Yesu nɛ Zakeyɔs yɛla
19
1 Yesu da dɔl Jeriko sʋʋginɛ gat,
2 ka dau sɔ' bɛɛ anina,
ka o yʋ'ʋr buon Zakeyɔs.
O da anɛ lampɔdi'es kpɛɛm,
ka mɔr ligidi bɛdegʋ.
3 O da bɔɔd ye o baŋ Yesu an sɔ',
amaa ka kʋ nyaŋɛ,
bɔzugɔ nidib la da galis nɛ,
ka o mɛ an niŋgiŋ.
4 Dinzug ka o zɔɔ gaad tuonnɛ keŋ dʋ tiig ye o nyɛ Yesu,
bɔzugɔ o mi' ye o na dɔl suokan.
5 Ka Yesu ti paae zin'ikan la,
ka gɔs agɔla,
ka nyɛɛ o ka ye,
“Zakeyɔs,
sigim tɔ'ɔtɔ na,
bɔzugɔ m ye gbɛnnɛ fʋ yin zina.”
6 Ka o sig tɔ'ɔtɔ na,
ka di'e o nɛ sumalisim.
7 Ka ban nyɛɛ li la,
ba pin'ili nya'amidi nyɔnnɛ tisid taaba ye,
“O keŋ ye o sig tʋʋmbɛ'ɛd la sɔb yin.”
8 Ka Zakeyɔs duoe zi'en,
ka yɛl ye,
“M Zugsɔba,
m na zaŋi m arezak pʋsʋkʋ tis nɔŋ dim.
Ka m ya'a zamnɛ sɔ' si'el,
m na lɛbisi tis o nɔɔra anaasi.”
9 Ka Yesu yɛl o ye,
“Faangir la kpɛn' yikaŋa zina na,
bɔzugɔ Zakeyɔs mɛ anɛ Abraham yaaŋ.
10 Ninsaal Biig la kena ye o ie banɛ bɔdig la faaɛn ba.”
Sanlima ligidi la siiliŋ
11 Ka ban daa nan kpɛn kɛlisid la,
ka Yesu siilimi ba siiliŋ.
O da pʋ lal nɛ Jerusalem ka nidib la tɛn'ɛsid ye Wina'am sʋ'ʋlim na nie saŋkan la.
12 Dinzug ka o yɛl ye,
“Na'abiigi daa bɛ,
ka keŋ teŋ lalli ye o di na'am lɛb na.
13 Ka o buol o tʋmtʋmnib piiga tisi ba sanlima la'af yinne-yinne,
ka yɛli ba ye,
‘Nɔkimi ligidi la tɔlim,
ka m keŋ ka lɛb na.’
14 “Amaa o sʋ'ʋlim nidib la da kis o nɛ,
ka on gaad la ka ba tʋm tʋmtʋmnib ye ba yɛl ye,
‘Ti pʋ bɔɔd ye dau kaŋa aan ti na'aba.’
15 “Ka on di na'am la,
ka lɛbi kul na ka kɛ ka ba buol tʋmtʋmnib banɛ ka o daa tis ligidi la ka ba kena,
ka o bu'osi ba ye o baŋ nid wʋsa tɔlim nyɛ nyɔɔd si'em.
16 “Ka onɛ daa dɛŋ tuonnɛ kɛɛn o san'an na la yɛl o ye,
‘M zugdaana,
fʋ ligidi la nyɔɔd du'alnɛ nɔɔr piiga.’
17 “Ka o zugdaan la yɛl o ye,
‘M tʋmtʋm sʋŋɔ,
fʋ mɔya!
Fʋn tʋm pʋʋg yinne nɛ bʋn linɛ an bi'ela la zug,
fʋ na sʋ'oe tɛɛns piiga.’
18 “Ka onɛ paas ayi' la mɛ kena yɛl ye,
‘M zugdaana,
fʋ ligidi la nyɔɔd du'alnɛ abʋnu.’
19 “Ka o yɛl o mɛn ye,
‘Fʋn na sʋ'oe tɛɛns anu.’
20 “Ka onɛ paas la mɛ kena yɛl ye,
‘M zugdaana,
fʋ la'af la nwa.
M daa zaŋi li nɛ vilig nɛ pienni su'a,
21 bɔzugɔ m zɔtif nɛ.
Fʋ anɛ zukpi'euŋ sɔb onɛ nɔkid bʋn linɛ ka fʋ pʋ digilɛ,
ka bun linɛ ka fʋ pʋ bʋdɛ.’
22 “Ka o yɛl o ye,
‘Tʋmtʋm bɛ'og nwa,
fʋ nɔɔr pian'ad la gban'af.
Fʋn baŋ ye m anɛ zukpi'euŋ sɔb ka nɔkid bʋn linɛ ka m pʋ digilɛ,
ka bʋn linɛ ka m pʋ bʋd la,
23 bɔzug ka fʋ pʋ zaŋi m ligidi la niŋ banki ni?
