Tʋbtɛɛgir nɛ ti'ir yɛla
3
1 Manɛ an onɛ baŋ namisʋgʋ an si'emka li anɛ Wina'am sʋnfʋ duoe ka o bʋ'ʋm nɛ balaar.
2 O mɔrimi keŋ kpɛn'ɛs zin'ikanɛ an lik
ka nɛɛsim kae.
3 Ka bʋ'ʋm hali sʋ'ʋŋa
pɛndigi pɛndig ka pʋ basida.
4 O basi m niŋgbiŋ la ka li kʋdig,
ka kɔɔ m kɔnba.
5 O da yɔɔm nɛ sanrega ni
ka kɛ ka namisʋg nɛ tɔɔg giligim.
6 O kɛ ka m bɛ likin
ka nwɛnɛ banɛ kpii dig yaʋgʋn nɛ.
7 O lɔɔm nu'us nɛ baans
ka m ka' yiib ti'irɛ.
8 M kaas kuŋ ka tansi bɔɔd sʋŋir,
ka Wina'am zan'as ye o kʋ wʋmi m sɔsʋgɔ.
9 M ya'a ye m keŋ wʋsa
o mɛɛd kuga guoma gu'udim.
10 O nwɛnɛ wɛbaa su'a gu'udim
ka nwɛnɛ gbigim kanɛ su'a digi pigidim.
11 O vuugimi yi suor la zug na tɔɔnsi tɔɔnsim
ka basim, ka sʋŋir kae.
12 O gʋd tiraugʋ tɛk ye o tɔn
ka li anɛ mam ka o tɛɛg piim la kpa' ye o tɔn.
13 O fuoe piema o lɔki nɛ tɔn
ka piema la kʋnsi m susʋnf.
14 Nidib la'adim daar wʋsa, ka mɔrimi di'em,
ka yʋ'ʋm yʋʋma nɛ'ɛsidim.
15 Namisʋgʋ liebi m diib nɛ m ku'om
li tɔɔg nwɛnɛ yabid nɛ.
16 O nɔk zigi nɛ kuga kɔɔ m nyina;
ka nɔɔmi digil titanin.
17 M kɔ'ɔŋ laafi nɛ sumbʋgʋsʋm
li yuugi galis ka m tam linɛ wʋsa an sʋm yɛla.
18 Ala ka m yɛl ye, “Man vɛnlim naae ya,
ka m ti'ir linɛ ka m mɔr Zugsɔb san'an la gaad.”
19 M ya'a tɛn'ɛsi m namisʋg nɛ man giilim si'em la yɛla
li anɛ tɔɔg wʋʋ yabid nɛ tisim.
20 M tɛn'ɛsidi li yɛla hali
ka m sʋʋnr san'ami li zug.
21 Amaa m tɛn'ɛs yɛl yinne
ka linzug ka m mɔr ti'ir ya'as:
22 ye, Zugsɔb nɔŋilim nɛ o nimbaanlzɔɔr linɛ ka' bɛn la,
kɛ ka ti nan kpɛm bɛ.
23 Bɛogʋn wʋsa o nɔŋilim la anɛ bʋmpaal;
ka o yɛlsida zu'oe hali.
24 M yɛli m sʋʋnrin ye, “Zugsɔb la aan m mɔrim nɛ m faar,
ka m nɔki m ti'ir wʋsa niŋ o ni.”
25 Zugsɔb la an sʋ'ʋm tis banɛ ti'iri bɛɛ o ni
nɛ banɛ ieed o nɛ ba sʋʋnr wʋsa la.
26 Li an sʋ'ʋm nɛ nidi na ma'ae o mɛŋ baanlimm
gur Zugsɔb la faangir la.
27 Li nar ye o mɔr suguru kaŋa mɔdig tʋʋm kpi'ema ni
saŋkan ka o nam bɛɛ o dasannimin la.
28 O ya'a namisid, on zin'inim baanlimm nɛ suguru
ka li anɛ Zugsɔb la kɛ ka li paae o.
29 O siem o mɛŋi digin teŋin
ka daasi'erɛ ti'ir na bɛɛ tis o.
30 Baa li ya'a anɛ tʋ'ʋd nɛ bʋ'ʋd wʋsa
on siakimi li ka bɛ baanlimm.
31 Zugsɔb la zɔt nimbaanlig
ka kʋ bas ninsaal nyainnɛ.
32 O na mɔr sʋnsa'aŋ na amaa o na pa'al o nimbaanlzɔɔr
o nɔŋilim linɛ ka' naar la zug.
33 Li ka' o bɔɔdim ka o namisid nidiba;
ba sʋʋnr ya'a san'am li pʋ malis oo.
34 Ba mugus banɛ bɛ sanrega ni
ka namisi ba hali.
