लांगड़ भीखमांगा चंगा होलई
3
1 एक दिन पतरस आऊ यूहन्ना दिन में तीन बजे पराथना करे घरी परमेस्वर के मंदिर में जात हलथीन । 2 तखनी लोगन एगो जन्मे के लांगड़ के लानत हलथीन, जेकरा ओकिन रोज दिन परमेस्वर के मंदिर के ‘सुंदर नाम के एगो फाटक’ पर मंदिर में जायवोलन से भीख मांगेला बइठा देवत हलथीन । 3 जखनी उ पतरस आऊ यूहन्ना के परमेस्वर के मंदिर में जात देखलई, त ओकिन से भीख मंगलई । 4 पतरस यूहन्ना के संगे ओकर देन गउर से देख के कहलई, “हमिन देन देख !” 5 त उ लांगड़ आदमीन ओकिन से कुछ मिले के आसरा कर के ओकिन देन देखे लगलई ।6 तखनी पतरस कहलई, “चनिया आऊ सोनवा त हमरा भीर नखई, बाकि जवन हमरा भीर हई उ तोहरा देवत हियऊ; नासरत के यीसु मसीह के नाम से उठ के हिठ ।” 7 आऊ पतरस ओकर दाहिना हाथ धर के उठउलई; आऊ तुरतीये ओकर गोड़वा आऊ ठेहुननुवा में ताकत आ गलई । 8 उ तड़प के डीड़ी हो गलई आऊ हिठे-घुरे लगलई, आऊ हिठत, कुदत, आऊ परमेस्वर के बढ़ाई करत ओकिन संगे परमेस्वर के मंदिर में गलई ।
9 सब अदमिनियन ओकरा हिठत-घुरत, आऊ परमेस्वर के बढ़ाई करत देख के, 10 ओकरा चिन्हलथीन कि इ उहे हई जवन परमेस्वर के मंदिर के ‘सुंदर नाम के फाटक’ पर बइठ के भीख मांगत हलई; आऊ ओकिन इ घटना जे ओकरा संगे होइल हलई, ओकरा से अकचका आऊ चकचिहा गलथीन ।
पतरस के परचार
11 जखनी उ पतरस आऊ यूहन्ना के धइले हलई, त सब लोगन ढेर आचरज करत खुद के उ ढाबा में अलथीन जे सुलइमान राजा के ढाबा कहावत हई । 12 इ देख के पतरस लोगन से कहलई, “हे इसराएली लोगन, तोहिन इ आदमीन पर काहे आचरज करत हहीं ? आऊ हमिन देने काहे अइसन देखत हहीं ? का हमिने आपन सक्ती चाहे भक्ती से एकरा हिठे-घुरे लायक बना देलियई ? 13 अबराहाम आऊ इसहाक आऊ याकूब के परमेस्वर जे हमिन के पुरखवन के परमेस्वर आपन दास यीसु के महिमा करलथीन, जेकरा तोहिन धरवा देला, आऊ जखनी पिलातुस उनकरा छोड़ देवेला सोचलई, तखनी तोहिन ओकर सामने उनकरा नहकार कइला । 14 तोहिन उ पबितर आऊ धर्मी आदमीन के नहकार देला, बाकि तोहिन खातिर एगो मुवावेवोला आदमीन के छोड़ावेला बिन्ती कइला । 15 आऊ तोहिन जान देवेवोला के मूवा देला, जेकरा परमेस्वर मुवलकन में से जियउलथीन; आऊ इ सब बतियन के हमिन गोवाह ही ।
16 आऊ जे बिसवास यीसु पर हई, ओकर चलते उहे नाम ही इ आदमीन के सक्ती देलई, जेकरा तू देखत आऊ जानबो करा हहीं । जे बिसवास यीसु पर हई, उहे चलते एकरा तोहिन सब के देखते भर में एकदम ठीक कर देले हई ।
17 “अबही हे भइवन-बहिनियन, हम जानत हियई कि तोहिन इ काम अन्जाने में कइलहूं, आऊ ओइसही तोहिन के नेतवनो करलथीन । 18 बाकि जवन वादा परमेस्वर आपन देने से बोलेवोलन के चलते ढेरे पहिले से बतउले हलथीन कि उनकर मसीह दु:ख उठउतथीन, उ वादा के उहे तरी पूरा करलथीन । 19 इहेसे पाप छोड़ के परमेस्वर देने आवा ताकि तोहिन के पाप मिटावल जतई, आऊ परभु भीर से नया ताकत अतई, 20 आऊ परभु तोहिन के सांति के समय देतथीन, तखनी परभु तोहिन खातिर मसीह के पेठउतथीन जिनकरा उ तोहिन खातिर चुन लेले हथीन । उ मसीह यीसु हथीन । 21 इ जरूरी हई कि उ सरग में उ घरी तक रहतथीन, जब तक परमेस्वर सब सिरजल चीजवन के सहियार नई लेतथीन जेकर वादा परमेस्वर आपन देने से बोलेवोला पबितर सेवकवन के चलते पहिलही से कइले हथीन । 22 जइसन परमेस्वर देने से बोलेवोला मूसा कहलई, ‘परभु तोहिन के परमेस्वर तोहिन के भइवन में से तोहिन खातिर हमरा जइसन परमेस्वर देने से बोलेवोला एगो आदमीन के उठउतथीन, जवन कुछ उ तोहिन से कहतथीन उ सब के सुनेला चाही । 23 बाकि जे कवनो परमेस्वर देने से बोलेवोला उ आदमीन के बतिया नई सुनतई, ओकरा लोगन में से निकालल जतई ।’
24 आज-कल जे होवत हई, एकर बारे में परमेस्वर देने से बोलेवोला समूएल से लेके अबही तक परमेस्वर देने से बोलेवोला सब लोगन खबर देले हथीन । 25 तोहिन परमेस्वर देने से बोलेवोलन के बच्चवन आऊ उ वादा के हकदार हहूं, जे परमेस्वर तोहिन के बाप-दादवन से कलथीन, उहे परमेस्वर अबराहम से कहलथीन, ‘तोहर अगाड़ीवोला खंदान के चलते दुनिया के सब जातियन आसिरबाद पउतथीन ।’ 26 परमेस्वर आपन सेवक के उठा के पहिले तोहिन भीर पेठउलथीन, ताकि तोहिन में से हर कवनो के आपन सब बुराई से फेर के आसिरबाद देवे ।”