Zugsɔb la tɛɛg Jerusalem dim tʋbir
2
1 Zugsɔb la sʋnf duonɛ halika o kɛ ka Zion wʋsa an lik.
O nɔk Israel vɛnlim la wʋsa bas
ka li naan arezana nii li teŋin.
O pʋ lɛn tɛnr o Pʋ'ʋsim yir linɛ aan o nɔba
zi'elʋg zin'ig la o sʋnpɛɛn la daarɛ.
2 O san'am Juda sʋ'ʋlim teŋkpɛmis la wʋsa
ka pʋ zɔ nimbaanliga.
O san'am zaŋguoma banɛ gu'ud teŋ la
nɛ Zion tempʋʋg kpi'euŋ zin'is wʋsa.
O kɛ ka nyan kpɛn' teŋ la hali
ka tuongatib la wʋsa lɛn ka' na'asi.
3 O sʋʋnr duoe nɛ Israel dim la hali
ka o kɛnsi ba giinla.
Ba dataasi da li'en na la,
ka o lɛb nya'aŋ ka zan'as ye o kʋ sʋŋi baa.
O sʋʋnr pɛlig nɛ Jakob
wʋʋ bugum diti san'amid la'ad si'em la.
4 O tɔɔndi ba nɛ piema wʋʋ o anɛ ba dataa nɛ
o ti'eb ya nɛ o nu'ug kanɛ mɔr paŋ la.
Li nwɛnɛ dataa ka o kʋnɛ
o kʋ banɛ an ninsʋma la wʋsa;
ka kpa'ae o sʋnpɛɛn la wʋʋ bugum nɛ
niŋ Zion teŋ la ka li dii san'am ya'.
5 Zugsɔb san'am Israel wʋʋ o dataa nɛ,
ka kɛ ka na'ayir la wʋsa lieb dabɔɔd
ka san'ami ba kpi'euŋ zin'is la.
O tis Juda dim sʋnsa'aŋ bɛdegʋ
ka ba kum ka fabin.
6 O da nwa'ae o Pʋ'ʋsim Yir la bas
ka san'ami ba la'asʋg zin'ig la bugusi bugus.
Zugsɔb la kɛya ka ba tami
ba malima nɛ ba Vʋ'ʋsʋm dabisa;
o sʋnpɛɛn la taas na'anam nɛ maanmaannib la,
ka o zan'asi ba wʋsa.
7 Zugsɔb bas o mɛŋ maan daka la nɛ,
nɛ o Pʋ'ʋsim Yir la.
O zaŋi li tis dataas la
ka ba faaɛn na'ayir la nɛ ba ya-vɛnla la.
Ba maan tʋkpiidʋg Zugsɔb Yir la pʋʋgin
nwɛnɛ malʋŋ dabisa ka ba maan si'em la.
8 Zugsɔb la gban'e ye o nwa'ae
o na'am zaŋguoma banɛ gilig Zion la.
O nɔk linɛ makid la maki li
ka pʋ basi li san'auŋɔ.
O kɛ ka zaŋguoma wʋsa kaasid;
ka kɛ ka ba san'ami li wʋsa.
9 Za'anɔya la wʋsa vɔnrigi sig teŋin
ka li kʋlis nɛ kʋntnam wʋsa kɔ' gima-gima.
Ba na'anam nɛ burikinnam wʋsa lieb yammis.
Wada la lɛn kae baa bi'elaa,
ka nɔdi'esidib la mɛ pʋ lɛn wʋm si'el
bɛɛ nyɛt si'el ka li yit Zugsɔb san'an na ya'asɛ.
10 Jerusalem bʋnkʋt la yʋ'ʋn zin'inɛ teŋin
ka fɔn ki' an baanlimm.
Ba wʋsa bugi ba zut nɛ titan
ka yɛ bɔto fuudi pa'annɛ ba sʋnsa'aŋ.
Pu'asada banɛ bɛ Jerusalem la wʋsa
nyan mɔri ba nɛ ka ba nɔki ba zuti ba' teŋin.
11 M kaas nɛ hali ka m nini pʋ lɛn nyɛta
ka m zi' man bɛ si'ela.
M sʋnf san'am nɛ m nidib la san'auŋ yɛla
li wʋmim nɛ ka m lɛn ka' paŋa.
Biis nɛ bilies la nwi'e tempʋʋg la suoya ni.
12 Ba kaasidnɛ tisidi ba manamɛ
bɔɔd diib nɛ bʋnnuuda.
Ba lu tempʋʋg la suoya ni
nwi'e wʋʋ ba pu'alimi ba nɛ.
Ka tita'am kpii ba manam la nu'usin.