35 Ba mɔŋ nidib bʋʋd
Zugsɔb Onɛ Gaad Si'el Wʋsa la tuon,
36 ka kɛ ka sida kae sariakadib zin'iginɛ;
Zugsɔb la nyɛt ka mi' linɛ tʋm wʋsa.
37 Anɔ'ɔnɛ na tun'e tis nɔɔr ka ba sid niŋi li
ka li ya'a ka'anɛ Zugsɔb la pʋn gban'e li?
38 Li ka'anɛ Zugsɔb Onɛ Gaad Si'el wʋsa la san'an
ka bʋnsʋŋ nɛ bʋmbɛ'ɛd wʋsa yitnaa?
39 Bɔɔ maal ka ninsaal ya'a tʋm tʋʋmbɛ'ɛd ka tɔɔg paae o
ka o fabin ka nyɔnnɛ li yɛla?
40 Kɛl ka ti vɛɛnsi ti suoya gɔs
ka fɛndigi lɛb Zugsɔb san'an.
41 Kɛl ka ti yɔ'ɔgi ti sʋnya tis Wina'am onɛ bɛ Arezana la
ka ʋki ti nu'usi pʋ'ʋs o, ka yɛl o ye,
42 “Ti tʋm tʋʋmbɛ'ɛd ka zan'asi fʋ nɔɔr,
ka fʋn Zugsɔb la nam pʋ kɛɛ ti taali basɛ.
43 Fʋ pili fʋ mɛŋ nɛ sʋnpɛɛn wʋʋ fuugnɛ kati ti
ka kʋʋdi ti ka pʋ zɔt nimbaanliga.
44 Fʋ pili fʋ mɛŋ nɛ saŋgbana
ka li kɛ ka ti sɔsʋg pʋ paadi fɔ.
45 Fʋ kɛya ka ti nwɛnɛ tampʋʋr
ka nwɛnɛ sa'adi tis dunia nidib wʋsa.
46 Ti dataas wʋsa la'adi ti nɛ,
ba kɛɛndi ti ka tʋ'ʋdi ti.
47 Ti nyɛt tɔɔg nɛ dabiem nɛ vɔlisʋg
ka dit namisʋg nɛ fara bɛdegʋ.”
48 M nini wʋsa anɛ ninta'am
ka li anɛ m nidib la paam san'auŋ la zug.
49 M ninta'am yit nɛ ka pʋ gu'oda,
li zan'as ye li kʋ gu'oe.
50 Asɛɛ ka Zugsɔb naam arezana ni
sʋ'ʋnnɛ gɔs na ka nyɛɛti.
51 M ya'a nyɛ ban maan pu'abi m tempʋʋgin la si'em la
kɛnɛ ka m sʋʋnr san'amid.
52 M dataas gban'am nɛ baŋ wʋʋ niiŋ nɛ
ka m pʋ maali ba si'el si'ela.
53 Ba nɔkim nɛ bas bʋmbɔk zulʋŋin
ka nɔk kuga lɔbid ye ba kʋʋm.
54 Ku'om la limi m zug
ka m tɛn'ɛs ye m kum paae.
55 M Zugsɔba, m daa bɛ nɛ bʋmbɔk la pʋʋgin
ka nwɛ' kuŋi buoli fʋ yʋ'ʋr.
56 Fʋ wʋmmi m sɔsʋg,
“Da li' fʋ tʋba nɛ man fabinnɛ tisidif ye fʋ tisim yɔlisim la!”
57 Man buolif la fʋ li'eli m san'an na
ka yɛlim ye, “Da zɔt dabiem!”
58 Zugsɔba, fʋnɛ kena sʋŋim ka faanm
ka kɛ ka m nan vʋe.
59 Fʋ nyɛ ban kisim ka mɔŋi m bʋʋd si'em.
Kadim saria ka tisim bʋʋd.
60 Fʋ nyɛ ban yɛt ye ba na yɔ sam ka namisim si'em;
ba gban'ad gban'abɛ'ɛd m yɛla.
61 Zugsɔba, fʋ wʋm ban tʋ'ʋdim si'em
ka gban'ad bɛ'ɛd ye ba mugusim.
62 Daar wʋsa ba pian'ad nɛ mam yɛla
ka su'adi gban'ad pʋtɛn'ɛbɛ'ɛdi m yɛla.
63 Lin yi bɛogʋn keŋ paae zaam man ka ba la'ad,
hali ba yʋ'ʋmmi ziemid man.
64 Zugsɔba, yɔɔmi ba tʋʋmbɛ'ɛd la sam,
kɛl ka tɔɔg paae ba, ka li zemis nɛ ban tʋm si'el la.
65 Kɛl ka ba tʋba ziank,
ka kɛ ka fʋ nɔpɔɔr dɔlli ba.
66 Kadimi ba yis nɛ sʋnpɛɛn
yisimi ba dunia kanɛ ka Zugsɔb maal la ni.