Pu'agɔɔndir tita'ar la yɛla
17
1 Ka maliaknam ayɔpɔi banɛ mɔrin laas ayɔpɔi la yinne kɛɛn m san'an na yɛlim ye,
“Kem na,
ka m pa'alif ban ye ba namis pu'agɔɔndir tita'ar onɛ an teŋ tita'ar ka kpi'e kɔlis bɛdegʋ la si'em.
2 Dunia na'anam la tʋm dian'ad tʋʋma nɛ pu'agɔɔndir la,
ka nimbanɛ bɛ dunia ni la mɛ niŋ ala.”
3 Ka Wina'am Siig Kasi la daa mɔri m ka maliak la zii mɛ keŋ mɔɔgin.
Ka m nyɛ pu'a ka o ban'ad bʋnyua zin'a,
ka yʋda linɛ tʋ'ʋd Wina'am sɔbi gilig bʋnyua la niŋgbiŋ wʋsa.
Ka bʋnyua la mɔr zuta ayɔpɔi nɛ iila piiga.
4 Ka pu'a la yɛ fuzɛn'ug nɛ sanlima la'ad nɛ kugvɛnla bɛdegʋ,
ka mɔr sanlima bʋtiŋ linɛ pɛ'ɛl nɛ dian'ad linɛ yi o tʋʋmbɛ'ɛdin la na.
5 Yʋ'ʋkaŋa da sɔb o gbɛ'ogʋn:
LI ANƐ YƐLSU'ADIR
BABILON ONƐ AN TEŊ TITA'AR LA
PU'AGƆƆNDA WƲSA MA
NƐ DUNIA WƲSA TƲƲMBƐ'ƐD MA.
6 Ka m nyɛ ka pu'a la nu Wina'am nidib nɛ nimbanɛ daa niŋ Yesu yadda ka ba kʋʋ ba la ziim kʋʋl.
Man nyɛɛ o la,
ka li lidigim hali.
7 Ka maliak la bu'osim ye,
“Bɔ ka fʋ lidigɛ?
M na pa'alif pu'a la nɛ bʋnyua onɛ ka o ban'ad ka o mɔr zuta ayɔpɔi nɛ iila piiga la yɛlsu'adir la gbin.
8 Bʋnyua onɛ ka fʋ nyɛ la da vʋe saŋsi'en ka pʋ lɛn vʋeya,
ka na naam bʋmbɔk zulʋŋ la nii dʋ na.
O ya'a dʋ na o na keŋ zin'ikanɛ ka ba na san'am o la ni.
Ka nimbanɛ bɛ dunia ni ka ba yʋda pʋ sɔb nyɔvʋpaal dim gbauŋʋn ka dunia nyaan pin'il la,
na gɔs bʋnyua la ka li lidigi ba.
Bɔzugɔ bʋnyua la da vʋe ka pʋ lɛn vʋeya,
amaa o na lɛn vʋ'ʋg ya'as.
9 “Nɛ'ɛŋa pa'annɛ ya'am nɛ onɛ gban'ad si'el gbin.
Zuta ayɔpɔi la anɛ zuoya ayɔpɔi banɛ ka pu'a la zin' ba zut la.
10 Ba mɛ anɛ na'anama ayɔpɔi.
Ka anu kpi,
ka onɛ paasi ayuobʋ la an na'ab nannanna ka yinne nam pʋ di na'am.
O ya'a ti di na'am o na bɛ dabisa bi'ela.
11 Ka bʋnyua onɛ da vʋe ka pʋ lɛn vʋe la,
paas anii na'anama ayɔpɔi la ni,
ka na keŋ zin'ikanɛ ka ba na san'am o la.
12 “Ka iila piiga banɛ ka fʋ nyɛ la anɛ na'anam piiga,
amaa ba nam pʋ di'e na'am laa.
Ban nɛ bʋnyua la na ti la'asi di'e na'am la saŋa bi'ela.
13 Ka ba piiga la na mɔr gban'ar yinne ka na tis bʋnyua la ba paŋ nɛ ba kpi'euŋ.
14 Ba na zab nɛ Pɛbil la,
ka Pɛbil la nɛ o nya'andɔlib banɛ ka o da buoli ba o san'an ka gaŋi ba ka ba an sida dim la,
na zabi nyaŋ bʋnyua la nɛ na'anam la,
bɔzugɔ Pɛbil la an zugsɔbnam Zugsɔb nɛ na'anam Na'ab.”
15 Ka maliak la yɛlim ye,
“Kɔlis banɛ ka fʋ nyɛ ka pu'a la bɛɛ ani la,
anɛ nidib nɛ tigir nɛ buudi kɔn'ɔb-kɔn'ɔb nɛ pian'ad buudi kɔn'ɔb-kɔn'ɔb.
16 Ka iila piiga banɛ ka fʋ nyɛ la nɛ bʋnyua la na kisig pu'agɔɔndir la,
ka zaŋ on mɔr si'el wʋsa ka bas o biel,
ka ɔnb o niŋgbiŋ ka kɛ ka bugum dii o.
17 Wina'am nɔki niŋi ba sʋnya ni,
ka kɛ ka ba niŋ o bɔɔdim ka siaki tis bʋnyua la ba na'am paŋi ti paae saŋkanɛ ka Wina'am pian'ad la na niŋ amɛŋa.
18 Pu'a kanɛ ka fʋ nyɛ la anɛ teŋ tita'ar kanɛ sʋ'oe dunia na'anam wʋsa.”