यहूदी नेतवन यीसु के अधिकार पर बिसवास नई करा हथीन
(मत्ती 21:23-27; मरकुस 11:27-33)
20
1 एक दिन यीसु परमेस्वर के मंदिर में लोगन के सिक्छा देवत आऊ बढ़िया खबर सुनावत हलथीन, त महा याजक आऊ नियम के गुरुयन यहूदी नेतवन संगे उनकरा भीर अलथीन । 2 आऊ यीसु से पूछलथीन, "हमिन के बताव, तू केकर अधिकार से इ सब काम करा हहीं ? आऊ तोहरा इ अधिकार कवन देले हई ?"3 यीशु ओकिन के जबाब देलथीन, "हमहूं तोहिन से एगो सवाल पूछत हियई, तोहिन हमरा बतावा । 4 यूहन्ना के बपतिस्मा देवेला अधिकार कवन देले हई ? परमेस्वर देले हथीन कि अदमिनियन ?"
5 तखनी ओकिन अपननही में चर्चा कर के कहलथीन, "अगर हमिन कहबई, 'परमेस्वर देले हथीन,' त उ कहतथीन, "फिन तोहिन ओकरा बिसवास काहे नई कइले ?" 6 अगर हमिन कहबई, 'अदमिनियन देले हथीन,' त सब लोगन हमिन के पखल मरतथुन, काहेकि ओकिन सचमुच में बिसवास करा हथीन कि यूहन्ना परमेस्वर देने से बोलेवोला आदमीन हलई ।" 7 इहेला ओकिन जबाब देलथीन, "हमिन नइखी जानत कि यूहन्ना के बपतिस्मा देवेला अधिकार कवन देले हई ।"
8 तखनी यीसु ओकिन से कहलथीन, "त हमहूं तोहिन के नई बतबई कि केकर अधिकार से हम इ सब काम करत हियई ।"
बुरा बटइदारवन के उदाहरन
(मत्ती 21:33-46; मरकुस 12:1-12)
9 फिन यीसु लोगन के इ उदाहरन देके कहे लगलथीन, "एगो गाँव में एगो आदमीन हलई, उ अंगूर के एगो खेती करलई, आऊ ओकरा बटइदारवन के ठिका पर दे देलई, आऊ ढेरे दिन खातिर परदेस चल गलई । 10 जे घरी अंगूर के फसल तोड़े के दिन अलई, त खेत के मालिक अंगूर के आपन हिस्सा लेवे खातिर बटइदार भीर एगो नउकर के पेठउलई, बाकि बटइदारवन उ नउकर के मार-पीट के छूछे हाथे घुमा देलथीन । 11 फिन उ एगो आऊ नउकर के पेठउलई, बाकि बटइदारवन ओकरो मार-पीट के आऊ बेजती कर के छुछे हाथे घुमा देलथीन । 12 फिन उ तीसरका नउकर के पेठउलई, आऊ बटइदारवन ओकरो घायल कर के बहरी निकाल देलथीन । 13 तखनी अंगूर के खेत के मालिक कहलई, 'हम का करियई ? हम आपन दुलरूवा बेटा के पेठाबई, हो सका हई बटइदारवन ओकरा इजत करतथीन ।' 14 बाकि जे घरी बटइदारवन ओकरा देखलथीन, त ओकिन अपनन में बतियाय लगलथीन, 'इ त खेत के हकदार हई; चला, हमिन एकरा मुवा दा ताकि एकर बपउती हमिन के हो जतई ।’ 15 इहेला बटइदारवन ओकरा अंगुर के खेत के बहरे ले जाके मुवा देलथीन । तखनी यीसु पूछलथीन, 'त उ खेत के मालिक ओकिन साथे का करतई ?’ 16 हम कहत हियऊ, "उ खेत के मालिक अतई आऊ उ सब बटइदारवन के मुवा देतई, आऊ अंगूर के खेत के दूसरका के दे देतई ।” जखनी लोगन इ सुनलथीन, त ओकिन कहे लगलथीन, "अइसन कहियो नई होखेला चाही ।” 17 बाकि यीसु ओकिन देने एकटकी देख के कहलथीन, "फिन परमेस्वर के किताब में लिखल इ वचन के मतलब का हई ? कि
'जवन पखला के रजमिस्तिरियन बेकामयाब समझलथीन,
उहे कोना के सिरा के पखल बन गलई ।'
18 जे कोनो उ पखला परे गिरतई उ चूर-चूर हो जतई, आऊ जेकरा परे इ पखला गिरतई उ पीस देतई ।
कइसर महाराजा के लगान देवे के सवाल
(मत्ती 22:15-22; मरकुस 12:13-17)
19 नियम के गुरुयन आऊ मुख्य याजकवन समझलथीन कि इ उदाहरन हमिन के बिरोध में कहल गलई । इहेला ओकिन यीसु के उहे घरी पकड़ेला चाहलथीन, बाकि ओकिन अदमिनियन से डेरलथीन । 20 फिन ओकिन यीसु के फेर में लागल हलथीन, आऊ ओकिन भेद लेवेवोलन के पेठउलथीन कि ओकिन इमंदार होवे के ढोंगी बन के यीसु भीर जाके उनकर कवनो बात के पकड़तथीन, ताकि उनकरा हाकिम के हात आऊ अधिकार में जिमा देतथीन । 21 उ भेदियन आके यीसु से पूछलथीन, “हे गुरूजी हमिन जानत हियई कि रउवा सच बात के कहत आऊ सिखावत हिये, आऊ केकरो पाटी-बंधी नई करा हिये, बाकि परमेस्वर के रास्ता सच्चाई से बतावत हिये । 22 हमिन के बताऊं, हमिन के कइसर राजा के लगान देवेला ठीक हई कि नई ?”
