Ba sɔs Wina'am ye o zɔɔ ba nimbaanlig
5
1 Zugsɔba, tɛn'ɛsim dinɛ maali ti la;gɔsim tinamɛ di nyan si'em.
2 Ti areza'as wʋsa lieb nɛ saam din
ka teŋ zʋŋ dim kpɛn'ɛdi ti yaan.
3 Ti dataas la kʋʋ ti saamnam
ka kɛ ka ti manam an pʋkɔnya,
ka tinam mɛ an kpiibis.
4 Asɛɛ ka ti da' ku'om ka naan nu;
ti mɛŋ daad ka ba kuosidi tisidi ti.
5 Banɛ kati ti la bɛ nɛ ti nya'aŋ yammin
ka ti gɛn ka ba mɛ kʋ basi ti ka ti vʋ'ʋsɛ.
6 Dikanɛ ka ti dit ka vʋe kae
asɛɛ ti keŋ Egipt bɛɛ Asiria sɔs diib.
7 Ti yaanamɛ da tʋm tʋʋmbɛ'ɛd la ka kpi
linzug ka tinam yʋ'ʋn bɛ namisʋg pʋʋgin.
8 Nimbanɛ sʋ'oe ti la anɛ yammis
ka sɔ' mɛ kae na faaɛn ti yisi ba nu'usi nɛ.
9 Ti ɛɛn kuosnɛ ti nyɔɔr ka naan nyɛ diibi di
bɔzugɔ banɛ ye ba kʋʋ ti bɛ sian'arin la.
10 Kɔ'ɔm kɛ ka ti niŋgbina tʋlig
wʋʋ bugum nɛ.
11 Ba bibi ti pu'ab Zion zuorin
ka dig nɛ ti pu'asada Juda teŋkpɛmisin wʋsa.
12 Ba mɔri ti tuongatib la keŋ yuli ba nɛ nwiis
ka pʋ tisidi ti bʋnkʋt la na'asii.
13 Ba mugusidi ti na'akim la
ka kɛ ka ba nɛ'ɛm ki wʋʋ yammis nɛ,
ka ti biribis la zi daadi gɛn.
14 Kpɛɛmnam la pʋ lɛn zin teŋ la za'anɔya nii,
ka dasam la mɛ pʋ lɛn nwɛ'ɛd yʋʋma ya'asɛ.
15 Malisim gaad ya, ka sʋnsa'aŋ di'e zin'ig wʋsa.
Ti wa'a tiaknɛ lieb fabʋlʋg nɛ kaasig.
16 Tinamɛ daa nwɛ'ɛd nyɔ'ɔg nɛ si'el la wʋsa lɛn kae.
Gɔsima! Ti tʋm tʋʋmbɛ'ɛd ka bɛ yɛla ni.
17 Nɛ'ɛŋa zug ka ti sʋnya san'am
ka ti nini pʋ lɛn nyɛt sʋ'ʋŋa.
18 Bɔzugɔ Zion zuor la kpɛlim nɛ zaalim
ka Akɔranam giligid teŋ la wʋsa.
19 Amaa Zugsɔba, fʋnɛ an Na'ab saŋa wʋsa
ka na'am la bɛ nɛ zʋmaana wʋsa saŋa linɛ ka' bɛnnɛ.
20 Bɔ ka fʋ tammidi ti yɛla saŋa wʋsa?
Bɔ ka fʋ basi ti ka li yuugɛ?
21 Mɔri ti lɛb na, Zugsɔba, mɔri ti lɛbi fʋ san'an na!
Tɛndigimi ti ka ti lɛbi an wʋʋ tinamɛ da an si'em la.
22 Bɛɛ fʋ zan'asi ti nɛ nyainnɛ?
Fʋ sʋnpɛɛn la ka' bɛnnɛ?