13 Jerusalem, Jerusalem kanɛ ka m nɔŋa,
m ye m yɛl ye bɔ?
M ye m nɔk bɔɔ maki fɔ?
Bɛɛ m na yɛli fʋ yɛla ye bɔ?
Namiskan ka fʋ namis la
sɔ' nan namis namiskan buudii?
Fʋ namisʋg la zu'onɛ wʋʋ atɛuk nɛ
ka onɛ na bɛlisif lɛn kae.
14 Nɔdi'esidib la da pʋ pian'ad sida tisidi fɔ
asɛɛ faad nɛ dama'am ma'aa.
Ba da pʋ mɔɔli nie ya tʋʋmbɛ'ɛdi an si'em,
ka ya gu'us ka ba da gban'e ya keŋ teŋ zʋŋɔ.
Ban yɛti ya si'el wʋsa la anɛ dama'am ma'aa
ka kpɛn'ɛsidi ya mɔɔg.
15 Nimbanɛ gat tempʋʋgin la wʋsa la'adi ya nɛ,
ka nwɛ'ɛdi ba nu'us ka lɔbid zut
ka la'ad Jerusalem san'auŋ la yɛla.
Ba bu'osid taaba ye, “Tempʋmalisiŋ la nwana?
Zin'ikanɛ an Dunia wʋsa malisim zin'ig la nwana?”
16 Ya dataas la wʋsa lɔbidi ya nɛ nɔya
ba wʋsa kpɛn'ɛsidi ya nɛ ɛndʋg ka ga'ad nyina.
Ba yɛt ye, “Ehɛɛn! Ti san'ami ba!
Dabiskanɛ ka ti daa gu'usid la paae ya
ka ti nini nyɛ li!”
17 Zugsɔb la gban'e ye o tʋm tʋʋm si'a la nwa
ka o yʋ'ʋn tʋm naae;
hali kʋdimin sa ka o da gban'e li yɛla.
O tuligi ya yɛla ka san'ami ya suoya wʋsa
ka pʋ zɔ nimbaanlig wʋʋ on pʋn dɛŋi yɛl si'em la.
O kɛya ka ya dataas nyaŋi ya
ka kɛ ka ba sʋʋnr ma'ae yanamɛ paam san'auŋ si'em la zug.
18 O Jerusalem, kɛlli ka ya zaŋguoma la kaas
ka li wʋsa nwɛ' kuŋi tis Zugsɔb la.
Kɛlli ka ya ninta'am yit wʋʋ ku'om bʋn nɛ
ka pʋbid yʋ'ʋŋ nɛ nintaŋ.
Kaasimi ka kɛ ka ya sʋnya san'am.
Da vʋ'ʋs bɛɛ bas kaasig baa bi'elaa.
19 Yʋ'ʋŋ wʋsa duom ka kaasi tis Zugsɔb la,
kaasim zaamnɔɔr hali ti paae yʋ'ʋŋ tisʋʋs.
Nɔkimi ya sʋnya kpa'ae wʋʋ ku'om nɛ sɔsid Zugsɔb la.
Ʋkimini ya nu'us agɔl ka sɔs o
ka o zɔɔ ya biis la nimbaanlig;
bibanɛ ka kɔ'ɔm kʋʋd suoya wʋsa ni la.
20 Wala ka fʋ namisidi ba ala, Zugsɔba?
Sɔ' kae nam mi' nyɛ namisʋg ka li nwɛnɛ nɛ'ɛɛ.
Gɔsima! Li nar ye pu'ab ɔnbi ba biisɛ?
Bibanɛ ka ba mɛŋ du'a ka gɔsi ba la?
Ka li nar ye ba kʋʋdi fʋ maanmaannib nɛ nɔdi'esidib
banɛ tʋmmi fʋ Pʋ'ʋsim Yin la?
21 Ba biis nɛ ba kpɛɛmnam
la'am kpii dig teŋin suoya la ni.
Dataas la kʋʋ ba dasam nɛ pu'asada la;
ba kʋʋ ba wʋsa tanpin.
Fʋ sʋʋnri duoe la zug ka fʋ kɛ ka ba kpi
ka pʋ zɔɔ ba nimbaanliga.
22 Zugsɔba, fʋn la'asid nidib ye ba di ka maal sumalisim si'em la,
ala ka fʋ kɛ ka dataas kpɛn'ɛsidim dabiem zin'ig wʋsa.
Zugsɔb la sʋnpɛɛn daar la
sɔ' kae na nyaŋi zɔɔ pɔns bɛɛ tiligɛ.
Bi'emnam la kena kʋʋ m biis
banɛ ka m gʋ'ʋl ka nɔŋ la.