Labanɛ ka Wina'am sʋnpɛɛn pɛ'ɛl la yɛla
16
1 Ka m wʋm kʋkɔtita'ar ka li pian'adi yit Pʋ'ʋsim Yin la na yɛt maliaknama ayɔpɔi la ye,
“Kem kpa'ae Wina'am sʋnpɛɛn linɛ pɛ'ɛl laas ayɔpɔi la dunia zug.”
2 Ka yiiga maliak la keŋ kpa'ae o laa la dunia zug.
Ka fɛn'ɛpɔn'ɔsa banɛ zabid hali kiib banɛ mɔr bʋnyua la zanbin nɛ banɛ na'asid o win la niŋgbina.
3 Ka maliak onɛ paas ayi' la kpa'ae o laa la niŋ atɛukʋn.
Ka atɛuk la ku'om tiak nwɛnɛ onɛ kpi ziim nɛ,
ka bʋnvʋya banɛ bɛ atɛukʋn la wʋsa kpi.
4 Ka maliak onɛ paas atan' la kpa'ae o dinɛ niŋ kɔlis nɛ ku'om bun zin' sieba la ni,
ka ku'om la kilim ziim.
5 Ka m wʋm maliak onɛ kpa'ae o din ku'omin la ka o yɛl Wina'am ye,
“Fʋnɛ an Kasi,
ka da bɛ,
ka kpɛm bɛ ka na ti bɛ.
Fʋ dɔl sida suori fʋ sariakadib la pʋʋgin.
6 Ba kʋʋ fʋ nidib nɛ fʋ nɔdi'esidib
dinzug ka fʋ tis banɛ kʋʋ ba la ziim ye ba nu.
Ban nar ye ba di'e si'eli la.”
7 Ka m wʋm kʋkɔr ka li yi maan maalʋg zin'igin la na yɛl ye,
“Zugsɔb Wina'am onɛ an Paŋtita'ar sɔba,
fʋ sariakadib la anɛ sida ka dɔl suor.”
8 Ka maliak onɛ paas anaasi la kpa'ae o laa la winnig la zug.
Ka ba tis winnig la paŋ ye o dit nidib la wʋʋ bugum nɛ.
9 Ka tʋʋl tita'ar tʋlig nidib la,
ka ba pɔɔd nɔɔri tisid Wina'am onɛ sʋ'oe yɛltɔɔd bama la yʋ'ʋr.
Amaa ba pʋ tiaki ba sʋnya ka na'as Wina'am.
10 Ka maliak onɛ paas anu la kpa'ae o laa la niŋ bʋnyua la na'am gbauŋ la zug.
Ka bʋnyua la sʋ'ʋlim wʋsa lieb lik.
Ka nidib dummi ba zilima ba niŋgbina saantɔɔg la zug,
11 ka tʋ'ʋd Wina'am onɛ bɛ arezana ni la ba niŋgbina zabir nɛ ba fɛn'ɛd la zug.
Amaa ba pʋ tiaki ba sʋnya ka basi ba tʋʋmbɛ'ɛd laa.
12 Ka maliak onɛ paasa ayuobʋ la kpa'ae o laa la niŋ Efiritis mu'atita'arin la,
ka mu'ar la ku'om kpiɛn ka maal suori tis na'anam banɛ yi ya-nya'aŋ la.
13 Ka m nyɛ kikiris atan' ka ba nwɛnɛ lɔmisnɛ yit wa'abɛ'og tita'ar la nɔɔrin nɛ bʋnyua la nɔɔrin nɛ ziri nɔdi'es la nɔɔrin na.
14 Ba anɛ Sʋntaana kikiris banɛ maan bʋnnyalima ka yii keŋ dunia na'anam wʋsa nii la'asi ba ye ba nwɛ' tanp,
Wina'am onɛ an Paŋtita'ar Sɔb la dabistita'ar la daar.
15 Wina'am yɛl ye,
“Kɛlisimi,
m na kena nwɛnɛ na'ayiigi ken si'em la.
Albareka bɛ nɛ onɛ nɛi ka pʋ gbisɛ,
ka kɛ ka o fuud bɛɛ o san'an ka kʋ keŋ biel ka nidib nyɛɛ o nyannɛ.”
16 Ka kikiris la la'as na'anam la keŋ zin'ikanɛ ka Hibiru dim buon ye Amageddon la.
17 Ka maliak onɛ paasa ayɔpɔi la kpa'ae o laa la pɛbisimin.
Ka kʋkɔtita'ar yi na'am gbauŋ dinɛ bɛ Pʋ'ʋsim Yin la na yɛl ye,
“Li naae ya.”
18 Ka sa-ian'asʋg nɛ vuud nɛ satansʋg bɛ ka teŋ dam bɛdegʋ.
Teŋ nan zi' damm ala hali lin yi ninsaal pin'ilʋg saŋa sa.
Teŋ la da damnɛ bɛ'ɛd bɛ'ɛdi.
19 Ka teŋ dammʋg la pʋdig teŋ tita'ar la zin'isa atan'.
Ka dunia tɛɛns la wʋsa san'am.
Ka Wina'am tiɛn Babilon teŋ tita'ar la yɛla,
ka kɛ ka Babilon nu o sʋnpɛɛn tita'ar bʋtiŋ daam la.
20 Tɛɛns banɛ ka ku'om giligi ba la da mɛlimnɛ,
ka zuoya wʋsa bɔdig.
21 Sakugtitada banɛ ka ba yinne wʋsa tɛbisim zem wʋʋ ku'oyʋʋr,
yit agɔlli lut nidib zutin.
Ka ba tʋ'ʋd Wina'am sakuga namisidi ba la zug.
Li da anɛ namistita'ar.