पबितर आत्मा के उतरेला
2
1 जे घरी यहूडियन पेन्तिकुस्त के परब मनावे के दिन अलई, त उहे एक-सौ बीस भइवन-बहिनियन एक जगह जमा होलथीन । 2 एकबइक आसमान से बड़का आन्ही जइसन सनसनाते आवाज अलई, आऊ ओकरा से सउसे घर भर गलई, जहां ओकिन बइठल हलथीन । 3 आऊ आगी जइसन फटल जिभियन ओकिन के देखलई आऊ ओकन में से एक-एक परे आके ठहरलई। 4 आऊ ओकिन सब पबितर आत्मा से भरपूर होलथीन, आऊ जइसे पबितर आत्मा ओकिन के बोलेला सामरथ देलई, ओइसही ओकिन नखथीन सिखल भाषा बोले लगलथीन ।5 उहे घरी दुनिया के हर एक देस से आइल भक्त यहूदी लोगन यरुसलेम में रहत हथीन । 6 जखनी उ आवाज के सुनलथीन त भीड़ लाग गलई आऊ अदमिनियन चकरीया गलथीन, काहेकि हर एक के अपने ही भासा में बोलते सुनलई। 7 ओकिन सब चकचिहा के आऊ अकचका के कहे लगलथीन, “अरे, का इ सब गलीली के लोगन नखथीन ? 8 त फिन इ कइसन बात हई कि हमिन आपन-आपन जन्म भूमी के भासा में ओकिन के बोलत सुनत हियई । 9 हमिन सब जे पारथी आऊ मेदी आऊ एलामी आऊ मेसोपोटामिया आऊ यहूदिया आऊ कप्पूदूकिया आऊ पुन्तुस आऊ आसिया, 10 आऊ फुरगिया आऊ पंफूलिया आऊ मिस्र आऊ लिबिया देस जे कुरेने भीर हई इ सब देसवन के रहेवोलन आऊ रोमी से आके इहां रहेवोलन, 11 आऊ यहूदी लोगन आऊ यहूदी धरम के मंजूर करेवोलन आऊ करेती आऊ अरब के रहेवोलन हथीन । बाकि हमिन आपन-आपन भाषा में परमेस्वर के बड़का-बड़का काम के चर्चा ओकिन के चलते सुनत हियई ।” 12 आऊ ओकिन सब चकचिहा के आऊ अकचका के एक दुसरे से कहे लगलथीन, “इ का होवत हई ?” 13 बाकि दूसरकन मजाक उड़ा के कहलथीन, “इ सब त नयका अंगुर के रस के निसा में मातल हथीन ।
पतरस के भासन
14 त पतरस उ एगारहो खास चेलवन संगे डीड़ी होके जोर से कहे लगलई, “हे यहूदीया के लोगन आऊ यरूसलेम के सब रहेवोलन, इ जान लेहूं आऊ कान खोल के हमर बतिया सून लेहूं। 15 जइसन तोहिन सोचत हहूं, एकिन सब निसा में नखथीन, काहेकि अभी त लगभग नौ बजल हई । 16 बाकि इ उहे बात हई जे परमेस्वर देने से बोलेवोला योवेल के चलते कहल गइल हलई :
17 ‘परमेसर कहा हथीन, कि आखरी दिना में
अइसन होतई कि
हम आपन आत्मा सब अदमिनियन पर
उझीलबई, आऊ तोहिन के बेटवन आऊ
तोहिन के बेटियन हमर देने से बोलतथीन,
आऊ तोहिन के जवनवन दरसन देखतथीन
आऊ तोहिन के पुरनियन सपना देखतथीन ।
18 बाकि हम आपन दासवन आऊ दासियन परे
भी उ दिनवन में आपन आत्मा के उझीलबई
आऊ ओकिन हमर देने से बोलतथीन
19 आऊ हम ऊपरे आसमान में अजगुत
काम आऊ नीचे धर्ती पर अजगुत चिन्हा मतलब
खून आऊ आगी आऊ कुहिया के बदरी
देखाबई।
20 परभु के राजा तरी आवे के दिन के पहिले
सूरज अन्हार आऊ चन्दरमा खून तरी लाल
हो जतई।
21 आऊ जे कवनो परभु के नाम जपतई,
उहे मुक्ती पउतई ।’
22 हे इस्राएली लोगन, इ बतिया सुन लेहूं : नासरत के यीसु एगो अइसन आदमीन हलथीन जेकरा परमेस्वर सामरथ के काम आऊ अजगुत काम आऊ अजगुत चिन्हा से साबूत करलथीन, इ सब परमेस्वर यीसु के चलते तोहिन भीर कलथीन । इ तोहिने खुद जानत हहूं । 23 उहे यीसु पकड़वावल गलथीन आऊ तोहिने उनकरा गेइर-यहूदियन के हाथवा से कुरुस पर ठोक के मूवा देलहूं । परमेस्वर इ योजना के पहिलही से तय कइले हलथीन, आऊ पहिलही से जानतो हलथीन । 24 बाकि परमेस्वर उनकरा भेयानक मउवत से छोड़ा के जियउलथीन, काहेकि मउवत के यीसु के आपन बस में कहियो नई रख सका हलई । 25 काहेकि दाऊद राजा उनकर बारे में अइसन कहले हलई,
