Tɔɔg linɛ paae Jerusalem la
4
1 Gɔsima, ti sanlim banɛ daa nyɛɛn lavɛnlim san'am ya!
Ba nɔk Pʋ'ʋsim Yir kugvɛnla la wʋsa
widigi bas suoya ni.
2 Zion dasam banɛ da nwɛnɛ sanlima ligidkpi'ema la,
nannanna ba maannɛ ba
wʋʋ tan dʋgid ka banɛ ya'abid maal.
3 Hali wɛbaas mu'asidi ba biis bin'isim
amaa mam nidib la anɛ nimbɛ'ɛdnam hali,
ba nwɛnɛ sian'arin niiŋ titada banɛ pʋ kɛlisidi ba biis kaasiga.
4 Ku'onuudi mɔr bilies la zug
ka ba zilima tabinɛ ba nɔnya ni;
biis la sɔsid diib,
amaa sɔ' pʋ tisi ba diibɔ.
5 Nimbanɛ daa dit disʋma la
yʋ'ʋn gɔɔnd pala ni ka kpiid kɔ'ɔm.
Banɛ daa dit na'am ka yɛɛd fuvɛnla la
yʋ'ʋn bɛ nɛ tampʋya ni pi'isid diib.
6 M nidib la nyɛ mugusʋg si'em la
gaad Sodom dimi da namis si'em la,
la'am nɛ Wina'am da gbirigi san'ami ba la
sɔ' da pʋ siak ye o sʋŋi ba.
7 Ti na'abiis la daa pɛligi gaad sakuga
ka pɛligi gaad bin'isim,
ba niŋgbina anɛ nyain
ka vɛnli nwɛnɛ kugbanɛ yʋ'ʋri buon Safira la.
8 Amaa nannanna ba sɔbigi gaad vugulim
ka sɔ' kʋ lɛm baŋi ba nindaa.
Ba waŋim nɛ kpɛlim kɔnba ma'aa,
ka kʋdigi nwɛnɛ dakpi'emis nɛ.
9 Banɛ da kpi zabbɔn'ɔgin la
sɔn'oe banɛ ka kɔ'ɔm kʋʋ ba la;
ba namis nɛ kɔ'ɔm hali
diibi kae pɔɔdin la zug.
10 Saŋa kanɛ ka man nidib la daa bɛ mugusʋgin la,
pu'a banɛ zɔt nimbaanlig
daa dʋgidi ba mɛŋ-mɛŋ biis
ka li liebi ba diib.
11 Zugsɔb la sʋnfʋ pɛlig la
o pʋ gu'us baa bi'elaa,
ka nyu'oe Zion tempʋʋg nɛ bugum
ka li di nɛ li ɛɛnbir la wʋsa.
12 Teŋgbauŋ la na'anam pʋ niŋ labaar la yadda.
Hali dunia nidib la wʋsa sɔ' pʋ niŋ yadda
ye bi'emnam nɛ dataas
na nyaŋi kpɛn' Jerusalem teŋ za'anɔya la nii.
13 Amaa li tʋm ya ka li anɛ ba nɔdi'esidib la tʋʋmbɛ'ɛd zug
nɛ ba maanmaannib la maal taal.
Ban kʋʋd nidib tempʋʋgin la zug,
hali banɛ pʋ tʋm taal la kpii ba nu'usin.
14 Ba tuongatib la yiridnɛ suorin
wʋʋ zʋnzɔɔs nɛ.
Ba liebnɛ tuk dim ziim kanɛ ka ba yis la zug
ka sɔ' kʋ nyaŋi si'isi ba ya'asɛ.
15 Ka nidib la yɛti ba ye, “Zɔmi!
Ka ya anɛ tuk dim, da si'isi tii! Kemi sa!”
Ka ba tɔɔm giligid tɛɛns wʋsa
ka teŋ ban dim la yɛti ba ye,
“Da di'e ba ka ba kʋ lɛm kpɛlim kpɛla ya'asɛ!”
16 Zugsɔb la mɛŋi widigi ba
o pʋ lɛn guri ba ya'asɛ.
Maanmaannib pʋ lɛn nyɛt na'asii
ka kpɛɛmnam kɔ'ɔŋ girima.
17 Ti da tɛn'ɛsid ye sʋŋir na kena
ka li pʋ kenaa, ka ti ti'ir naae.
Ti da dʋ dɔwa'ama zugʋ gu'usid
teŋ kanɛ kʋ nyaŋi sʋŋi tii.
18 Ti dataas la pigidi dɔlli ti wʋʋ tɔn'ɔsnam nɛ
ka ti pʋ lɛn nyaŋidi ken suoya la nii.
Ti ba'asʋg dabisir li'el ya
ka ti naar saŋa paae.
19 Banɛ da kati ti bugir la ken tɔ'ɔtɔ
gaad silʋgʋ ian'adi agɔlli ken si'em la;
banɛ dɔlli ti ye ba gban'e la gaadi ti tuon zuoya la ni
ka su'a pipirigin ye ba libigi ti.
20 Ba da bɛnd baansi gban'e ti Na'ab
onɛ ka ti Zugsɔb gaŋ la,
ka li nwɛnɛ ba di'e ti nyɔvʋr wʋsa nɛ.
On ka ti niŋ yadda ye ti na su'a o ma'asimin,
ka o na gu' ka yisi ti, ti dataas nu'usin.
21 Yanam Edom dim banɛ bɛ Uz teŋ la,
kɛlli ka ya sʋnya ma'ae ka ya maal sumalisim!
Amaa yanam namisʋg mɛ kenna, ya na paami li.
Ya na nuu li bug ka ken biel nɛ nyan.
22 Yanam Zion dima, ya tʋbtɛɛgir naae ya,
Zugsɔb kʋ lɛn kɛ ka ya an yammis teŋ zʋŋʋ yuugɛ.
Amaa yanam Edom dima, Zugsɔb na tɛɛgi ya tʋba.
O na nie ya bugusim la paalʋ ka nidib nyɛ.