पतरस आऊ यूहन्ना यहूदी नेतवन के सभा में
4
1 पतरस आऊ यूहन्ना लोगन से कहत हलथीन, त याजकवन आऊ परमेस्वर के मंदिर के रखवरवन के मुखिया आऊ सदूकी लोगन ओकिन भीर चल अलथीन। 2 एकिन बड़ी गोसाइल हलथीन काहेकि पतरस आऊ यूहन्ना लोगन के सिखावत हलथीन आऊ मुवलकन में से यीसु के जी उठे के साबूत देके मुवलकन के जी उठे के बारे में परचार करत हलथीन । 3 पतरस आऊ यूहन्ना के ओकिन धर के दूसरका दिन तक जेल में रखलथीन, काहेकि सांझ हो गइल हई । 4 बाकि एकिन के बतिया के सुनेवोलन में से ढेरे लोगन बिसवास करलथीन, आऊ ओकिन के गिन्ला में करीब-करीब पांच हजार मरदाना हो गलथीन ।5 दूसरका दिन यहूदी सभा के अधिकारियन आऊ पुरनियन आऊ नियम के गुरुयन 6 आऊ महा याजकवन हन्ना आऊ कइफा आऊ यूहन्ना आऊ सिकंदर आऊ महा याजक के घराना के सब लोगन यरूसलेम सहर में जमा होलथीन । 7 ओकन इ दुयो चेलवन के बीचे में डीड़ी करके पूछे लगलथीन कि तोहिन इ काम केकर सक्ती आऊ केकर नाम से कइले हहीं ।
8 तखनी पतरस पबितर आत्मा से भरपूर होके ओकिन से कहलई, 9 “हे लोगन के सरदरवन आऊ पुरनियन, इ लांगड़ आदमीन के जिन्गी में होइल भलाई काम के चलते, उ आदमीन कइसन ठीक होइल हई ओकर बारे में आज अगर तोहिन हमिन से पता करत हहीं, 10 त तोहिन सब आऊ सब इस्राएली लोगन जान लेहूं कि जिनकरा तोहिन कुरुस पर चढ़ा के मूवा देलहूं, आऊ जिनकरा परमेस्वर मूवलकन में से जियउलथीन, उहे नासरत के यीसु मसीह के नाम से इ आदमीन तोहिन भीरा ठीक होके डीड़ी हई । 11 इहे यीसु उ पखल जइसन हई, जेकरा तोहिन राजमिस्तिरियन बिन काम के जान के निकाल देलेहूं आऊ उहे कोना के सिरा के पखल हो गलई ।a 12 मुक्ती केकरो से नई होतई, काहेकि सरग के नीचे अदमिनियन के बीच में आऊ कवनो दूसर नाम नई देवल गलई जेकरा से हमिन मुक्ती पा सकबई ।”
13 ओकिन पतरस आऊ यूहन्ना के हिम्मत देखलथीन, आऊ इ जानलथीन कि एकिन पढ़ल नखथीन, खाली सधारण आदमीन हथीन, त अचरच होलथीन आऊ ओकिन के अइसन चिनलथीन कि ओकिन यीसु के संगे रहल हलथीन । 14 ठीक होइल आदमीन के ओकिन संगे डीड़ी होइल देख के ओकिन के बिरोध में कुछो नई कह सकलथीन । 15 बाकि ओकिन के यहूदी नेतवन के सभा के बहरे जाएला हुकुम देके, ओकिन अपनन में सोचे लगलथीन,
16 “हमिन इ अदमिनियन के संगे का करियई ? काहेकि एकिन के चलते एगो अजगुत चिन्हा देखावल गइल हई, उ यरूसलेम सहर के सब रहेवोलन के नजर में होइल हई; इहेसे हमिन एकर इन्कार नई कर सका हियई । 17 बाकि इहेला कि इ बतिया दूसर आऊ लोगन में नई फइलेला चाही, हमिन एकिन के जना देबई, ताकि एकिन इ नाम से दुबारा कवनो आदमीन भीर इ बतिया नई बतावे ।” 18 त इ दूनो चेलवन के बोलउलथीन आऊ जना के अइसन कहलथीन, “यीसु के नाम से न कुछ बोलेला चाही आऊ न कुछ सिखावेला चाही ।”