23 बाकि यीसु ओकिन के चलहांकी के समझ गलथीन आऊ ओकिन से कहलथीन, 24 "हमरा एगो सिक्का देखावा, एकर परे केकर छाप आऊ नाम हई ?” ओकिन कहलथीन, "कइसर महाराजा के ।"
25 यीसु ओकिन से कहलथीन, "जे कइसर महाराजा के हई, उ कइसर महाराजा के देही, आऊ जे परमेस्वर के हई उ परमेस्वर के देही ।” 26 ओकिन लोगन भीर यीसु के कवनो बात में पकड़े नइ परलथीन, आऊ उनकर जबाब सुन के ओकिन अचम्भा होके चुप रहलथीन ।
मूवलकन के जीयेला आऊ बियाह के बारे में
(मत्ती 22:23-33; मरकुस 12:18-27)
27 सदूकियन अइसन बिसवास करा हथीन कि मूवलकन कहियो नई जीतथीन । ओकिन में से कुछ लोगन यीसु भीर आके इ पूछलथीन, 28 “हे गुरूजी, परमेस्वर देने से बोलेवोला मूसा हमिन खातिर अइसन लिखले हई कि 'अगर कवनो के भाई आपन मेहरारू रहते भर में बिन बाल-बच्चा के मू जतई, त ओकर भाई उ मसोमात के साथे बियाह कर के आपन भाई खातिर बाल-बच्चा जन्मावेला चाही ।’ 29 मान लेहीं, सातगो भाई हलथीन, बड़का भाई बियाह कर के बिन बाल-बच्चा के मू गलई । 30 फिन दूसरका भाई उ मसोमात से बियाह करलई, आऊ उहो बिन बाल-बच्चा के मू गलई । 31 फिन तीसरका भाई उ मसोमात से बियाह करलई, आऊ इहे तरी सातो भइवन एक-एक कर के बियाह कर के बिन बाल-बच्चा के मू गलथीन । 32 आखिरी में उ मसोमतियो मू गलई । 33 अब बतावा, जखनी मूवलकन के जीयेला होतई, त उ अउरत केकर मेहरारू होतई ? काहेकि ओकर संगे सातो भइवन बियाह करले हलथीन ।"
34 यीसु ओकिन के जबाब देलथीन, “इ जुग के मरदवन त बियाह करा हथीन, आऊ अउरतियन के बियाह कर के बिदा करा हथीन, 35 बाकि आवेवाला जुग में आऊ जखनी मूवलकन के जीयेला होतई, त जे लोगन उ लायक होतथीन, ओकिन के बीच में बियाह नई होतई । 36 आऊ ओकिन कहियो नई मूतथीन, काहेकि ओकिन सरगदूतवन तरी होतथीन । ओकिन परमेस्वर के बच्चवन होतथीन, काहेकि ओकिन मूवलकन में से जीलथीन। 37 बाकि मूवलकन के जी उठे के बारे में मूसा भी झाड़ी के घटना के बतावे घरी इ परगट कइले हई; ओकरा में मूसा परभू के 'अबराहम के परमेस्वर, आऊ इसहाक के परमेस्वर, आऊ याकूब के परमेस्वर' कहा हई । 38 परमेस्वर त मूवलकन के नई, बाकि जीयतकन के परमेस्वर हथीन, काहेकि उनकरा भीर सब जीयत हथीन ।
39 तखनी कुछ नियम गुरुयन इ बात सुन के कहलथीन, “हे गुरूजी, तू बढ़िया से कहला ।" 40 एकर बाद ओकिन के यीसु से आऊ कुछ सवाल पुछे के हिमत नई होलई ।
मसीह केकर बेटा हथीन
(मत्ती 22:41-46; मरकुस 12:35-37)
41 फिन यीसु ओकिन से पूछलथीन, “अदमिनियन मसीह के दाऊद राजा के बेटा कहा हथीन । इ कइसे हो सका हई ? 42 दाऊद राजा खुदे भजन संहिता के किताब में कहा हई :
परभु हमर 'परभु' से कहलथीन,
43 हम तोहर दुसमनवन के तोहर गोड़वन रखे के चउकी जबला नइ बना दियऊ
तबला हमर दाहिना करे बइठ,
44 दाऊद राजा त मसीह के परभु कहा हई; इहेसे मसीह दाऊद राजा के खाली बेटा नई बाकि परभू भी हथीन ।
नियम के गुरूयन से सतरक रहिहां
45 सब लोगन यीसु के बतिया के सुनत हलथीन, त यीसु आपन चेलवन से कहलथीन, 46 "नियम के गुरुयन से सतरक रहिहां । ओकिन लम्हर-लम्हर चोंगा पेन्ह के एने-ओने घुमेला चाहा हथीन, आऊ ओकिन बाजार में इजत साथे परणाम चाहा हथीन, आऊ धरम साभा घर में मुख्य बइठलका में बइठेला, आऊ खाय घरी ओकिन आदर-मान के जगह में बइठेला पसन करा हथीन । 47 ओकिन मसोमतियन के घर लुट लेवा हथीन, आऊ दूसर के देखावेला ढेरे देरी तक पराथना करते रहा हथीन, ओकिन ढेरे डड़ पउतथीन ।”