6
1 जेतने बिसवासी लोगन बंधुवा मजदूर के रूप में काम करा हथीन, ओकिन आपन-आपन मालीक के ढेरे इजत करेला चाही, ताकी परमेस्वर के नाम आऊ हमिन के सिक्छा के बेइजती कवनो नई करतथीन । 2 जेकिन के मालिक बिसवासी हई, ओकिन आपन मालिक के मसीह में भाई जान के मालिक के जवन इजत देवेला चाही, ओकरा में तनको कम नई करेला चाही, बाकि आऊ बढ़िया से ओकरा सेवा करेला चाही, काहेकि जेकिन के सेवा करत हई ओकिनो बिसवासी आऊ दुलरुवा हथीन । तू इहे बतिया के सिखउते आऊ समझउते रहिहें ।3 अगर जे कवनो झूठा सिक्छा जवन परभू यीसु के सही सिक्छा के बिरोध में हई, आऊ परमेस्वर के नजर में बढ़िया जिन्गी जीये में कोई फइदा नई करा हई, ओकरा सिखावा हई, 4 त उहे आदमीन घमंड़ी हो गलई आऊ सचो में कुछु नई जानत हई, बाकि अइसन आदमीन के बेमतलब के बतियाय के आऊ बहस करे के खराब आदत हई, एकर चलते जरन, झगड़ा, सिकाइत के बात, खराब -खराब सोच-बिचार होखा हई । 5 आऊ ओकिन के बीच में बेमतलब के लड़ाई-झगड़ा होते रहा हई, आऊ ओकिन के अकिल बिगड़ गइल हई, आऊ अइसनो होतई कि ओकिन सच्चाई के कहियो नई समझतथीन ।a इहे चलते ओकिन झुठो के सोतच हथीन कि परमेस्वर के सेवा धन कमाय के एगो बढ़िया उपाय हई ।
6 बाकि संतोख साथे परमेस्वर के सेवा हीb एगो बड़का कमाई हई । 7 काहेकि कवनो इ दुनिया में कुछो नखई लनले आऊ न कवनो इहां से कुछो ले जा सका हई । 8 इहेसे अगर हमिन भीरा खाएला आऊ पहिनेला कुछु हई, त हमिन के एकरा में संतोख से रहेला चाही ।
9 बाकि कई अदमिनियन धनइता बनेला चहा हई, इहेसे ओकिन गलत काम कर के पइसा कमाय के खराब आदत में पड़ जा हथीन, आऊ जइसे जानवर फाना में बाझा हई, ओइसही उकिनो बझतथीन । ओकिन ढेरे चीजवन ला बेअकिल* से लालच करा हथीन, आऊ उहे ओकिन के घटी के फाना बन जतई आऊ इ सब लालच के चलते अदमिनियन बिगड़ जतथीन आऊ नास के गाहड़ा में ढकेलल जतथीन । 10 काहेकि रुपिया-पइसा के लालच सब तरी के बुराई के जर हई, जेकरा पावेला कोसिस करते करते केतना अदमिनियन मसीह के सिक्छा से आपन बिसवास हटा के ओकिन बड़ी दुख-तकलिफ से घायल हो गलथीन ।
पउलुस के आखिरी सलाह
11 बाकि तू तिमुथियुस, जे परमेस्वर के आदमीन, इ सब बतियन से दूर रहिहें; जे सही हई उहे करिहें, आऊ जे परमेस्वर के पसंन हई उहे करिहें, आऊ परमेस्वर परे बिसवास रखिहें, आऊ दूसर संगे पेयार-दुलार रखिहें, आऊ दुख-तकलिफ में ढाढ़स रखिहेंc, आऊ कवनो परे नई गोसइहें । 12 जइसन एगो सइनिक आपन दुसमनवन से लड़ाई करते रहा हई, ओसही तुहूं सच्चा बिसवास खातिर लड़ाई करते रहिहें, खतम नई होवेवोला जिन्गी के पकड़ लिहें जेकरा खातिर तोहरा बुलावल गइल हई । ओकरा तू ढेरे गवाहवन भीरा मान लेले हहीं । 13 परमेस्वर जवन सब के जीयत रखा हई, आऊ मसीह यीसु जवन पुंतियुस पिलातुस के भीरा बढ़िया अंगीकार करलथीन, एकिन दूयो के गोवाह रख के हम तोहरा से इ हुकुम देवत हियई, 14 कि तू हमिन के परभु यीसु मसीह के दुबारा आवे तक इ हुकुम के बेकसुर मनिहें आऊ एकरा माने में कोई कसर मत छोड़िहें । 15 उहे मसीह के आवल परमेस्वर ठीके घरी परगट करतथीन, उ धन्य आऊ एकेगो राजा आऊ राजवन के राजा आऊ परभूवन के परभू हथीन । 16 आऊ जवन कहियो नई मुतथीन, उ उहे परमेस्वर हथीन, उ अइसन इंजोत में रहा हथीन जहां कवनो नई जा सका हई, उनकरा कवनो नई देखले हई आऊ कवनो नई देख सका हई, अदमिनियन उनकरा आदर करतथीन आऊ उ सक्ती साथे जुग-जुग राज करतथीन, आमीन ।
17 इ दुनिया के धनइतवनd के अग्या दिहें कि ओकिन घमंड़ीe नई होवे आऊ आपन धन परे आसरा नई रखतथीन जे जल्दिये खतम हो जतई, बाकि परमेस्वर पर आसरा रखतथीन । खुसी मनावे खातिर हमिन के जिन्गी में सब कुछ ढेर से ढेर देवेवोला उहे हथीन । 18 ओकिन के इ हुकुम दिहें कि ओकिन के ढेर से ढेर धन-दउलत जइसन, ओकिन के भलाई के काम भी ढेर से ढेर होखेला, आऊ ओकिन दान करे में आऊ दूसर के मदद करे में तइयार रहेला चाही । 19 ओकिन अइसन करतथीन, त ओकिन आवेवोला जिन्गी खातिर बढ़िया काम के एगो मजबुत नीव ढाल रखा हथीन । आऊ अइसन करे से ओकिन एकेगो सच्चा जिन्गी पउतथीन ।
20 हे तिमुथियुस, जवन जिमवारी परमेस्वर तोहरा देले हथीन, उ करे में धेयान रखिहें, आऊ जवन बतिया परमेस्वर के पसंन नई हई ओकरा बतावेवोलन से हट के रहिहें, जेकिन झूठो के कहत हथीन कि ओकिन भीर सच्चा गेयान हई, बाकि ओकिन सच्चा सिक्छा के बिरोध में हथीन । 21 काहेकि ढेरे अदमिनियन इ झुठा सिक्छा के मंजूर कइले हथीन आऊ अइसन कर के सच्चा बिसवास से भटक गलथीन ।
परमेस्वर के अनुग्रह तोहिन पर होइते रहतई ।