19 बाकि पतरस आऊ यूहन्ना ओकिन के जबाब देलथीन, “तोहिने फइसला करा, का इ परमेस्वर के नजर में बढ़िया हई कि हमिन परमेस्वर के बतिया से बढ़के तोहिन के बतिया के मनियई । 20 काहेकि इ त हमिन से नई हो सकतई कि जवन हमिन देखले आऊ सुनले ही, ओकरा नई कहियई ।”
21 तखनी ओकिन इ दूनो चेलवन के आऊ धिरा के छोड़ देलथीन, काहेकि लोगन के चलते एकिन के डड़ देवे के कवनो दांव-पेच नई मिललई, इहेसे कि जवन घटना होइल हलई, ओकर चलते सब लोगन परमेस्वर के बड़ाई करत हलथीन । 22 इ लांगड़ आदमीन चालीस बरस से जादे के हलई, जेकरा पर इ अजगुत चिन्हा होइल हलई ।
बिसवासियन के पराथना
23 पतरस आऊ यूहन्ना छूट के आपन साथी बिसवासियन भीर अलथीन, आऊ महा याजकवन आऊ यहूदी नेतवन जे कुछ ओकिन से कहलथीन, उ सब साथी बिसवासियन के सुना देलथीन । 24 इ सुन के ओकिन एक मन होके जोर-जोर से परमेस्वर से कहलथीन, “हे मालिक, सरग आऊ धरती आऊ समुंदर आऊ जे कुछो ओकिन में हथीन, उ सब के सिरजेवोला रउवे हिये । 25 रउवा पबितर आत्मा के चलते आपन सेवक हमिन के पुरखा दाऊद राजा के मुंह से कहली,
‘जात-जात के लोगन हल्ला काहे मचावत हथीन ?
देस-देस के लोगन काहे बुड़बकाही बतिया के सोचत हथीन ?
26 परभु आऊ उनकर मसीह के बिरोध में
दुनिया के सब राजवन डीड़ी होलथीन,
आऊ सब अधिकारियन एक मते जमा हो गलथीन ।’
27 काहेकि सचो में हेरोदेस आऊ पुन्तियुस-पिलातुस भी गेइर-यहूदियन आऊ इस्राएली लोगन के संगे राउर पबितर सेवक यीसु जिनकरा रउवा मसीह कर के अलगे कइले हली, उनकर बिरोध में इ सहर में जमा होलथीन, 28 ताकि उहे करतथीन जे रउवा आपन सक्ती से आऊ योजना के मुताबिक पहिलही से ठहरउले हली । 29 हे परभु, अबही ओकिन के धिरावल के देखूं, आऊ आपन सेवकवन के इ बरदान दिहूं कि राउर खबर बड़ी हिम्मत के साथे सुनउतथीन । 30 चंगाई करेला रउवा आपन हाथवा बढ़ाऊं कि अजगुत चिन्हा आऊ अज्गुत काम राउर पबितर सेवक यीसु के नाम से कइल जाई ।”
31 जखनी ओकिन पराथना कर लेलथीन, त जहंई ओकिन जमा हलथीन, उ जगह डोल गलई, आऊ ओकिन सब पबितर आत्मा से भरपूर हो गलथीन, आऊ परमेस्वर के वचन हिम्मत से सुनावते रहलथीन ।
पहिलकन बिसवासियन के सझिया जिन्गी
32 सब बिसवासियन एक मन आऊ एके बिचार के हलथीन, इहेसे कवनो आपन धन-दउलत के आपन नई कहत हलथीन, बाकि सब कुछ सझिये में हलई । 33 खास चेलवन बड़का सामरथ से परभु यीसु के जी उठे के गोवाही देवत रहलथीन आऊ ओकिन सब परे बड़का किरपा हलई । 34 ओकिन में से कवनो के कवनो कमी नई हलई, काहेकि जेकिन भीरा जमीन चाहे घर हलई, ओकिन ओकरा बेच-बेच के, बेचलका समान के किमत लावत आऊ ओकरा खास चेलवन के गोड़वा परे रखत हलथीन । 35 आऊ जइसन जेकर जरूरी होवत हलई, ओकरे मुताबिक सब के बीचे बांट देवल करा हलई ।