पराथना करे के बिन्ती
3
1 हे भइवन-बहिनियन, हम आखिरी में कहत हिवा कि हमिन खातिर पराथना करिहां, ताकि जइसन तोहिन के बीचवा में होलई, ओइसही परभु के वचन जलदीये फइलतई आऊ महिमा पउतईa । 2 आऊ पराथना करिहां कि हमिन गलत आऊ दुस्ट अदमिनियन से बचल रहबई, काहेकि सब अदमिनियन परभु परे बिसवास नई करत हथीन । 3 बाकि परभु बिसवासजोग हथीन, उ तोहिन के बिसवास के मजबुत करतथीन आऊ सइतान से बचउतथीन । 4 हमिन के तोहिन के बारे में परभु में एकदम बिसवास हई कि जवन-जवन हुकुम हमिन तोहिन के देले हिवा, ओकरा तोहिन मानत हां आऊ मानते भी रहबा । 5 परभु तोहिन के मनवा के परमेस्वर के परेम आऊ मसीह के धीरजb देने से अगुवाई करतथीन ।बढ़िया जिन्गी जीये के सलाह
6 हे भइवन-बहिनियन, हमिन आपन परभु यीसु मसीह के अधिकार से तोहिन के हुकुम देवत हिवा कि तोहिन अइसन बिसवासियन से अलगे रहिहां, जेकिन कोरही हथीन, आऊ जवन सिक्छा हमिन से पउले हथीन, ओकरा तरी नखथीन चलत ।c 7 तोहिने जानत हहीं कि तोहिन कवन तरी से हमिन के जइसन चाल चलेला चाही, काहेकि हमिन तोहिन भीरा कोरही बनके नई रहलियई । 8 आऊ हमिन कवनो से खाय-पियला फोकट में नखियई खइले, बाकि मेहनत आऊ तकलिफ से रात-दिन काम-धन्हा करत हलियई कि तोहिन में से कवनो परे बोझ नई होवे । 9 अइसन नई हई कि हमिन के तोहिन से खाय-पियला मांगेला हक नई हई, बाकि इहेला कि हमिन आपन जिन्गी के तोहिन खातिर एगो नमुना बनबई, ताकि तोहिनो हमिन जइसन चाल चलबहीं । 10 काहेकि जखनी हमिन तोहिन भीर हलियई, तबे इ हुकुम तोहिन के देवत हलियई कि “जे कवनो काम करेला नई चाहतई उ खइबो मत कर ।
11 हमिन सुनत हियई कि कुछ लोगन तोहिन के बीचवा में ठीक चाल नखथीन चलत, आऊ कुछो काम नई करा हथीन, बाकि दूसरका के कामवा में हाथ डाला हथीन । 12 अइसन लोगन के हमिन परभु यीसु मसीह के नाम में हुकुम देवत आऊ समझावत हियई कि ओकिन सांती से आपन काम-धन्हा करतथीन आऊ आपन कमाई के खाइल करतथीन । 13 हे भइवन-बहिनियन, तोहिन त भलाई करे में हियाव के मत छोड़िहां ।
14 अगर कवनो हमिन के इ चिट्ठी के बतिया के नई मानतई, त ओकर पर नजर रखिहां, आऊ ओकरा संगे संगती मत करिहां, ताकि उ लजा जाई । 15 तबो में ओकरा दुसमन मत मनिहां, बाकि ओकरा भाई-बहिन समझ के चेतावल करिहां ।
आखिरी जोहार
16 अब सांती देवेवोला परभु यीसु खुद ही तोहिन के हरदम आऊ हर तरी से सांती देवे । आऊ परभू तोहिन सब संगे रहतथीन।
17 हम पउलुस, आपन हाथ से इ जोहार लिखत हिवा, हमर सब चिट्ठी में इहे पहचान हई; हम अइसही लिखत हिवा ।
18 हमिन के परभु यीसु मसीह के दया तोहिन सब परे होवे ।