यीसु मसीह के आवे के अगाड़ी का का होतई
2
1 हे भइवन-बहिनियन, अभी हमिन के परभु यीसु मसीह के दुबारा आवे के, आऊ उनकरा भीरा हमिन के जुटे के बारे में तोहिन से बिन्ती करत हिवा । 2 कइएक लोगन झुठो के कहत हथून कि ओकिनो पबितर आत्मा से सुनले हथून, अइसने कुछु सिक्छा के भी सुनले हथून आऊ इहो कहत हथून कि हमिन के चिट्ठी ओकिन के मिलल हई आऊ कहत हथून कि परभु के आवल हो चुकलई, अइसन झूठ के सच समझ के तोहिन मनवा में असानी से मत डगमगइहां आऊ मत घड़बड़इहां । 3 कवनो तोहिन के कवनो तरी से नई ठगे, काहेकि परभू के उ दिन नई अतई, जखनी तक अदमिनियन परमेस्वर परे से बिसवास नई छोड़ देतथीन आऊ पाप के मनुस मतलब नास के बेटा नई आ जतई । 4 उहे सब चीज के बिरोध करतई, परमेस्वर चाहे पुजनीय कहावा हई, ओकिनो से अपने आप के बड़ा समझतई, इहां तक कि उ परमेस्वर के मंदिर में बइठ के अपने आप के परमेस्वर कहतई ।5 का तोहिन के इयाद नखई कि जखनी हम तोहिन भीरा हलियई, तब हम इ सब बतिया तोहिन से कहत हलियई ? 6 तोहिन जानत हां कि कवन इ नास के बेटा के रोकत हई, ताकि उ आपन समय से अगाड़ी नई अतई । 7 पाप के लुकाइल सक्ती अभियो काम करत हई, बाकि जखनी तक इ सक्ती लुकाइल रहतई, तब तक ओकर बिरोध करेवोला नई हटावल जतई । 8 जखनी बिरोध करेवोला दूर हो जतई तखनिये उ विनास के बेटा आ जतई, जेकरा परभु यीसु आपन बोली से मुवा देतथीन आऊ आपन आवे के इंजोत से जला देतथीन ।
9 उहे विनास के बेटा के आवल सब तरिका के झुठा सक्ती, चिन्हा आऊ अजगुत काम आऊ पाप के सब धोखा संगे होतऊ, जे सइतान देने से हई । 10 काहेकि नास होखेवोलन मुक्ती पावेवोला सच्चाई के पेयार मतलब यीसु मसीह के बढ़िया खबर के मंजूर नई करलथीन; इहेसे ओकिनो नास हो जतथीन । 11 इहेला परमेस्वर ओकिन खातिर एगो झुठा सक्ती के पेठउतथीन कि ओकिन झुठ परे बिसवास करतथीन । 12 ताकि जेकिन सच्चाई मतलब यीसु मसीह के बढ़िया खबर परे बिसवास नई करलथीन, बाकि ओकिन पाप के काम से खुसी होलथीन; इहेसे परमेस्वर ओकिन सब के डंड़ देतथीन ।
बिसवास में मजबुत होखा
13 हे परभु के दुलरुवा भइवन-बहिनियन, परमेस्वर पबितर आत्मा के चलते तोहिन के पबितर कर के आऊ सच्चाई में बिसवास करे के चलते मुक्ती पावे खातिर पहिलही से तोहिन के चुन के अलगे करलथीन । इहेसे हमिन तोहिन के बारे में हरमेसा परमेस्वर के धन्यबाद करते रहबई । 14 इहे मुक्ती खातिर उ बढ़िया खबर, जे हमिन परचार कइले हियई ओकर चलते तोहिन के बुलउलथीन, ताकि तोहिन हमिन के परभु यीसु मसीह के महिमा पा सकलहूं ।
15 इहेसे हे भइवन-बहिनियन, अस्थिर रहिहां आऊ जवन जवन सिक्छा हमिन बोली चाहे चिट्ठी के चलते सिखउले ही ओकरे में बनल रहिहां ।