कर लेवेवोला जक्कई के जिन्गी के बदलाव
19
1 यीसु यरीहो सहर में घुस के जात हलथीन । 2 उहां जक्कई नाम के ऐगो आदमीन हलई । उ कर लेवेवोलन के मुखिया हलई आऊ धनसेठ हलई । 3 आऊ उ यीसु के देखेला खोजत हलई, बाकि ढेरे भीड़ के चलते नई देखे पारा हलई, काहेकि उ नाटा हलई । 4 इहेसे उ यीसु के देखेला आगे कुद के एगो गूलर के रुख पर चढ़ गलई, काहेकि यीसु उहे डहर से जायवोला हलथीन ।5 जखनी यीसु उ जगह पर पहूँचलथीन, त ऊपरे देख के ओकरा से कहलथीन, “हे जेक्कई झट-मारी नीचे उतर आव; काहेकि आझु हमरा तोहर घर में रहेला जरुरी हऊa ।”
6 उ तुरतिये नीचे उतर के खुसी से यीसु के आपन घरे ले गलई । 7 बाकि सब अदमिनियन इ देख के पुस-पुसा के कहे लगलथीन, “उ त एगो पापी आदमीन के घरे पहुना बन के रहेला जात हथीन ।”
8 बाकि फिन जक्कई डीड़ी होके परभु से कहे लगलई, “हे परभु, हम आपन अधा सम्पती गरीबकन के देवत हियई, आऊ अगर हम कवनो से बले के लेले हियई त ओकरा चउगुना फिरा देवत हियई ।" 9 तखनी यीसु ओकरा से कहलथीन, "आझ इ घर में मुक्ती आइल हई, काहेकि इहो त अबराहम के ऐगो बेटा हई ।b 10 काहेकि 'आदमीन के बेटा' इ आदमीन तरी भुलइलकन के खोजे आऊ ओकिन के मुक्ती करे आइल हियऊ ।
दसगो नउकरवन के उदाहरन
(मत्ती 25:14-30)
11 अदमिनियन इ बतियन सुनत हलथीन, त यीसु ओकिन के एगो उदाहरन देके कहलथीन, इहेसे कि उ येरूसलेम के भीरी हलथीन आऊ ओकिन समझलथीन कि परमेस्वर के राज अभीये परगट होवेवोला हई । 12 फिन यीसु कहलथीन, "एगो धनसेठ आदमीन हलई । उ दूर देस चल गलई ताकि आपन खातिर राज-पाट पाके घुर के अतई । 13 उ जाय से पहिले आपन नउकरवन में से दसगो के बोला के ओकिन के दसगो सोना के सिक्का देलथीन, आऊ ओकिन से कहलथीन, 'हमरा आवत ला एकर से खरीद-बिकरी करिहें । 14 बाकि ओकर सहर के रहेवोलन ओकरा से दुसमनी रखा हलथीन आऊ ओकरा पीछे दूतवन से इ कह के पेठउलथीन, 'हमिन इ नइखी चाहत ही कि इ आदमीन हमिन परे राज करतई ।'
15 जखनी उ राज-पाट पाके घुरलई, त उ राजा आपन उ नउकरवन के आपन भीर बुलउलई, जेकिन के उ पइसा देले हलथीन । उ इ जानेला चाहलई कि ओकन खरीद-बिकरी से केतना कमलथीन । 16 तखनी पहिले नउकर आके कहलई, 'हे मालिक, हम राउर सोना के सिक्का से दसगो आऊ सोना के सिक्का कमइले हिये ।' 17 राजा ओकरा से कहलई, साबस ! बढ़िया नउकर ! तू तनिकुन में बिसवास-लायक रहलई, अब तू दसगो सहर पर अधिकार रख ।’ 18 फिन दूसर नउकर आके कहलई, 'हे मालिक, 'हम राउर सोना के सिक्का से पांचगो आऊ सोना के सिक्का कमइले हिये । 19 तखनी राजा ओकरो से कहलई, ‘साबस, तूहूं पांचगो सहर पर हाकिम बन ।' 20 फिन तीसरका सेवक आके कहलई, 'हे मालिक, देखा, तोहर सोना के सिक्का इहां हई जेकरा हम आपन गमझा में बाँध के रखले हली ।' 21 हम रउवा से डेरा हियई, काहेकि तू कठोर आदमीन हां । जे तू नई रखला ओकर उठा लेवा हां, आऊ जे नई बुनला ओकरा काट लेवा हां । 22 राजा ओकरा से कहलई, ‘हे दुस्ट नउकर, हम तोहरे मूंह से तोहरा दोसी ठहरावत हियऊ । अगर तू हमर बारे में अइसन जानत हले कि हम कठोर आदमीन हियऊ, आऊ जे हम नई रखा हियऊ ओकरा हम उठा लेवा हियऊ आऊ जे हम नई बुनली ओकरा काट लेवा हियऊ; 23 त तू हमर पइसा सुध पर काहे नई लगइले कि जखनी हम घुम के अइतियई तखनी ओकरा से सुध साथे ले लेतीयई ? 