Pʋpielim dim Wina'am tuon
5
1 Dinzugɔ,
Wina'am kɛ ka ti an pʋpielim dim o tuon ka li yinɛ ti yadda niŋirin la,
ti mɔr sumbʋgʋsʋm Wina'am san'an,
ka li anɛ ti Zugsɔb Yesu Kristo ma'asim la zug.
2 Kristo kɛ ka ti nyɛ Wina'am pʋpielim piini ka mɔri li kiŋ-kiŋ,
ka mɛ mɔr ti'ir ye ti na la'am di'e na'asi nɛ Wina'am.
Ka li tisi ti sumalisim.
3 Ka ti mɛ mɔr sumalisim ti namisʋg la yɛla,
bɔzugɔ ti mi' ye namisʋg kɛt ka ti nyaŋi mɔdigid.
4 Ka ti ya'a mɔdig,
li mɛ pa'al ye ti nyɛ kpansʋg ka an sʋm.
Ka linɛ kɛ ka ti mɔr ti'ir ye ti na ti bɛ nɛ Wina'am.
5 Ka Wina'am pɛsig o nɔŋirɛ ti sʋnya ni,
ka li yinɛ o Siig Kasi onɛ ka Wina'am tisi ti la ni na.
Ka linzug ka ti'ir kaŋa ka' ziri ti'irɛ.
6 Tinamɛ da nan an tʋʋmbɛ'ɛd dim ka ka' paŋ kanɛ na sʋŋi ti mɛŋ la,
ka Kristo kpii tisi ti.
7 Li tɔi ka sɔ' di'e pʋpielim sɔb kum kpi.
Amaa daasi'erɛɛ sɔ' na siaki kpi ninsʋŋ yɛla.
8 Ka tinamɛ da nan an tʋʋmbɛ'ɛd dim la ka Kristo kpii tisi ti,
ka ala ka Wina'am pa'ali ti on nɔŋi ti si'em.
9 Ka o ziim la kɛ ka Wina'am kɛ ka ti an pʋpielim dim o tuon,
linzug bi'esʋg lɛn kae ye Kristo na faaɛn ti ka ti kʋ nyɛ Wina'am sʋnpɛɛnnɛ.
10 Ti da anɛ dataas nɛ Wina'am,
ka o Biig la kum kɛ ka o naal nɛ ti.
Ka tinamɛ naal nɛ Wina'am la,
bi'esʋg lɛn kae ye Kristo nyɔvʋr na faaɛn tii.
11 Ka linɛ lɛm paas anɛ ye ti maan sumalisim nɛ Wina'am niŋ si'el la ka li anɛ ti Zugsɔb Yesu Kristo onɛ naali ti nɛ Wina'am la zug.
Adam nɛ Yesu Kristo la yɛla
12 Dau yinne da tʋm tʋʋmbɛ'ɛd,
ka kɛ ka tʋʋmbɛ'ɛd kɛn dunia ni na.
Ka o tʋʋmbɛ'ɛd la zug ka kum kena.
Ka linzug ka kum taas ninsaalib wʋsa,
ban tʋm tʋʋmbɛ'ɛd la zug.
13 Saŋkanɛ ka Wina'am da nam pʋ tis Moses o wada la,
tʋʋmbɛ'ɛd da bɛ.
Amaa wada ya'a kae,
Wina'am pʋ gɛligid tʋʋmbɛ'ɛdɛ.
14 Ka Adam saŋa ti paae Moses saŋa,
kum pʋn paae nidib wʋsa,
hali nɛ banɛ tʋm tʋʋmbɛ'ɛd ka li pʋ an wʋʋ Adam da zan'as Wina'am nɔɔr yɛlʋg si'em la.
Adam nɛ Yesu Kristo onɛ kɛɛn o nya'aŋ na la nwɛnɛ taaba,
15 ka lɛɛ ka' bʋn yinnee.
Amaa Wina'am piini kanɛ ka o tisi ti la nɛ Adam tʋʋmbɛ'ɛd la pʋ nwɛn taaba.
Nidib bɛdegʋ ya'a kpi dau yinne tʋʋmbɛ'ɛd zug,
alaa linɛ gaad ala anɛ Wina'am yɛlsʋm piini linɛ yit dau yinne onɛ an Yesu Kristo la pʋpielim ni ka zu'oe tis nidib bɛdegʋ la.
16 Linɛ dɔl Wina'am piini pʋ nwɛnɛ linɛ dɔl dau yinne la tʋʋmbɛ'ɛdɛ.
Sariakadib linɛ dɔl tʋʋmbɛ'ɛd yinne la anɛ kʋʋsbɛ'ɛd.
Ka Wina'am piini linɛ dɔl tʋʋmbɛ'ɛd bɛdegʋ anɛ ye Wina'am kɛ ka ti an pʋpielim dim o tuon.
17 Dau yinne tʋʋmbɛ'ɛd la zug ka kum paae nidib wʋsa,
ka li yi dau kaŋa san'an na.
Ka linɛ dɔl Yesu Kristo tʋʋma la gaad ala.
Nidib banɛ wʋsa di'ed Wina'am pʋpielim linɛ zu'oe nɛ o piini linɛ an pʋpielim la na nyɛ na'am nɛ nyɔvʋr.
Ka li yinɛ dau yinne onɛ an Yesu Kristo la san'an na.
18 Aa tɔ.
Tʋʋmbɛ'ɛd yinne la kɛ ka nidib wʋsa nyɛ sariakadib bɛ'ɛd Wina'am san'an.
Ala mɛn Yesu Kristo pʋpielim tʋʋm yinne kɛ ka Wina'am kɛ ka nidib wʋsa an pʋpielim dim o tuon,
ka tisi ba nyɔvʋr.
19 Nid yinne la zan'as Wina'am nɔɔr la kɛ ka nidib bɛdegʋ an tʋʋmbɛ'ɛd dim Wina'am tuon.
Ala mɛn ka nid yinne la siak Wina'am nɔɔr la kɛ ka Wina'am kɛ ka nidib bɛdegʋ an pʋpielim dim o tuon.
20 Wada la da kena ye li kɛ ka tʋʋmbɛ'ɛd nɔbig.
Ka tʋʋmbɛ'ɛdi nɔbig la,
Wina'am pʋpielim piini mɛ nɔbig bɛdegʋ gaad ala.
21 Tʋʋmbɛ'ɛd nyaŋid nidib wʋsa ka ba kpiid.
Ala mɛn Wina'am kɛ ka ti an pʋpielim dim o tuon la zug ka o pʋpielim sʋ'oe ti ka tisi ti nyɔvʋr linɛ ka' naarɛ,
ka li yinɛ ti Zugsɔb Yesu Kristo ni.