मसोमतियन के बारे में सलाह
5
1 कवनो बुढ़वन के बेइजत साथे मत डाटिहें, बाकि ओकिन के बाप तरी जान के समझा दिहें आऊ जवान लइकवन के भइवन जइसन समझा दिहें । 2 बुढ़ियन के माई जइसन आऊ जवान अउरतियन के बहिनियन जइसन जान के पूरे पबितर मन से समझा दिहें ।3 जे मसोमतियन जेकरा मदत करेला कोई नई हई, ओकिन के आदर साथे मदत करेला चाही । 4 बाकि अगर जे एगो मसोमात के बाल-बच्चा आऊ नाती-पोती हथीन, त उहे बाल-बच्चा आऊ नाती-पोती पहिले आपन परिवार के करतब के पूरती करेला सिखेला चाही, आऊ जइसे माई-बाप आपन बाल -बच्चा के पोसलई, ओकर बदला में बाल-बच्चा के भी ओइसही करेला चाही, काहेकि परमेस्वर के नजर में इहे करेला पसंन हई ।
5 अइसन मसोमात जेकरा मदत करेला कोई नई हई, आऊ अकेले छोड़ल गइल हई; उ त परमेस्वर परे आपन आसरा रखा हई, आऊ रात-दिन बिन्ती आऊ पराथना में लगल रहा हई । 6 बाकि जे मोसोमात भोगबिलास में आपन जिन्गी जीय हई, उ जीते भर में मुवल के जइसन हई । 7 बिसवासियन के इहो हुकुम देवल करहीं, ताकि ओकिन परे कवनो दोस नई लगावे पउतई ।
8 अगर जे कवनो आपन हितवन आऊ खास कर के आपन घराना के देख-भाल नई करा हई, त उ सचो में बिसवास के छोड़ देले हई । आऊ अइसन हई, त अबिसवासियन एकरा से ढेर बढ़िया हथीन । 9 अइसन मसोमतियन के नाम सूची में लिखेला चाही, जेकिन के उमर साठ बरस से कम न होवे आऊ दुबारा बियाह नई कइले हई, एकिन के कलीसिया बरबरे मदत करेला चाही । 10 आऊ जेकिन दयालु काम करे में नामी हथीन, आऊ आपन बाल-बच्चा के पालल-पोसल करा हथीन, पहुनाई करे में बढ़िया हथीन, परमेस्वर के पबितर लोगन के गोड़वा धोवा हथीन, दुखियन के सहारा करा हथीन, आऊ आपन मनवा के हर किसीम के बढ़िया काम करे में लगउले हथीन ।
11 आऊ ओकिन मसीह के सेवा से अलगे होके मरद संगे जीये के मरजी के चलते बियाह करे के मन करतथीन । इहेसे जवान मसोमातोयन के नाम सूची में नई लिखेला चाही । 12 अइसन बियाह करे के चलते परमेस्वर ओकिन के डंड़ देतथीन, काहेकि सेवा करे के आपन पहिला वादा के तोड़ देले हथीन । 13 एकर साथे-साथे ओकिन घर-घर जाके आलसी होवेला सिखा हथीन, आऊ खाली आलसी नई, बाकि आलजाल करा हथीन आऊ दूसरका के काम में हाथ भी डाला हथीन आऊ जे नई बोलेला चाही उहो बोला हथीन । 14 इहेसे हम जवान मसोमातियन के बियाह करेला आऊ बाल-बच्चा जन्मावेला सलाह देवत हियई, आऊ ओकिन आपन घराना के देख-ताक करेला चाही, ताकि कवनो बिरोधी के सिकाइत करेला कवनो मोका नई मिलतई । 15 काहेकि केतने जवान मसोमातियन सइतान के माने खातिर मसीह के मानेला छोड़ देलथीन ।
16 बाकि कवनो बिसवासी अउरत के घर में कोई मसोमातियन हथीन, त उ ओकिन के सहारा करेला चाही, ताकि कलीसिया परे भोझ नई होवे, आऊ कलीसिया के, जे दूसर मसोमातियन जेकिन के सहारा करेला कोई नई हई, ओकिन के देख-ताक कर सकतई ।
कलीसिया के मुखिवन के बारे में सलाह
17 कलीसिया के मुखिवन, आऊ खास कर के परमेस्वर के वचन के सुनावे आऊ सिकावे में मेहनत करेवोलन इजत साथे पइसा के मदत मिले के जोग हथीन । 18 काहेकि परमेस्वर के किताबa में लिखल हई, “ दउंरी में नधायवोला बइलन के मुंह के नई जाब” आऊ काम करेवोला आपन कमाई पावे के भागी हई।
19 जखनी कवनो आदमीन कलीसिया के मुखिवन के ऊपर कवनो दोस लगावा हई आऊ दो-तीन गोवाहवन नई होतथीन, त उ बतिया के नई सुनेला चाही । 20 अगर मुखिवन सचो में पाप करते रहा हथीन, त ओकिन के कलीसिया के लोगन भीरा डाटिहें, ताकि दूसर पाप करेवोलन के चेतावनी हो जाई ।
21 परमेसर, मसीह यीसु आऊ चुनल सरगदूतवन के गोवाह मान के हम तोहरा सचो में समझा देवत हियई कि इ सब हुकुम के गहिड़ मन से मनिहें, आऊ कवनो के पीछा मत लिहें ।
22 जखनी तकला एगो के आचरन ठीक नई हई तब तकला कलीसिया के मुखिवन के काम करे खातिर आपन हाथ ओकर पर रख के जल्दबाजी चुन के अलग नई करेला चाही, अइसन करे*, त तुहो ओकर पाप में मिलल हहीं; इहेसे आपन जिन्गी के पबितर बनइहें ।
23 हे तिमुथियुस, ‘खाली पनिये मत पीहें, बाकि खाना पचावे खातिर आऊ बार-बार बिमार होवे के चलते, अंगुर के रस भी पीहें ।