टिक के पराथना करिहां
18
1 एक दिन यीसु आपन चेलवन से बेयास नई होके टिक के पराथना करे के जेरूरी के बारे में एगो कथा सुनउलथीन : 2 “एगो सहर में एगो कछहरी के फइसला करेवोला रहा हलई । उ परमेस्वर से नई डेरा हलई आऊ अदमिनियन के नई परवाह करा हलई । 3 उहे सहर में एगो मसोमात रहा हलई, आऊ उ फइसला करेवोला भीर हरदम आके कहत हलई, “हमर अन्याय के बिरोध में हमरा नयाय मिलेला चाही ।” । 4 ढेरे खंवा फइसला करेवाला उ मसोमात के बतिया नई मानलई, बाकि आखिर में मन में अइसन सोच के कहलई, “हम त परमेस्वर से नई डेरा हियऊ आऊ अदमिनियन के कुछ इजत नई करा हियऊ, 5 तबो में इ मसोमात हमरा परेसान करे के चलते हम ओकरा फइसला करबई, कहियो अइसन नई होखे कि बरबरे आन के आखिर में हमर नाकन दम कर देतई ।6 फिन परभु कहलथीन, “सुना, इ अधरमी फइसला करेवोला का कहत हई? 7 का परमेस्वर आपन चुनलकन के फइसला नई करतथीन, जे रातो-दिनो उनकरा से पराथना करत रहा हथीन ? का उ ओकिन के बारे में देर करतथीन ? 8 हम तोहिन से कहत हियऊ, उ तुरती ओकिन के फइसला करतई । बाकि जखनी हम, 'आदमीन के बेटा' अबई, त का धरती पर बिसवास पइबई ।
एगो फरीसी आदमीन आऊ कर लेवेवोला के उदाहरन
9 जेकिन आपन ऊपर भरोसा रखा हलथीन आऊ सोचलथीन कि ओकिन परमेस्वर के नजर में बढ़िया हथीन, आऊ दूसरकन के नीच माना हलथीन, अइसन लोगन से यीसु इ उदाहरन देके कहलथीन : 10 “एक दिन दूगो अदमिनियन मंदिर में पराथना करे खातिर गलथीन । एगो फरीसी आदमीन हलई आऊ दूसरका कर लेवेवोला हलई । 11 उ फरीसी आदमीन अलगे डीड़ी होके आपन मन में परमेस्वर से अइसन पराथना करे लगलई, ‘हे परमेस्वर, हम राउवा के धन्यबाद करा हिये कि हम दूसर अदमिनियन के जइसन लालची, बेइमानी आऊ बेबिचार करेवोला नइखी आऊ खास कर के इ कर लेवेवोला के जइसन भी नई हिये । 12 हम हपता में दू बार उपास रखा हिये; हम रउवा के आपन सब कमाई के दसमांसवो देवा हिये ।’
13 बाकि उ कर लेवेवोला फरीसी आदमीन से अलगे डीड़ी होके सरग देने अखिया उठावेला भी नई चाहलई, बाकि उ आपन सीना पीट–पीट के कहलई, ‘हे परमेस्वर, हम पापी हिये; हमरा पर दया करूं !’ 14 फिन यीसु कहलथीन, "हम तोहिन से कहत हियऊ कि उ फरीसी आदमीन नखई बाकि इ कर लेवेवोला आदमीन परमेस्वर के नजर में बेकसूर ठहरउलई । फिन उ आपन घरे गलई; काहेकि जे कोनो अपने आप के बढ़न समझतई उ छोटहन करल जतई; आऊ जे अपने आप के छोटहन समझतई उ बढ़न करल जतई ।”
यीसु रेंगवन के आसीरबाद देवा हथीन
(मत्ती 19:13-15; मरकुस 10:13-16)
15 एक दिन माइयन-बपवन आपन रेंगवन के यीसु भीर लाने लगलथीन ताकि उ ओकिन परे हाथ रख के आसिरबाद देतथीन; बाकि चेलवन इ देख के माइयन-बपवन के डांटलथीन । 16 बाकि यीसु रेंगवन के आपन भीर बोला के कहलथीन, “रेंगवन के हमर भीर आवे दे, आऊ ओकिन के नई रोक : काहेकि परमेस्वर के राज इ रेंगवने जइसन के हई । 17 हम तोहिन से एकदम कहत हियऊ कि जे कोनो परमेस्वर के राज के रेंगवन तरीa गरहन नई करतई उ परमेस्वर के राज में कहियो घुसे नई परतई ।"
धनसेट आदमीन के सरग जायला मुसकिल हई
(मत्ती 19:16-30; मरकुस 10:17-31)