“हम हरदम परभु के आपन भीर देखा हियई
काहेकि उ हमर दहिने देन हई, ताकि हम
नई डगमगा जाई।
26 इहे चलते हमर मन खुस होलई,
आऊ हमर जिभिया उनकर बड़ाई कलई
आऊ हमर देहियो आसरा में बनल रहतई।
27 काहेकि रउवा हमर परान के मुवलकन के
रहे के जगह में नई छोड़बहीं आऊ आपन
पबितर अदमिनियन के नई सड़े देबहीं ।
28 रउवा हमरा जिन्गी के रास्ता बतउले हिये;
रउवा हमरा आपन हाजिरी के चलते खुसी से
भर देबहीं ।
29 हे भइवन-बहिनियन, हम तोहिन से आपन पुरखा राजा दाऊद के बारे में हियाव के साथ कह सका हियई कि उ त मूलई आऊ गाड़ल भी गलई आऊ ओकर कबर अधरियो तक हमिन भीर देखात हई । 30 उ एगो परमेस्वर देने से बोलेवोला आदमीन हलई आऊ जानत हलई कि परमेस्वर ओकरा से किरिया खइले हलथीन कि उ ओकर आवेवोला खन्दान में से एगो आदमीन के ओकर राजगदी पर बइठउतथीन । 31 इहेसे उ दाऊद राजा मसीह के जी उठे के बारे में पहिलही से देख के कहलई, ‘उ त मुवलकन के रहे के जगह में नई छोड़ल गलई आऊ उनकर देहिया नई सड़लई । 32 उहे यीसु के परमेस्वर जियउलथीन, जिनकर हमिन सब गोवाह हियई । 33 इहे तरी उहे यीसु परमेस्वर के दहीना करे सब से ऊच पद पाके, आऊ जइसन उ वादा कइले हथीन, ओइसही पिता परमेस्वर से पबितर आत्मा पाके उझल देले हथीन । ओही तोहिन देखत आऊ सुनत हहूं । 34 काहेकि दाऊद राजा त सरग पर नई चढ़लई, बाकि उ खुद कहत हई:
‘परभु हमर परभु से कहलथीन,
35 हम तोहर दुसमनवन के तोहर
पूरे बस में करे तक, हमर दहिना करे बइठ ।
36 इहेसे इसराएल के सब घर-परिवार बिना सक के समझ लेवे कि परमेस्वर उहे यीसु के जिनकरा तोहिन कुरुस पर चढ़ावलहूं, उनकरा परभु आऊ मसीह भी ठहरउलथीन।
37 उहे घरी सुनेवोलन के मन पिहल गलई, आऊ पतरस से आऊ, दुसरको खास चेलवन से पूछे लगलथीन कि “हे भइवन, हमिन का करियई ?” 38 पतरस ओकिन से कहलई, “पाप छोड़ के परमेस्वर भीरा आके यीसु मसीह के नाम से बपतिस्मा लेबा, त तोहिन सब के आपन-आपन पाप के छेमा मिलतऊ आऊ तोहिन पबितर आत्मा के दान पइबा । 39 काहेकि इ वादा तोहिन, आऊ तोहिन के बाल-बाच्चा आऊ उ सबे दूर-दूर के लोगनो खातिर हई, जेकिन के परभु हमर परमेस्वर आपन भीर बुलउतथीन ।” 40 उ आऊ ढेरे बतियन से जोर देके सबूत के संगे समझउलई कि अपने आप के अरइट पीढी से बचइहां । 41 इहेसे जेकिन उनकर बतिया मान लेलथीन, ओकिन बपतिस्मा लेलथीन; आऊ उहे दिन लगभग तीन हजार अदमिनियन यीसु के चेलवन में मिल गलथीन । 42 आऊ ओकिन खास चेलवन से सिक्छा पावे आऊ संगत करे आऊ रोटी तोड़े, आऊ पराथना करे में लगले रहलथीन ।
बिसवासियन के संगत
43 खास चेलवन के चलते ढेरे अजगुत काम आऊ अजगुत चिन्हा परगट होते रहत हलई । इ देख के सब अदमिनियन परमेस्वर के भय के साथ इजत कलथीन । 44 आऊ सब बिसवासियन जमे रहत हलथीन, आऊ ओकिन के सब चीजवन साझा में हलई । 45 ओकिन आपन-आपन धन-दउलत बेच-बेच के जखनी जेकरा जरूरी होखत हलई, तखनी ओकिन में बांट देवत हलथीन । 46 ओकिन रोज दिन एक मन होके परमेस्वर के मंदिर में जमा होवत हलथीन, आऊ घर-घर रोटी तोड़त, आऊ खुसी आऊ बढ़िया मन से खाना खात हलथीन, 47 आऊ परमेस्वर के बढ़ाई करत हलथीन, आऊ सब लोगन ओकिन से खुस हलथीन, आऊ जेकिन मुक्ती पावत हलथीन, ओकिन के परभु रोज दिन ओकिन में मिला देवत हलथीन ।