24 आऊ जे लोगन भीरी डीड़ी हलथीन, ओकिन से राजा कहलई, 'उ सोना के सिक्का ओकर भीर से ले लिहें आऊ जेकरा भीर दस गो सोना के सिक्का हई ओकरा दे दिहें । 25 बाकि ओकिन राजा से कहलथीन, 'हे मालिक, ओकरा भीर त दसगो सोना के सिक्का हइये हई । 26 'हम तोहिन से कहत हियऊ कि जेकरा भीर हई, ओकरा आऊ देवल जतई आऊ जेकरा भीर नखई, ओकरा से जे ओकरा भीर हई उहो ले लेवल जतई । 27 बाकि जे नई चाहत हई कि हम ओकिन पर राज करियई, उ हमर दुसमनवन के इहां लान के हमरा भीर मुवा दिहें ।
यीसु यरूसलेम जात हथीन
(मत्ती 21:1-11; मरकुस 11:1-11; यूहन्ना 12:12-19)
28 इ उदाहरन कहे के बाद यीसु यरूसलेम देने गलथीन । उ आपन चेलवन के अगाड़ी-अगाड़ी चलत गलथीन । 29 यीसु जइतून नाम के पहाड़ पर बइतफगे आऊ बइतनियाह गाँव भीर पहूँचलथीन, त यीसु आपन चेलवन में से दूगो के इ कह के पठउलथीन, 30 "भीरीवोला गांव में जा; उहां पहूंचबा, त ऐगो गदहा के बाचा बानहल तोहिन के मिलतऊ, जेकरा पर कवनो कहियो नई बइठल होतऊ, ओकरा खोल के ले आवा । 31 अगर कोनो तोहिन से पूछतई कि काहे एकरा खोलत हें, त इ कह दिहें कि परभु के एकर जरुरी हई ।
32 त उ चेलवन उहां गलथीन, आऊ जइसे यीसु ओकिन से कहले हथीन, ओइसने गदहा के बाचा के पउलई । 33 जखनी ओकिन गदहा के बाचा के खोलत हलथीन, त ओकर मालिक ओकिन से पूछलई, "इ बाचा के काहे खोलत हां ?" 34 ओकिन कहलथीन, "परभु के एकर जरुरी हई । 35 फिन ओकिन ओकरा यीसु भीर ले लनलथीन, आऊ आपन कपड़ा उ गदहा के बाचा पर डाल के यीसु के ओकर परे बइठा देलथीन । 36 जखनी यीसु ओकर परे बइठ के यरूसलेम देने जात हलथीन, तखनी लोगन आपन कपड़वा डहर में बिछावत जा हलथीन ।
37 यीसु उ जगह भीरा आवे घरी, जहाँ से जइतून पाहाड़ के ढलान सुरु होवा हई, उनकर चेलवन सब आपन अँखिया से देखल सब अजगुत काम के चलते खुस होके जोर से परमेस्वर के महिमा करे लगलथीन :
38 "धन्य हथीन उ राजा जे परभु के नाम से आवा हथीन !
आऊ सरग में सांती आऊ सब से ऊपर सरग में परमेस्वर के महीमा होखे ।"
39 उ घरी भीड़ में से कुछ फरीसी लोगन यीसु से कहे लगलथीन, "हे गुरु, आपन चेलवन के अइसन बतावे से डाँटहीं ।" 40 तखनी यीसु जबाब देलथीन, "हम तोहिन से कहत हियऊ, अगर एकिन चुप रहतथीन त पखल चिलियाय उठतऊ ।
यरूसलेम खातिर यीसु के बिलाप
41 जखनी यीसु यरूसलेम के भीरी अलथीन आऊ उ सहर के देखलथीन, त उ रोवे लगलथीन । 42 आऊ कहे लगलथीन, "केतना बढ़िया होतियई अगर तू, हाँ, तूही आझ इ जानते* कि तोहर सांती केकर से मिलतऊ ! बाकि उ अब तोहर आंखिया से लुकाइल हई । 43 अइसन दिना उ घरी तोहरा पर अतऊ जखनी तोहर दुसमन चारो देन से रुकावट डाल के तोहरा घेर लेतथून, आऊ चारो देन से तोहरा दबाव डालतथून । 44 परमेस्वर तोहर भीरा अलथीन, बाकि उ घरी के तू नई चिन्हले । इहेसे तोहरा आऊ तोहर बचवन के माटी में मिला देतथून, तोहर जगहिया परे एको पखल के ऊपुरे दूसर पखल के नई रखे देतथून । "
यीसु मंदिर में से खरीद-बिकरी करेवोलन के निकाला हथीन
(मत्ती 21:12-17; मरकुस 11:15-19; यूहन्ना 2:13-22)
45 फिन यीसु मंदिर में जाके जे लोगन उहां खरीद-बिकरी करत हलथीन, ओकिन के बहरे निकाले लगलथीन । 46 आऊ उ ओकिन से कहलथीन, "पबितर किताब में लिखल हई कि परमेस्वर कहा हथीन कि हमर घर पराथना के घर होतई, बाकि तोहिन ओकरा डाकुवन के आडा बना देले हें ।"