आपन मालिकवा के बस में रह के सब बतियन में ओकर हुकुम मान के ओकरा खुस रखतई आऊ आपन मालिकवा से बकझक नई करतई । 10 कवनो तरीका के चोरी-चलाकी नई करतई; बाकि ओकिन एकदम बिसवास-लायक होवेला चाही । ताकि अदमिनियन हमिन के मुक्ती देवेवोला परमेस्वर के बारे में जवन कुछ हमिन सिखावा हियई, उ सब बतियन के आदर साथे सुनतथीन ।
परमेस्वर के अनुग्रह आऊ नाया जिन्गी
11 काहेकि परमेस्वर के अनुग्रह सब अदमिनियन के मुक्ती खातिर परगट हो गइल हई । 12-13 जखनी हमिन उ धन्य आसरा के, मतलब आपन महान परमेस्वर आऊ मुक्ती देवेवोला यीसु मसीह के राजा बन के महिमा में परगट होवे के बाट जोहत घरी, जे कुछ के परमेस्वर पसंन नई करा हथीन, आऊ सन्सार के मोहमया, इ सब के छोड़ के हमिन इ जिन्गी में अपने आप के बस में करेला, आऊ परमेस्वर के नजर में बढ़िया जिन्गी जीयेला परमेस्वर के उहे अनुग्रह हमिन के सिखावा हई । 14 उहे यीसु मसीह हमिन के सब तरी के बुराई से छोड़ावेला आऊ आपन खातिर हमिन के पबितर अदमिनियन बनावेला अपने आप के हमिन खातिर दे देलथीन, ताकि हमिन भलाई के काम करते रहबई।
15 तू सुनेवोलन के इ सब बतिया के सिखाते रहिहें । आऊ अधिकार साथे ढाडस दिहें, आऊ समझा दिहें । आऊ तू केकरो अइसन मोका मत दिहें कि तोहरा तुच्छ समझतई ।