Man lɛb na la,
m naan kʋ di'enɛ m ligidi nɛ nyɔɔdɛɛ?’
24 “Ka o yɛl banɛ zi'e anina la ye,
‘Di'emin o la'af yinne la tis onɛ mɔr ligidi piiga la.’
25 “Ka ba yɛl o ye,
‘Naa,
o pʋn mɔr ligidi piiga sa!’
26 “Ka o lɛbisi ba ye,
‘On mɛkama mɔr la,
ba na lɛn tis o.
Ka onɛ pʋ mɔr la,
hali on mɔr si'el la ba na di'e li.
27 Amaa m bi'emnam banɛ pʋ bɔɔd ye m an na'abi sʋ'oe ba la,
mɔri nɛ ba na kʋʋ ba m tuon.’ ”
Yesu daa kpɛn' Jerusalem teŋin la yɛla
28 Yesu daa pa'al nidib la naae la,
o daa nɔk suori ken Jerusalem.
29 Ka on daa paad Betfage nɛ Betani tembanɛ kpi'e Olif tiis zuorin la,
o daa tʋm o nya'andɔlib ayi'
30 ye,
“Kemi teŋ kanɛ bɛ tuon la.
Ya ya'a paae,
ya na nyɛ bʋŋsia'asiŋ kanɛ ka ba lɔɔ zi'el ka sɔ' nan zi' ban'a o.
Yidigimi nɛ o mɔr na.
31 Ka sɔ' ya'a bu'osi ya ye wala ka ya yidigid o,
yanam lɛbisim ye,
Zugsɔb la bɔɔd o.”
32 Ka banɛ ka o tʋm la paae nyɛ ka li an wʋʋ on yɛli ba si'em la.
33 Ka ban yidigid bʋŋsia'asiŋ la,
banɛ sʋ'oe o la bu'osi ba ye,
“Bɔ ka ya yidigid bʋŋ la?”
34 Ka ba lɛbisi ba ye,
“Zugsɔb la bɔɔd o.”
35 Ka ba mɔr o kɛn Yesu san'an na,
ka zaŋi ba fuudi pa'al bʋŋ la zug ka gban'e o ka Yesu ban'.
36 Ka on ken la,
ba yadigi ba fuud suor la zug.
37 Ka on daa paad suokanɛ naan Olif zuorin sigid na la,
o nya'andɔlib la wʋsa daa pin'ili maan sumalisim dʋ'ʋsi ba kʋkɔya pian'ad Wina'am yʋ'ʋr nɛ o tʋʋm titada banɛ ka ba nyɛ la zug.
38 Ba daa yɛt ye,
“Albareka bɛ nɛ na'akanɛ kenna nɛ Zugsɔb la yʋ'ʋr zug.
Sumalisim bɛ arezana ni,
ka Wina'am yʋ'ʋr sʋŋ la nyɛ dʋ'ʋsʋg.”
39 Ka Farisee dim sieba bɛ nidib sʋʋgin anina,
ka yɛl o ye,
“Pa'anna,
tansimi fʋ nya'andɔlib la,
ka ba bas vuud.”
40 Ka o lɛbisi ba ye,
“M yɛti ya ye,
bama ya'a bas vuud,
kuga gba na pian' man.”
Yesu kum Jerusalem nidib la yɛla
41 Ka on daa li'el ka nyɛ Jerusalem teŋ la,
o daa kumnɛ teŋ la zug
42 ka yɛl ye,
“Ya ya'a mi'in linɛ na tisi ya sumbʋgʋsʋm zina nwa li naan aan sʋ'ʋm!
Amaa li su'anɛ,
ka ya nini kʋ nyɛɛ li.
43 Bɔzugɔ saŋa kenna,
ka ya bi'emnam na ti tuu maal zaŋguomi giligi ya teŋ la,
ka ya nidib kʋ tun'e yii.
44 Ba na fanb yanam nɛ ya biis banɛ ka zaŋguom giligi ya la teŋin,
ka kʋ kɛ ka kugir baa yinne sʋn'e li tiraan zugɔ,
bɔzugɔ,
ya pʋ baŋ saŋa kanɛ ka Wina'am kena ye o faaɛn ya la.”
Yesu daa kpɛn' Wina'am Pʋ'ʋsim Yin la yɛla
45 Ka Yesu kpɛn' Wina'am Pʋ'ʋsim Yin la pin'ili kat banɛ kuosid kuosim la yisid,
46 ka yɛti ba ye,
“Li sɔbnɛ Wina'am gbauŋʋn ye,
Wina'am ye,
‘M yir na anɛ Pʋ'ʋsim Yir.’
Amaa yanam zaŋi lii maal na'ayiis yir.”