18 एक खंवा कोनो धरम के नेता यीसु से पूछलई, ‘हे बढ़िया गुरु, परमेस्वर के संगे अमर जिन्गी पावेला हमरा का करेला चाही ? 19 यीसु ओकरा से कहलथीन, “तू हमरा काहे बढ़िया कहत हें ? कवनो बढ़िया नखई; खाली परमेस्वर बढ़िया हथीन । 20 तू परमेस्वर के इ सब हुकुम के मानेला जाना हें : ‘बेबिचार नई करीहे, हतिया नई करीहे, आऊ चोरी नई करीहे, झूठ गोवाही नई दिहे, आपन बाप आऊ आपन माई के इजत करीहे' ।” 21 उ आदमीन कहलई, “हम त इ सब लइकापन से ही मानत आइल हियई ।” 22 इ सुन के यीसु ओकरा से कहलथीन, “तोहरा में अभियो एगो बात के कमी हऊ, आपन सब कुछ बेच के गरीबकन के बांट दिहे; आऊ आके हमर पीछे हो जो, त तोहरा सरग में धन मिलतऊ ।” 23 बाकि जखनी उ आदमीन इ सब बतिया सुनलई त उ ढेरे उदास हो गलई, काहेकि उ बड़ी धनसेठ हलई ।
24 यीसु ओकरा देख के कहलथीन, “धनसेठ अदमिनियन के परमेस्वर के राज में घुसेला केतना मुसकिल हई ! 25 परमेस्वर के राज में धनसेट के घुसेले ऊँट सूई के छेद में पार होवे से मुसकिल हई ।” 26 तखनी सब सुनेवोलन पूछलथीन, "त फिन केकरा मुक्ती मिलतई ?” 27 यीसु कहलथीन, “जे आदमीन से नई हो सका हई, उ परमेस्वर से हो सका हई ।” 28 पतरस कहलई, “सुनूं, हमिन त सब कुछ छोड़ के राउर पीछे हो लेले हिये ।” 29 यीसु ओकिन से कहलथीन, “हम तोहिन से एकदम कहत हियऊ कि अगर कवनो परमेस्वर के राज खातिर घर आऊ आपन मेहरारु, चाहे भाई, चाहे माई-बाप, चाहे बाल-बचा के छोड़ देले हई; 30 त उ आदमीन इ जबाना में ढेर आसिस जरूर पउतई आऊ आवेवोला जिन्गी में अमर जिन्गी भी पउतई ।"
यीसु आपन मउवत के बारे में अगमबानी कहत हथीन
(मत्ती 20:17-19; मरकुस 10:32-34)
31 फिन यीसु बारहो खास चेलवन के साथे ले जाके ओकिन से कहलथीन, “देखा, हमिन यरूसलेम में जात हियई, आऊ 'आदमीन के बेटा' के बारे में जवन बतीया परमेस्वर देने से बोलेवोलन से लिखल गइल हई, उ सब बतिया पूरा होतई । 32 काहेकि उ गेइर-यहूदी के हाथ में सोंपल जतई, आऊ ओकिन ओकरा मजाक उड़उतथीन; आऊ ओकरा बेजती करतथीन आऊ ओकरा पर थूकतथीन । 33 आऊ ओकरा कोड़ा मारतथीन, आऊ मुवा देतथीन; बाकि उ तीसरका दिन जी उठतई । 34 बाकि बारहो खास चेलवन इ सब बतिया में से कवनो बात के नई समझलथीन; आऊ ओकिन से इ बतिया लुकाइल रहलई, आऊ जे यीसु कहले हलथीन, उ ओकिन के समझ में नई अलई ।
यीसु एगो आन्हर भीख मांगेवोला के ठीक करा हथीन
(मत्ती 20:29-34; मरकुस 10: 46-52)
35 जखनी यीसु यरीहो सहर भीर पहूंचलथीन, त एगो आन्हर डहर के बगल में बइठ के भीख मांगत हलई । 36 जखनी उ सुनलई कि भीड़ जात हलथीन, त उ पूछे लगलई, “इहां का होवत हई ?" 37 ओकिन ओकरा से कहलथीन, “नासरत गांव के यीसु जात हथीन ।” 38 तखनी उ चिलिया के कहलई, “हे यीसु, दाऊद के संतानb, हमरा पर दया करूं !” 39 जे लोगन अगाड़ी-अगाड़ी जात हलथीन, ओकिन ओकरा डाँटे लगलथीन कि चुप रह; बाकि उ आऊ चिलियलई, “हे दाऊद के संतान, हमरा पर दया करूं !” 40 तखनी यीसु डीड़ी होके हुकुम देलथीन कि ओकरा हमरा भीर लेले आव, आऊ जखनी उ भीरी अलई त यीसु ओकरा से पूछलथीन, 41 “तू का चाहत हें कि हम तोहर खातिर का करीयऊ ?” तखनी उ कहलई, “हे परभु, हम फिन से देखेला चाहत हियई ।” 42 यीसु ओकरा से कहलथीन, “अब तू देखे लगबे; तोहर बिसवास तोहरा ठीक कइले हऊ । 43 तुरतिये उ देखे लगलई आऊ परमेस्वर के बड़ाई करत-करत उ यीसु के पीछे जाय लगलई; आऊ सब अदमिनियन इ देख के परमेस्वर के बड़ाई करे लगलथीन ।